1Echiriꞌ xikꞌow ri qꞌij re uxlanibꞌal, ri María ri aj Magdala, ri Salomé y ri María ruchu ri Jacobo, xkiloqꞌ kunabꞌal lik kiꞌ ruxlabꞌ re kakibꞌal rucuerpo ri Jesús chupa.
2Ekꞌu ri nabꞌe qꞌij re ri semana lik anim kꞌa e riꞌ kel lo ri qꞌij, xebꞌek pa muqutal wi ri Jesús.
3Kakibꞌiꞌij kꞌu chikiwach: «¿China kesan rabꞌaj chiqe kꞌo chuchiꞌ ri muqubꞌal?» kechaꞌ.
4Pero kꞌate xkilo, rabꞌaj esam chik, yey waꞌ lik nim.
5Ekꞌuchiriꞌ xebꞌok bꞌi chupa ri muqubꞌal, xkil jun ala tzꞌul pa uwikiqꞌabꞌ chike, ukojom jun kꞌul saq lik naj raqan. Yey rike lik xkixiꞌij kibꞌ che.
6Ekꞌu rire xubꞌiꞌij chike: —Mixiꞌij iwibꞌ. Riꞌix e kitzukuj ri Jesús ri aj Nazaret, ri xkamisax chwa cruz; Rire na jinta chi wara, ma kꞌastajinaq chubꞌi. Chiwila wa luwar pa xyaꞌiꞌ wi rucuerpo.
7Ekꞌu riꞌix jix, jiꞌbꞌiꞌij chike rutijoꞌn y che ri Pedro: “Rire keꞌek Galilea, kanabꞌej bꞌi chiwach; chilaꞌ kꞌu riꞌ kiꞌwila wi uwach, jelaꞌ pachaꞌ ri ubꞌiꞌim chi lo chiwe” —xchaꞌ.
8Ekꞌu rixoqibꞌ xebꞌel bꞌi chuchiꞌ ri muqubꞌal lik kebꞌirbꞌotik ruma bꞌenaq kinaꞌoj puwi ri xkilo; yey na jinta ne kꞌana kꞌo xkitzijoj wi ruma kixiꞌim kibꞌ.
9Ekꞌuchiriꞌ kꞌastajinaq chi lo ri Jesús, anim tan che ri nabꞌe qꞌij re ri semana, nabꞌe xukꞌut uwach chwach ri María ri aj Magdala, ri e resam bꞌi wuqubꞌ itzel uxlabꞌixel che.
10Rire xeꞌek kꞌut chaꞌ kuꞌtzijoj rukꞌastajibꞌal ri Jesús chike ri xeterej chirij yey xebꞌuꞌriqa kꞌu riꞌ lik kebꞌisonik y kebꞌoqꞌik.
11Yey rike echiriꞌ xkito kꞌastajinaq chi lo ri Jesús y xilitaj uwach ruma ri María, na xkikoj taj.
12Tekꞌuchiriꞌ, ri Jesús xukꞌut uwach chikiwach kaꞌibꞌ chike rutijoꞌn, noꞌj junwi uꞌanikil xuꞌan waꞌ echiriꞌ rike e riꞌ kebꞌinik kebꞌek pa juyubꞌ.
13Ekꞌu wa kaꞌibꞌ xetzelejik, xeꞌkitzijoj chike ri jujun chik tijoꞌn; yey waꞌ na xkoj tane chwikiqꞌabꞌ.
14Kꞌisbꞌal chi kꞌu re, ri Jesús xukꞌut uwach chikiwach ri junlajuj utijoꞌn echiriꞌ rike etzꞌul chwa mexa, yey xuchꞌaꞌbꞌej kipa ruma na kubꞌul ta kikꞌuꞌx rukꞌ y ruma uꞌanom lik ko ri kanimaꞌ, ma na xkikoj ta ke ri xebꞌilow re ri Jesús kꞌastajinaq chik.
15Xubꞌiꞌij kꞌu chike: —Jix che ronoje ruwachulew y chitzijoj ri Utzilaj Tzij chike konoje ri tikawex.
16Ekꞌu ri kekojow re y kakikꞌul ri bautismo, kekolobꞌetajik. Noꞌj kꞌu ri na kekojow ta re, kaqꞌat na tzij pakiwiꞌ.
17Yey chike ri kekojow re, kilitaj kꞌutubꞌal re ruchuqꞌabꞌ ri Dios. Pa ri nubꞌiꞌ kebꞌekesaj bꞌi itzel uxlabꞌixel, kechꞌaꞌt pa jujun chik kꞌakꞌ chꞌaꞌtem,
18kakichap taq ne kumatz pakiqꞌabꞌ. Yey we kꞌo ri xkitijo y na kinaꞌbꞌem taj kamisabꞌal ke, na jinta kꞌo kuꞌan chike. Kakiya ri kiqꞌabꞌ pakiwi taq ri yewaꞌibꞌ, y waꞌ kekunutajik —xchaꞌ.
19Ekꞌu ri Qanimajawal echiriꞌ chꞌaꞌtinaq chi kukꞌ, xkꞌul pana chilaꞌ chikaj y xtzꞌuyiꞌ puwikiqꞌabꞌ ri Dios.
20E taq kꞌu rutijoꞌn xebꞌel bꞌi che utzijoxik ri Utzilaj Tzij pa taq ronoje luwar. Yey ri Qanimajawal xebꞌutoꞌo, xuya chike kakikꞌut ruchuqꞌabꞌ ri Dios chaꞌ rukꞌ waꞌ kujikibꞌaꞌ uwach ri Utzilaj Tzij. Amén.
