MALUKO 16

1

2

3

4

5

6

7

8

9

10

11

12

13

14

15

16

¹Vidibitile Zua da Mhumulo, Maliamu wa kiwambo cha Magidala, Salome, na Maliamu mamaake Yakobo, wagula mavuta ga kunung'hila giladi wakalubake lukuli lwa Yesu.

²Ndamuka ya zua da mwanduso wa wiki, zua vudisongile kusimbuka, wachola kudipanga.

³Wakala wokiilongela wenyego kwa wenyego, “Yalihi yondayatubimbilisile idibwe hana umulomo wa idipanga?”

⁴Ila viwalolile uchana wajona dija idibwe dikalile kulu ng'hani dibimbilisigwa kumgwazo.

⁵Viwakalile wokwingila mdipanga, wamona mmhale imwe yavalile ng'hanzu nzelu yakalile kumkono wa ukulume wa idipanga, wasinhuka.

⁶Ila kawalongela, “Sambimsinhuke, novimanya kamba momzahila Yesu wa Nazaleti, yawambwigwe mumsalaba. Kahaduhu hano, kazuka! Loleni, hanhu hawamtambalike.

⁷Ila gendeni mkawalongele wanahina zake na Petulo, ‘Kowalongola kuchola Galilaya, ako momona kamba viyawalongele.’ ”

⁸Wahalawa na kukimbila kulawa mdipanga, kwavija wagogigwa na bwembwe na mkanganyo, na hawamulongele munhu yoyose, kwavija wona bwembwe.

⁹Yesu viyazukile kulawa mkudanganhika mdizua da mwanduso wa wiki, kasonga kumulawilila Maliamu wa kiwambo cha Magidala ayo yakalile na vinyamkela saba wawingigwe.

¹⁰Maliamu kachola kuwalongela waja wakalile hamoja na heyo, viwakalile wokiiyalala na kulila.

¹¹Ila viwahulike kamba Yesu mgima na heyo mwenyego kamona, hawatogole.

¹²Vuzibitile mbuli zino, Yesu koneka mwa wanhu wabili wakalile wamtogole kuno yagaluke ikihanga, wakalile mnzila wolawa mkiwambo wochola kumigunda.

¹³Wabwela na kuwalongela wayao, ila hawawatogole.

¹⁴Hakimambukizo, Yesu kawalawilila wanahina longo dimwe na imwe viwakalile woja. Kawakomhokela, kwavija viwakalile bule nhamanila na vija viwakalile wadala mmioyo yao, kwavija hawawatogole waja wamonile kipigiti viyazukile kulawa mkudanganhika.

¹⁵Kawalongela, “Gendeni muulumwengu wose mkaupete Usenga Unogile ha wanhu wose.

¹⁶Munhu yoyose yondayatogole na kubatizigwa, kokomboligwa, ila munhu yoyose yoleka kutogola, kotagusigwa.

¹⁷Na vilaguso vino vokwandakana na awo wondawatogole. Mtwaga jangu wowinga vinyamkela, wolonga ulonzi wa mkanganyo,

¹⁸wogoga nyoka na makono gao na kamba wahang'wa kinhu chochose cha kukoma hakiwagaza, wokwika makono gao mwa watamu na wohona.”

¹⁹Viyeshile kulonga nao, Mndewa Yesu kasoligwa uchana kuulanga kakala kumkono wa ukulume wa Mulungu.

²⁰Wanahina wachola kuupeta Usenga Unogile kila hanhu, na Mndewa kasang'hanika nao na kuzigangamiza mbuli zake na vilaguso vandakane nazo.