Mudɑ́ɑmmu 15

1

2

3

4

5

6

7

8

9

10

11

12

13

14

15

16

17

18

19

20

21

22

¹Kɛ̀ n yɑ̀ dɛ̀mɑrɛ̀ diɛrɛ̀ kɛĩ́nkɛ̀ kɛ̀ dɛ̀ n di. Kuyie ntɔ̃rɛ̀ yɛ̀yiekɛ̀ kɛ̀ yɛ̀ tɔ mɛyɛi mmɛ̀yiekɛ̀, mɛ̀ɛ̀ yóó pɛ̃ɛ̃tɛ́ kɛ̀ Kuyie mmiɛkɛɛ do.

²Kɛ̀ n yíɛ́ kɛ́yɑ̀ dɑ̀mɛ́ɛ̀rì kòo dò ndoii, kɛ dò ntɛwéìtɛ̀ kɛ cɔ́ú mmuhɑ̃ɑ̃́, kɛ́yɑ̀ bɛ̀ɛ̀ do nɑ musĩ̀mmù kɛ í nìńkú kɛ sɑ̃ntɛ mu tenkɑɑnìtɛ̀, bɑ́ bɛ̀ í mbɛ̀ wɑ̃̀ri mu yètìrì kó mɛcɑnnimɛ̀, kɛ̀ bɛ̀ còḿmú dɛ kóò dɑ̀mɛ́ɛ̀rì ĩ́nkɛ̀ kɛ tɔ tikùtìdùùtì Kuyie mbɛ̀ duɔ́ ntì.

³Kɛ diè mMɔyiisi Kuyie nkóo tɔ̃ntì kó fɛyɛ̀nfɛ̀ nɛ̀ dipebii kɔfɛ kɛ tú: Ti Yiɛ̀ nKuyie, ɑ tɔ̃mmú dɛumu kɛ wenni, ibotí imɔu kpɑ̀ɑ̀tì. A dɔɔri dɛ̀ dɛmɔu wennimu kɛ tú dɛmɔ́mmɔnnɛ.

⁴Ti Yiɛ̀ mbɛnìtìbɛ̀ bɛmɔu dɑ dému kɛ dɛ́úkùnko ɑ yètìrì, fɔ̃́ɔ̃̀ dò mpɑ́íí. Ibotí imɔu bo tíí kɛ nínkú ɑ ììkɛ̀ kɛ dɑ sɑ̃ntɛ, kɛ yɛ̃́ ɑ bɛnkɛmɛ̀ ɑ wetímɛ̀.

⁵Kɛ̀ n yíɛ́ kɛ́yɑ̀ Kuyie ncĩ́ɛ̃̀tɛ̀ mɛtɑummɛ̀ tɔu ĩ́ĩ́kú tɛ̀ kpetɛ́mɛ̀ kɛĩ́nkɛ̀.

⁶Kɛ̀ Kuyie ntɔ̃rɛ̀ yɛ̀yiekɛ̀ yɛ̀ɛ̀ do tɔ mɛyɛi mmɛ̀yiekɛ̀, kɛ̀ yɛ̀ɛ yɛ̀nní tɛ miɛkɛ kɛ dɑ́ɑ́tí tiyɑɑ̀pɛ́ítì kɛ̀ tì mìɛ̀ti, kɛ boú isɔɔnɑɑkũ̀ɔ̃ nyɛ cuokɛ̀.

⁷Kɛ̀ dɛ̀mɑrɛ̀ fòùrɛ̀ dɛ̀nɑ̀ɑ̀ kó dɛ̀mɑrɛ̀ɛ yɛ̀ duɔ́ nyisɔɔbòòkɛ ìyiekɛ̀, kɛ̀ Kuyie nkùù bo yɛbie nyɛbie ku miɛkɛ píɛ́kɛ́ i miɛkɛ.

⁸Kɛ̀ Kuyie ndɔ̀ɔ̀ tidiɛtì kɛ́bɛnkɛ ku wɛ̃rímú, kɛ̀ kuyukúu dɑ́tínnɛ́ ku cĩ́ɛ̃̀tɛ̀, òmɔù í nnɑ kɛ́tɑ, kɛ́nkémmú ku tɔ̃rɛ̀ nyɛ̀yiekɛ̀ tɔ mɛ̀ɛ̀ yɛi mbo deèmɛ̀.