MARKUS 6

1

2

3

4

5

6

7

8

9

10

11

12

13

14

15

16

¹A’di yaki’d mo ’peni mun mo dhali p̱u’d mo e bampam piti mo dhali imanciḵ a’di gwo baṯẖki a’di nsho’k mo be.

²Dhali ka cim ma pesu/ mo tani a’di ki ṯel mii ’pen mo mmoṯor uni gwo mo e gu’b gi montul is mo. Dhali ’kwani ka ris kun ciḵki gwom piti mo tani uni ’kokin mo mmomer mo mmo/o gwo mo ki: ’Peni mana sa/ igamkina wathi/ yansan aris mii gwansan mo? Ki moyuḵ jin ta’da ta sa/ ic̱ikunu a’di mo? Dhali adhan mom’bi’th maja sa/ imiikina a’di mii gwahan ki me’d piti mo?

³Dina a’di ki ta amanp̱a/ cwa ’taa? Dhali dina a’di ki ta ya/ ma Mariyam ’taa? Dhali ikam piti ’koki ta iYakuub mo dhala Yusi mo dhali Yahuuda/ mo dhala Simaan ’taa? Dhali ’kona i’bwaham piti ki nyaḵ ’ko ki ana imahana? Dhali uni kolkunu ki a’di mo be.

⁴Dhala Yesus ki o uni gwo mo ki: Amanc̱i gwo ma Arumgimis yisa dar gi taḵ e mon tiya hili isi ciki/ jasi e bampam pitiŋ gana/ mo dhali e bwaman ma bas ’kwanim piti mo dhali e gu’b pitiŋ gana/ mo be.

⁵Dhali a’di mol dhan miiny caaga/ mii mo isi ciki/ a’di kar me’d piti ap̱o/ ’kwani kun ’bathan ki daḵa/ mo dhali a’di ki wac̱ uni mo be.

⁶Dhali a’di merki’d kagahara mo haali/ gom ’kom buni jin ’kona uni ki dar gi moŋgam gwo is mo be. Dhali a’di yaki’d mo e bwaman ’kwani e bampa/ ’baar mo mmoṯor gwo mo be.

⁷Dhali a’di ki yuḵ ’kwani ’kume’d i’ce’dka su/ nyaḵki a’di mo, dhali a’di ki ṯel mii ’pen mo mmohash uni ka susu/ susu/ mo. Dhali c̱i uni moshirr ap̱owa rum thus kun nyo/on mo be.

⁸A’di ki ḵan uni gwo mo mmo’koki ’do ton tiya gom iim buni i bway mo hili isi ciki/ jasi cwa mo, walla maa yisa, walla ḵucaŋ yisa, walla guurush yisa eya jisalaan buni mo.

⁹Hili uni mini hi’th jasa p̱p̱a/ isho’k mo dhali mini ’koki hi’th burrinyem bwamani su/ mo.

¹⁰Dhali a’di ki o uni gwo mo ki: E gu’b yin jin mina umi cic̱ mo tani ’koyi mo ntagi um mini dhal mo yan ’pen mo.

¹¹Dhali waḵki/ ’kwani gi mo c̱aan ’koki bu’th um mo, dhali ush gwo ciḵ ’peni um mo tani dhali ki um mini dhal mo yin ’pen mo tani piri abuhany ’peni sho’k bum mo haali/ a’di midi ta gwo jin onu ap̱o/ uni mo be.

¹²Wakan uni iikin mo dhali c̱i gwo mo ki ’kwani mini ’taki rica du is mo be.

¹³Dhali uni urkina ruma ’cesh ka pije/ ka ris mo dhali wol uni ayini ’kup̱ ka ris mo, aris uni gun ’ba’thkin mo dhali wac̱ uni mo be.

¹⁴Dhala Maliḵ Hirodus ciḵki gwo mo gom a’di mo, gom gway ma Yesus mishkunu e mo ’baar mo. Gom kun tiya o gwo mo ki: A’di ta’da Yohaan jin ta’da manmiiya mii ki yi’de/ mo jin cukunu mis mo ’peni mowu mo. A’di ’bitha wathi/ mii ki ’bi’th e a’di mo be.

