Qoodaabaa 21:22-30

²²“Nuna ne biittaara kanttissarkkii! Nuuni ne gadiyaa giddo woikko woine turaa giddo gelokko; qassi haatta ollaa augaappenne uyokko. Nuuni ne biittaara kanttana gakkanaassi, Kawo Ogiyaara baana” yaagiis.

²³SHin Sihooni ba biittaara Israa7eela asaa kanttissennan diggiis; i ba olanchchata ubbaa shiishshidi, Israa7eela asaa olanau bazzo biis; Yahaaxa giyoosaa bi gakkidi, Israa7eela asaara olettiis.

²⁴SHin Israa7eela asai olan Amooretuppe daruwaa woridi, eta biittaa Arnnoona SHaafaappe doommidi, Amoonatu zawan de7iya Yaabooqa SHaafaa gakkanaassi oiqqiis. Amoona asatu biittaa zawai gimbbetti uttido gishshau, eti yaa gelibookkona.

²⁵Yaatin Israa7eelati Amooretu katamata ubbaa xoonidi ekkidosona. Qassi Haseboonanne a yuushuwan de7iya qeeri katamatakka ubbaa oiqqidi, yan uttidosona.

²⁶Haseboona katamai Amooretu Kawuwaa Sihoona katamaa. Sihooni Moo7aaba biittaa kawuwaa kaseegaa olidi, Arnnoona SHaafaa gakkanaassi a biittaa ubbaa appe ekkidaagaa.

²⁷Hegaa gishshau, leemisuwan hagaadan yaagidosona; “Hasebooni haayite; he katamai zaaretti keexetto; Sihoona gita katamai wodhdhi eqqidi keexetto!

²⁸Aissi giikko, tamai Haseboonappe, lacoi Sihoona katamaappe kiyiis; kiyidi Moo7aaban de7iya Eeranne Arnnoona SHaafaa heeran gezziyan de7iya halaqata miis.

²⁹Moo7aabaa, neeyyo aayye7ana! Kamooshau goinniyaageetoo, intte xayideta. Intte xoossai, Kamooshi, intte attuma naata baqatau, intte macca naata omooduwau, Amooretu Kawuwaa Sihoonayyo immiis.

³⁰Intte zerettati Haseboonappe doommidi, Diboona gakkanaassi muleera xayidosona. Medaaba matan de7iya Nofaaha gakkanaassi wurssidi bashshidosona” yaagidosona.