Maku 5

1

2

3

4

5

6

7

8

9

10

11

12

13

14

15

16

¹Morarame toeporehkase toto Keraza pona, ikuhpo mõpozakoxi.

²Morarame kanawae Jezu towõse. Mame mokyro jorokohpã tooehse okepỹpo tõ poe.

³Moroto okepỹpo tõ po esary kynexine. Pake mokyro jorokohpã emyhpopyra ehse.

⁴Osemazuhme tymytymyhse repe keti ke. Yrome tymyhtoh kurimene risẽ tamohmohse eya. —Sukurematatose, tykase imehnõ repe. Yrome onukuremasaromepyra toh kynexine.

⁵Nyhpyra ehse ynororo. Okepỹpo tõ poro ytoytose ynororo ypy poro. Kui kakehpyra ehse, topu ke tõtokotokose roropa ynororo.

⁶Morarame Jezu eneryke tyya, moe ahtao ro tururume toytose ynororo eya. Tosekumuru po typorohse ynororo Jezu ẽpataka.

⁷Opore ynara tykase, —Oty se hma Jezu ya? Ritonõpo kapuaõ mũkuru mase, imehxo exikety mũkuru. Ajohpãme sã josanumara ke exiko, tykase ynororo opore.

⁸Osemazuhme Jezu ynara tykase exiryke, —Mose ae otũtako ropa joroko kahpyry, tykase Jezu exiryke.

⁹Mame, —Onoky oesety? tykase ropa Jezu eya. —Ekuhpỹme yna esety nase, tuhke yna exiryke, tykase ynororo Jezu a.

¹⁰—Yna onenyohpyra exiko mya, tykase jorokohpã Jezu a.

¹¹Mame moroto tuhke poinokoimo kynexine otyro ẽtuhkãko ypy ẽmory po.

¹²—Yna enyohko yna omõtohme poinokoimo aka. Ah ynanomõxi, tykase toto otuhparo Jezu a.

¹³Morarame torekohmaryke tonyohse toto Jezu a. Orutua ae tutũtase ropa toto. Poinokoimo aka tomõse toto, joroko tomo. Morarame tururume toytose toto poinokoimo emero porehme. Tyhtose toto ypy ẽmory poe nakuaka. Tyneryse toto emero. Asakoro miume tyneryse poinokoimo.

¹⁴Mame inahpahpõkõ toepase patapõkõ zuruse, pata moinõkõ zuruse roropa.

¹⁵Morarame tuhke panatase tooehse toto Jezu a osenuhmase. Jorokohpanõpo tonese toto a typorohse. Upo tamuruse eya. Zae oturũko kynexine Jezu maro. Mame tõserehse toto.

¹⁶Morarame morotõkõ ynara tykase toto mokyro enese aehtyamo a, —Mose jorokohpanõpo. Joroko tõ tũtanohpo ropa Jezu, tuhke zae. Mame tyneryse poinokoimo tõ emero, tykase toto mokaro a oehsenãkomo a.

¹⁷Morarame Jezu a ynara tykase poinokoimo esamõpyamo, —Ytoko ropa oesaka, tykase toto. Otuhparo tonyohse ropa Jezu eya xine tosae xine.

¹⁸Morarame kanawaka Jezu aotyriryhtao, mokyro jorokohpanõpo tõturuse imaro, —Tuisa, amaro ytoxi ajohpãme samo, tykase ynororo eya repe.

¹⁹—Arypyra. Atapyĩ taka rokẽ ytoko ropa. Oepe tõ maro oturuta. Kure ke oturuko okurãkatopõpyry ropa poko, opyno jexiry poko roropa, ypoetoryme oexiry poko, enara, tykase Jezu eya.

²⁰Morarame toytose ropa jorokohpanõpo pata konõto poro, Tekapori poro. Moroto tõturuse ynororo, tukurãkatopõpyry ropa poko. Mame emero tãtãkyemase toto, “Emese kure Jezu mana,” tykase toto.

²¹Morarame tãtakuohse ropa Jezu kanawae mõpozakoxi. Ahno imoihme tooehse ropa eya morotona, ikuhpo ehpikoxi.

²²Morarame juteu tõ atamorepatoh esẽ tooehse, esety Jairu. Jezu pupuru myhtokoxi typorohse ynororo.

