Marcos 3

1

2

3

4

5

6

7

8

9

10

11

12

13

14

15

16

¹Jesús dáanomo Juzíñamui uai llófueriracomo jofo jaide. Afénomo ónoɨna llirídɨmɨe ite.

²Afénomo itɨ́nomona Jesumo ɨere eróioidiaɨoɨ, ocózinaillaruimo Jesús bímɨena jíllotajana onóillena, áfedo Jesumo fɨénidɨfue jɨtállena.

³Ie jira ónoɨna llirídɨmɨena Jesús daɨde: —Náidacai; jofo bené cɨ́gɨmo bi, —daɨde.

⁴Dáanomo jɨáɨmacɨmo jɨcánote: —¿Mɨnɨ́cana ocózinaillaruimo ómoɨri fɨnóredɨcue? ¿Nɨbaɨ fɨénidɨfue fɨ́noitɨcue, nɨbaɨ ñúefue fɨ́noitɨcue? ¿Nɨbaɨ omoɨ jíllotaitɨcue, nɨbaɨ omoɨ tɨ́taitɨcue? —daɨde Jesús. Mei íadɨ afémacɨ ja uai oñédiaɨoɨ.

⁵Jira Jesús íaɨoɨri rɨ́icaide. Daje izói zuure íaɨoɨmo eroide, mei íaɨoɨ onóiacañena jira. Iemo afe ɨímana daɨde: —Mai, o onoɨ zúitacai, —daɨde. Ie jira ie onoɨ zuitácaide. Iemona ja ie onoɨ ñuera.

⁶Afe mei fariséuaɨ, naa Herodes imacɨ dɨga jino jaillano, Jesús fallɨfue raɨre mamédiaɨoɨ.

⁷Jesús ie llófuegamacɨ dɨga, jorai fuédamo jaide. Iemo aillo naɨraɨ Galilea imacɨ, íedo jáidiaɨoɨ.

⁸Mei áillue ráfuena, afémɨe fɨnócafuiaɨna, fɨdɨ́illano aillo Judea énɨe imacɨ bite, Jerusalen imacɨ dɨga. Daje izói Idumea énɨe imacɨ bite; Jordán imani ruicáfelle imacɨ bite; Tiro, Sidón dɨga áɨnori itɨ́macɨ bite. Nana dáanomo bitíaɨoɨ; Jesús eróizaɨbitiaɨoɨ.

⁹Ie jira Jesús ie llófuegamacɨ ocuide nocáe atɨ́llena, aillo naɨraɨ ɨere rɨllire íemo íñeillena.

¹⁰Mei ɨere aillo naɨraɨ jíllotate. Iemona nana jɨáɨe ɨráredɨno rɨllire afémɨemo gaɨrídiaɨoɨ, ie jetánollena.

¹¹Iemo afénomo itɨ́nomona dáarie fɨeni jóriaɨrediaɨoɨ. Afémɨena cɨóillanona, afémɨe uiécomo ana dújudiaɨoɨ. Dújuillano caillɨ́oicaidiaɨoɨ: —O Juzíñamui Jitódɨo, —daɨde.

¹²Mei íadɨ Jesús fɨénide jóriaɨna izire rairuide; daɨde: —Juzíñamui Jitona cue íllana daɨíñeno iri, —daɨde.

¹³Ie mei Jesús ídumo caifo jaide. Dɨnomo jaillano Jesús comecɨ óiacagamɨe dɨ́gamɨe nɨzede. Afémɨemo bitíaɨoɨ.

¹⁴Doce dɨ́gamɨe Jesús nɨ́ziano ote. Afémacɨ ie oréllɨmacɨna Jesús mamede. Ua íaɨoɨna ote ie abɨmo íllena, ie uai llóitɨnona jáillena.

¹⁵Dáanomo rɨ́inona igáiaɨoɨ ɨráredɨno jíllotallena, íemo jɨáɨ fɨénide jóriaɨ jino oréllena.

¹⁶Afe nɨzécamacɨ doce dɨ́gamɨe. Afémacɨ mámecɨaɨ: Simón, nɨ́ɨmɨemo Jesús jɨáɨe mámecɨna jɨtaca, Pedro;

¹⁷ie mei Zebedeo jitó íaillɨnoɨ Santiago ie ama Juan dɨga. Afe íaillɨnoɨmo Jesús jɨáɨe mámecɨ jɨtade, Boanerges. Afe mámecɨ daɨna: Iocɨmɨe Iaillɨnoɨ.