¹⁵Hili kun tiya o gwo mo ki: A’di ta’da Iliyya mo. Dhali kun tiya o gwo mo ki: A’di ta’da manc̱i gwo ma Arumgimis mo jin wana e gi jin ṯal ’deŋ kamu/ ’peni imanc̱i gwo ma Arumgimis kadhamo/ mo be.

¹⁶Hili ka Hirodus ciḵki gwo mo gom a’di mo tani a’di ki o gwo mo ki: AYohaan jin ’ciṯẖka/ ’kup̱ mo a’di cukunu mis mo ’te/ be.

¹⁷Haala Hirodus a’di hashki gwo mo dhali butha Yohaan mo dhali deḵ a’di mo mmokara sijin mo gom gway ma Hirodiyya mo jin ta asha kam piti ka P̱ilibbus mo haali/ a’di mashki’da yim mo be.

¹⁸Haala Yohaan ki owa Hirodus gwo mo ki: A’di diki ta mii jin dhala gwoŋḵan /e bway mo mmomash asha kan mo be.

¹⁹Dhala Hirodiyya a’di dikina gwo ap̱o/ a’di mo mmoruḵ a’di mo dhali ŋap̱ a’di mmo’taki ’kosh jwa mo tani hili ayim diki mish a’di mii mo.

²⁰Haala Hirodus a’di ḵo/ki’da Yohaan mo mmomishkina a’di a’di ki a’di ta wathiŋ ḵar/e mo dhali wathi/ jin ḵogu mo dhali kar a’di ki ’dantar mo. Ki a’di ciḵki gwo ’peni a’di mo tani a’di duŋkurkina ’kup̱ is kagahara mo dhali a’di di’d mmociḵ gwo ’peni a’di ki bwaŋ ’kunyga/ mo be.

²¹Hili embula ’borga/ p̱u’dki’d mo ka Hirodus p̱u’dkin ma cim jin dhodhu a’di mo tani a’di miiki dhan maa gom ’kwani ma hakuuma gi gu’b piti mo dhali imancil ma askar alip̱ mo dhali ’kwani gwanyjaḵa/ gi Pany Jaliil mo be.

²²Dhali ki ’bwa/ ma Hirodiyya p̱u’dki’d mo dhali sa mo tani ayim ’borki’da Hirodus bwa mo dhali yilkinam piti mo, dhali maliḵ ki o nyara/ gwo mo ki: Doṯi aha/ mo ma gom ma to yin jin o /e bwa mo dhali aha/ mina c̱iki a’di /e mo be.

²³Dhali a’di ki owa yim gwo is mo mmo/o gwo mo ki: Ma to yin jin mina /e idoṯ aha/ mo tani aha/ mina c̱iki a’di /e mo ntagi ’bwanu’b bampam pema kamu/ mo be.

²⁴Dhala yim yaki’d ka pije/ mo dhali doṯ kum gwo mo ki: Ata miga/ doṯ a’di mo? Dhali kum ki o a’di gwo mo ki: ’Kup̱ ma Yohaan jin ta’da manmiiya mii ki yi’de/ mo be.

²⁵Dhala yim yaki gu’b ki jahanne/ mo mmobumburku/ mo eya maliḵ mo dhali doṯ a’di gwo mo mmo/o gwo mo ki: Aha/ ŋap̱a /e mmoc̱i aha/ ’kup̱ ma Yohaan shwane’dan e bwam ma sahan mo, a’di jin ta’da manmiiya mii ki yi’de/ mo be.

²⁶Dhala maliḵ a’di biṯkina bwa ka luŋgu’b kagahara mo ki bwan diṯi’d mo. Hili haali/ gom gwo jin ona a’di is mo dhali yilkinam piti mo tani a’di ’tena bwa mmo’ce’d gwom piti goma yim mo be.