²³—Tuisa kuakorehmako ajohpãme samo. Jẽxiry orihnõko mana. Ymaro eropa ajohpãme samo. Oemary tyrikose epona aekurãkatohme ropa, orihpyra aehtohme, tykase ynororo eya.

²⁴Mame imaro toytose Jezu. Yrome ahno imoihmãkõ Jezu maro toytose. Ytopyra sã kynexine tuhke ahno exiryke.

²⁵Morarame nohpo moroto kynexine munuimohpano. Pakero kure pyra toehse ynororo. 12me jeimamyry taropose kure pyra toexiry poko rokene.

²⁶Toanahtose eya itamurume. Tuhke opi warõkomo a tukuhse roropa repe, yrome epona pyra, kure pyra itamurume exiryke. Tytinerukehse rokene.

²⁷Jezu ekary totase tyya exiryke, ĩkapo toytose ynororo tuhkãkõ rãtakuroko.

²⁸—Jezu zupõ temuhmaryhtao rokẽ ya ekurãkãko ropa ase, tykase ynororo tukurohtao.

²⁹Morarame zupõ tytemuhmase eya. Axĩ imunuru tymynyhpãse, kure toehse ropa ynororo. Mame toekurãkary ropa waro toehse ynororo.

³⁰Jezu roropa tunukurãkahpyry waro kynexine. Tõsenuhmase ynororo tỹkakoxi. —Onoky jupõ temuhmano? tykase ynororo.

³¹Morarame ipoetory tomo a tozuhse. Ynara tykase toto, —Imoihmãkõ enẽko mase. Epurohpurohmãko rokẽ toh mana. Oty katoh, “Onoky ytemuhmano?” ãko mahno? tykase toh Jezu a repe.

³²Yrome Jezu tõsenuhmase ropa tỹkakoxi tytemuhmahpõ enetohme.

³³Mame mokyro tõserehse. Tykytyky tykase ynororo tukurãkase ropa toexiryke. Jezu ẽpataka tooehse. Tosekumuru po typorohse. Emero kure turuse inukurãkahpyry a.

³⁴Morarame ynara tykase Jezu, —Kuku, jupõ mytemuhmano okurãkatohme. Kuenetupuhno. Morara exiryke kure ytoko ropa. Tukurãkase ropa mase, tykase Jezu eya.

³⁵Morara karyrohtao Jairu tapyĩ tae tooehse toto. —Oẽxiry norihno. Amorepatõ onerekohmara exiko, tykase toto aorikyhpyry zumy a.

³⁶Yrome mokaro otururu totase Jezu a, —Oserehpyra exiko. Ãkorehmary enetupuhko ya, tykase Jezu aorikyhpyry zumy a.

³⁷Morarame typoetory tõ rokẽ tarose eya, Peturu, Tiaku, João, enara rokene. Tiaku akorõ João kynexine.

³⁸Morarame toeporehkase toto Jairu tapyĩ taka. Tuhke ahno moroto kynexine xitaketomo, aorikyhpyry hnamonanomo, enara.

³⁹Morarame tapyi taka tomomyryhtao ynara tykase ynororo eya xine, —Oty katoh panaikato matou, xitãko? Xitara ehtoko. Mose orihpyra nase. Nyhnõko rokẽ nase, tykase Jezu eya xine.

⁴⁰Morarame tounohse eya xine. Mame emero Jezu a tutũtanohpose ropa toto tapyi tae. Jũ maro rokẽ tomõse toto, jumy, jeny, typoetory tõ oseruao. Enara toh tomõse aorikyhpyry enese.

⁴¹Morarame emary tapoise Jezu a. —Tarita kumi, tykase ynororo aomiry ae. “Orymo, owõko ropa,” katopo.

⁴²Morara kaxĩpo sã rokẽ tõsemãse ropa ynororo. Toytoytose ropa ynororo toehsehxo exiryke. 12me ikonopory nae kynexine ynororo. Tãkye toehse ropa jũ tomo.

⁴³Morarame ynara tykase Jezu eya xine, —Jekãtopyra ke ehtoko, tykase Jezu eya xine. —Mose kure autuhmatoko, tykase roropa ynororo.