Text copied!
CopyCompare
Sahou ta Kindrei - Mak

Mak 2

Help us?
Click on verse(s) to share them!
1Na len ra-on hamon ja, Jises eme hamon eme Kapena-um, eme ma sahou ta nyalan ndraseker, tasah iy ndrame bolo kon.
2Eme iri atukum ala le, eme ma bolo asiu aso ma reu bwe, eme asiu winiya lau bwe, ma loboho madasan aso ale. Eme Jises asehek sahou mwasin i tiri.
3Ya eme oro lau ma hahuw bwese-ei ndramak ari badan imek anya keme hawe Jises.
4Arile iri lau solo-an labai, eme oro winiyan batiyani iy bala hawe Jises bwe. Eme oro bosokei bwele-e asiu amwenen le bwele-e Jises ales udu aliy, eme oro atehei ndramak nane dah in bada nyahan tan ili andri amwenen le ta batala Jises.
5Eme Jises anyolom budon toro boto-on labai in tan, ya eme iy tiye sahou i ta ndramak nane badan imek anya, “Naduk, kandriyen tam ndra-in mari badeh, ndrasikine mara-ei ndra-au.”
6Ya eme oro lau ra-on ta leheya kandriyen tiri Juwis manyah are doh ale, ya eme oro ari ari lomondra,
7“I buku sah handru iy asehek sahou ndra-in i buku doh i ta Kindrei? Ari ndramak winiyan basikine kandriyen ndra-in bwe. Kindrei le ari, kabwe!”
8Suwi labai Jises ndratanan budon toro, eme iy tiye i toro, “Tasah handru iri budon solo-an doh udu ndrine ado?
9Katiye ki manamwun ki buku sah handru ki ta ndramak badan imek dah, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ou andrei nyahan tam ma ou adek’?
10Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai, udu bwele-e munyak dah ta tiye i ta ndramak ta mani kandriyen tan ndra-in iu.”
11Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!”
12Eme iri mari anyolom ndramak nane dah suri iy eme loken, andrei nyahan tan ma iy edek iu. Eme iri mari mani iri atur labai, ma iri atudun nyara Kindrei i buku doh, “Ahi ndra bwena bwena batou ari lakou bala buku dah bwe!”
13Ano Jises iu i hamon ja ili kapa gwa li Galili. Eme iri lau mari atukum ame hawen ma iy leheya iri.
14Ano iy edek ili, ma iy atou ndramak ari ta akohok luk ta takis, nadu Alpeyus nyaran Libai. Iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.” Eme Libai suri iy ma iy in hamon tan.
15Ano Jises manyah udu bolo asiu ta Libai. Ya iri lau solo-an ta akohok luk ta takis, ma hawe iri Juwis ale ba-en hamon ta kandriyen ta batanau ta Moses bwe, ma hawe oro lau tan ame aimon nyamon hawen. Ya iri lau solo-an ale an hamon tan.
16Eme oro lau ta leheya kandriyen tiri Juwis ma hawe oro Parasi atou Jises aimon nyamon udu hawe iri lau ta lomondra ndra-in ma hawe iri lau ta akohok luk ta takis. Eme oro tiye i toro lau ta Jises, “Tasah handru iy aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”
17Eme Jises anuhun oro, ma iy tiye toro i buku doh, “Iri lau ale babo sik bwe, iri winiyan baso-ok ndramak ta anyumor iri bwe. Arile iri lau tiri sik le badeh, aseken seben. Jo eme dah ta aseben lau mwasin le bwe. Jo eme dah badeh, ta aseben iri lau ta karei ma ta lomondra ndra-in udu tiri kasahan mwasin.”
18Udu bolo len doh, oro lau ta Jon ma hawe iri Parasi, abeles iri ta nyamon. Eme lau ra-on ame ndremenya Jises anya, “I buku sah handru oro lau ta Jon ta alomwa ma hawe iri lau tiri Parasi abeles iri ta nyamon, arile oro lau tam ja, bwe?”

19Eme Jises asumon boho oro i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! Arile, na len hamon eme, idah kameh iri kuhi iy eme len, ma na len doh, oro kameh winiyan baimon nyamon bwe.
20Arile, len hamon eme kameh, ndramak doh kameh, iri lau ta amekes kaliu i tan kuhi iy eme len. Ma na bolo len doh ale kameh oro winiyan baimon nyamon bwe.
21“Ado kanuhun. Ari ndramak winiyan bakuhi ranah kolau ha-un, ya suwidiy ja i manamunu awin malen bwe. Buku iri bwidiy i buku doh, ya iri sikine awin, kolau ha-un nane kameh bosokou, ma awin malen kameh atarah ja, eme ma munun kameh i tinan labai ja ai.
22Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen kameh tuburok, ma kohan kameh tarani ku-i me nane, ma waen kameh iu laleyah. Tasah waen ha-un badeh, ndrahunen ku-i me ha-un.”
23Ano, udu bolo len ari ta amunyau, Jises ma hawe oro lau tan adek bolo bilin ari ta wit. Eme oro lau tan abwe-eh buwa wit nane dah.
24Eme ya oro Parasi ame tiye i ta Jises, “Hei, ou anuhun! Tasah handru oro abwe-eh buwa wit na len ta amunyau? I buku sah oro ba-en hamon ta kandriyen tahi bwe?”
25Eme Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen bado ta kundruh ta lakou kabin Debit mene mesekei bwe nadeh? Jo asehek ta lakou kala Debit hawe oro lau tan aso-ok lakou tasah oro ameson.
26Ya eme iy ili bolo asiu ta Kindrei ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Lakou idoh asahan na len pris, Abiyata in ndra tinan tiri pris. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.”
27Eme ma Jises asehek sendrehendreh i buku doh, “Mesekei len ta amunyau badeh, ta aseben ndramak labai, arile bamesekei ndramak ta aseben len ta amunyau bo-oh.
28Eme ma jo Nadu Ndramak Awas, ya jo tama len ta amunyau.”