²⁷Dhali ki jahanne/ a’di hashki’da askar mo, a’di jin ta’da amanji mo mo, dhali ḵan gwo mo ki ’kup̱ piti minu guyu/ mo. Dhali a’di yaki’d mo dhali ’ciṯẖa/ Yohaan ’kup̱ mo eya sijin mo

²⁸dhali guyu/ ’kup̱ piti mo e bwam ma sahan mo dhali c̱iki a’di ki nyara/ mo, dhali nyara/ ki c̱iki a’di ki kum mo be.

²⁹Dhali ki imanciḵ a’di gwo ciḵki gwo mo gom a’di mo tani uni p̱u’dkin mo dhali ḵal buŋgwar is piti mo dhali ’thi a’di e jis wosh mo be.

³⁰Dhali imandhun ma Yesus ki she/ mo uni doḵkin mo ka nyaŋ’ko’d eya Yesus mo dhali ṯor a’di aris gwo ’baar mo kun miikina uni mo dhali aris gwo kun ṯorkina uni mo be.

³¹Dhali a’di ki ṯor uni gwo mo ki: Iiyi mo um ’cena mo e mo jin p̱ina ’kwani mo dhali siyi is mo ari’ceenne/. Haali/ ’kwani tana ris ka ris p̱u’dkin mo dhali iikin mo, dhali uni ’koki butha tente/ mo mmokar toŋ kamu/ n’twa/ mo mmoshwa mo be.

³²Dhali uni iikin mo e bwam ma ḵur mo e mo jin dar gi ’kwani uni ’cena ki is buni mo be.

³³Dhali ’kwani ka ris p̱arki uni e mo mmo/ii mo dhali mish uni mo dhali uni sokin ki sho’k mo ’peni aris bampa/ ’baar mo dhali p̱u’di ṯwa/a/ ki uni mo be.

³⁴Ki a’di thulki’d mo tani a’di p̱arki’da dhana buhany wathimpa e mo dhali a’di ki ḵo’c uni e i is mo haali/ uni wakina e gi ḵa’bal kun dar ga manhil uni mo. Dhali a’di ki ṯel mii ’pen mo mmoṯor uni gwo ki to ka ris mo be.

³⁵Dhali ki mo taki’da babalalu/ mo tani imanciḵ a’di gwo p̱u’dkin mo dhali o a’di gwo mo ki: Mo yansan ta mo jin p̱ina ’kwani mo, dhali mo ta’da ’thintha/ mo be.

³⁶Hashki uni mo ma ki uni mini ii bampa/ mo dhali pa kun ’kon gi jiŋ ’kam mo dhali yol tonṯe/ gom is buni mo mmoshwa mo.

³⁷Hili a’di ki thoḵ uni gwo mo ki: Um mini c̱i uni tonṯe/ mmoshwa mo. Dhali uni o a’di gwo mo ki: Mina aman ii mo ’te/ be dhali yol maaŋḵuthu’d ka riyaal iss ’kwanimpa ipe’de/ mo dhali c̱i uni mmoshwa mo ’taa?

³⁸Dhali a’di ki o uni gwo mo ki: Um ’kon ma guraasa ekata mo? Iiku/ mo dhali p̱ar e mo ma. Dhali ki uni gamki a’di mo tani uni ki o a’di gwo mo ki: Imudhe’d mo dhali to yi’de/ ’koni su/ mo be.

³⁹Dhali yan’ko’d a’di ki ḵan uni gwo ’baar mo mmo’ko ’pena ’cesh ka pwaḵ she/ mo ap̱owa shon dhii/i’d mo.

⁴⁰Wakan uni ’kokina ’cesh ka ŋul ’kup̱ mo ki iss ’kwanimpa ka mummudhe’d mo dhali ki iss su/ i’ce’dka ’kume’d mo be.

⁴¹Dhali a’di ki bu’th maaŋḵuthu’di mudhe’d mo dhali to yi’de/ isu/ mo tani dhali a’di ki hil ’kup̱ ki momis mo dhali a’di ki ’bora ’bor bwa i is mo dhali ’ce’d maaŋḵuthu’d bwa mo dhali a’di ki c̱i uni ki imanciḵ a’di gwo mo mmodhu ibwambori ’kwani mo. Dhali a’di ki pwaḵ to yi’de/ isu/ bwa mo mbwaman uni ’baar mo.