¹⁸Ie emódomo jɨáɨe nɨzécamacɨ mámecɨaɨ: Andrés, Felipe, Bartolomé, Mateo, Tomás, Alfeo jitó Jacobo, Tadeo, íemo Ɨere Járidotɨmacɨmo jaɨnáidɨmɨe Simón,

¹⁹ie mei Judas Iscariote. Afémɨe méifodo Jesús ie éoidɨnomo fécaitɨmɨe. Afe méifomo Jesús ie llófuegamacɨ dɨga jofomo jofo jaide.

²⁰Nane dáanomo aillo naɨraɨ gaɨrízɨtiaɨoɨ. Iemona Cristo ie nɨzécano dɨga ja güínidiaɨoɨ.

²¹Afefue fɨdɨ́illano ie onoiga nabáiñɨaɨ bitíaɨoɨ ie oni uíllena, mei afémɨe uáɨritaide daɨdíaɨoɨ.

²²Daje llezica Jerusalémona bite ocuícafue llófueraɨnɨ, bie izói íeri úritiaɨoɨ; daɨdíaɨoɨ: —Bímɨe Beelzebumo jaɨnáidɨmɨe. Afe Beelzebú fɨénide jóriaɨ illaɨma, (jɨáɨcɨ ie mámecɨ Taɨfe). Afe Beelzebú rɨ́inodo fɨénide jóriaɨ afémɨe jino jiude, —daɨdíaɨoɨ.

²³Ie jira Jesús íaɨoɨ jɨ́ɨrite. Jɨ́ɨrilla mei, onoiga ráfuiaɨ íaɨoɨmo llote: —¿Nɨe izói afe Taɨfedo Taɨfe jiúrede? ¡Jiúnide!

²⁴Daa naɨraɨ énenorie jɨáɨziena oni bójicaillano are íñeitiaɨoɨ, mei nágazie conima dɨga fuirífɨrediaɨoɨza.

²⁵Daje izói eneno danɨ jofóredɨno íaɨoɨ bójicaiadɨ, are íñeitiaɨoɨ.

²⁶Mei jira Taɨfe dama ie dɨga fuiríadɨ, íemona dama ie bójicaiadɨ, afémɨe are íñeite. Ua áfedo fúibicaite.

²⁷‘Máɨrimɨe jofomo, buna jofo jáinide, ie ráaɨe baɨróllena. Dama afémɨe máɨa méifomo jofo jaillano baɨrórega.

²⁸‘Uáfuena ómoɨmo llotɨcue. Comɨnɨ fɨénidɨfuiaɨ nana dórede, daje izói nana íaɨoɨ fue borefue dɨga dórede.

²⁹Mei íadɨ Juzíñamui Ñuera Joréñomo fɨeni úritɨmɨe ie fɨénidɨfuiaɨ jaca ua oni dónide. Dama ie ɨ́coɨnia jaca íemo jɨ́ite, —daɨde.

³⁰Daɨí daɨde, mei afémɨe fɨénidena jóriaɨrede daɨdíaɨoɨ.

³¹Iemo Jesús ei ie ámatɨaɨ dɨga dúcɨdiaɨoɨ, mei íadɨ jino fɨébidiaɨoɨ. Dɨnómona jofo gaɨrídɨnona daɨdíaɨoɨ: —Mai ie jɨ́ɨrizai, —daɨdíaɨoɨ.

³²Jesús abɨdo ráɨiedɨno íena daɨdíaɨoɨ: —O ei, o ámatɨaɨ dɨga jino ite. O jénuaɨbitiaɨoɨ, —daɨdíaɨoɨ.

³³Mei afémɨe daɨde: —¿Buoɨ cue eina? ¿Buoɨ cue ámatɨaɨna? —daɨde.

³⁴Afe mei ie abɨdo ráɨiedɨnomo eróillano daɨde: —Be mei cue éitɨaɨ. Be mei cue ámatɨaɨ.

³⁵Mei Juzíñamui ocuícafuena jeire otɨ́nona bie cue ama, bie cue mirɨngo, bie cue ei, —daɨde.