⁴²Dhali uni ’baar mo shwakin mo dhali kap̱kunu mo be.

⁴³Dhali uni ’tu’dkina nura/ ka ’kume’d i’ce’dka su/ mo ki ’pisira/ maa mo dhali to yi’de/ mo be.

⁴⁴Dhali uni gwansan kun shwaki maaŋḵuthu’d mo tani ta ’kwaniŋ gwasi alaap̱i mudhe’d mo be.

⁴⁵Ki jahanne/ a’di ki ṯor imanciḵ a’di gwo gwo mo mmose bwam ma ḵur mo mmo/ii iṯwa/a/ ki a’di mo e ’bana gap̱a kamu/ mo e Pam Beeṯsayda mo ki a’di midi ’cuḵka waambuhany ’kwani montul is mo be.

⁴⁶Dhali ŋ’ko’d ki a’di dhalki uni ’pen mo tani a’di seki moŋ’kuwosh mo dhali ’tho mo be.

⁴⁷Dhali ki mom’pimpili/ p̱u’dki’d mo tani aḵur a’di diki’d isi bwaman ma al mo dhali a’di di’d a’di ’de/ eya ’cesh mo be.

⁴⁸Dhali a’di di’d mmop̱ar uni e ki uni ’kokin ka c̱is mo e moŋ’kosh yi’de/ is ki cwa mo haala p̱unthar ’tham poshki’da p̱o/ uni mo be. Dhali ki mo ta mon’twash/e mo tani a’di p̱u’dki’di uni mo mmoya ki sho’k e ’kup̱a al yi’de/ mo. A’di ya’d ’taki ya pe uni mo be.

⁴⁹Hili ki uni p̱arki a’di e mo mmoya ki sho’k ap̱o/ ’kup̱a al yi’de/ mo tani uni ṯoshkin ki a’di ta’da rum mo dhali uni ḵumki cuuwa/ mo be

⁵⁰haali/ uni ’baar mo p̱arki a’di e mo dhali uni ’kokina isi modee mo. Hili ki jahanne/ a’di ṯorki uni gwo mo dhali o gwo mo ki: Budhi adu mo ma. Aha/ a’dan be. Dhalku/ is ki ḵo/ mo ma.

⁵¹Dhali a’di seki’d e bwam ma ḵur mo nyaḵki uni mo dhali ’tham doshki’d mo be. Dhali uni ’kokini momer kagahara mo be.

⁵²Haali/ uni ’koki mish gwo ’ban mo gom maaŋḵuthu’d mo haali/ adum buni ’bitha’bi’th mo be.

⁵³Dhali ki uni ’ciṯẖkina gap̱ mo tani uni p̱u’dkin mo e bampa/ gi Pa Jannisaaraṯ mo dhali uni shi’dkina ḵur iyana gap̱ mo be.

⁵⁴Dhali ki uni pikin ka pije/ mo ’peni bwam ma ḵur mo tani ki jahanne/ ’kwani nyiṯẖki a’di mo be

⁵⁵dhali uni sokin mo ’peni aris bampa/ ’baar mo mmokukul mo c̱aan is mo dhali ṯel mii ’pen mo mmoḵal ’kwani kun ’bathan mo eya cim buni mo e mo ’baar mo jin ciḵa uni gwo ki a’di di’di cine/ mo be.

⁵⁶Dhali e mo yin jin p̱u’da a’di mo eya ris bampa/ mo dhali e ’peŋkuman bampa/ mo walla e bampa/ mo tani uni ki ’thi uni gun ’bathan e mo ma suug mo dhali o bwa ki a’di mo, ki uni mini ’taki ta a’di isi ’twaman burrinyem piti is ki me’d mo. Dhali ka ris uni ka ris kun taki a’di is ki me’d mo tani uni ’kokunu mo mmowac̱ mo be.