Text copied!
CopyCompare
Label Buk Baibel - Mak

Mak 11

Help us?
Click on verse(s) to share them!
1Ning la han milau e Jerusalem, pa la hanot ting e Betpage pa e Betani ting na Mangir Oliw, e Iesu i sune sen naur a kaklik kusun anuna kakak a asaerla.
2Pa i atai diau mang, “Mur han sur a hanua kaning lanigo ta mu. Ning mur han kas, mur han tar ana ning a nat a dongki kaning di dot akes tari, pa belot tik i kes pas ono. Mur pak sen pasi pa mur beni ute.
3Ning tik ir deken mu mang, ‘Sur asa ning mu toli manglarning?’ mur atai i mange, ‘A Leklek i mang kabah suri, pa ir aulak kapiti kale.’”
4Ning dia han, dia oroi tetek a nat a dongki ning di dot akes tari tumolapiu na ris a taman ana rumai, milau a ngas, pa dia pakseni.
5Dingla na tarai ning la tur tingia la deken diau mang, “Ai, mu pak sen a nat a dongki ning sur asa?”
6Dia keles la ana warwara ning e Iesu ka atong tari, pa la noreni ka tan diau.
7Dia ben tar a nat a dongki tetek e Iesu, pa dia kepsen naur a saket, pa dia suah tari saot onoi, pa e Iesu i kes ono.
8Pa a galis a tarai otleng la kepsen anunla na saket, pa la sagen tari ting na ngas. Pa dingla na tarai otleng la kuben pas a lai a rakai miting na bual, pa la suah tari ting na ngas.
9La ning la nigo pa la ning la mur, la kukuk mange, “Hosana! Esaning i hanot ana risan a Leklek i angis.’”
10“A matanitu ane tamandala e Dewit ning ir hanot i angis! Hosana usaot kol!”
11Ning e Iesu i hanot saot e Jerusalem, i kas uting na rumai a artabar. Ning ka oroi tar a ututnala rop, i ulak utumo e Betani taum ana nuna ning a bonot pa pisir naur a kakak a asaerla, anasa ka rahmorom.
12A pukakiar lamur, ning la han mitimo e Betani, e Iesu i murak.
13I oroi a rakai a fig miting bakbak, i gomgomo wakak. Pa i han sur ir oroi, sur ta wana. Ning i hanot tingia, bel i oroi ta wana ono, a pakpakana oros ka, anasa belot i taun fig.
14Pa i atai a rakai a fig mange, “Turpasi ne pa lamur, bel tik ulak ma ir ien pas ta waim.” Pa anuna kakak a asaer la longor akes pas a warwara ning.
15Ning la hanot saot e Jerusalem, e Iesu i kas ana ning a pukna miting na rumai a artabar, pa i kepsen purum la ning la sisiurai, pa la otleng ning la lolou tingia. I minggen lingir a logola anuna tena keles mani pa a keskes anunla ning la siuran a tabunla.
16Pa bel i noren tar a taraila sur lar los anunla ututnala na sisiurai ting na arpotor ana rumai a artabar.
17I asaer la mang, “Di ka tumus tari ting na Buk Tabu manglarne, ‘Dir atong anuka rumai mang a rumai a nunung sur a taraila miting na matanitu rop.’ Ika mulo ka tol lingir pasi sur ir arlar kama lar a ‘rumai anuna tena kinkinaula.’”
18A leklek a tena artabarla tetek e God taum ana tena asaerla tagun a warkurai otleng la longori, pa la nuknuk sur ta ngas sur lar umkol e Iesu ono, anasa la matatani, anasa a tarai rop la kulkulan ana nuna asasaer.

19Ning a rah ma, e Iesu taum ana nuna kakak a asaer la han kusun a hanua Jerusalem.
20Ana kobot ning ot, ning la ulak usaot e Jerusalem, la oroi mang a rakai a fig ka marang mitimo ot na wakwakirna usaot.
21Pa e Pita i nuk pas a warwara ane Iesu, pa i atai i mange, “Tena Asaer, oroi! A rakai a fig ning u warwara rakrakai tar teteki, ka marang rop.”
22E Iesu i kelesi mange, “Mulor tortorot o e God.
23A atong momoli ta mulo, ning tik ir atai a mangir ne mange, ‘Ur takakan, pa ur sirok parung usa latasi,’ pa bel i urmatana nuknuk, i tortorot mang dir tol asaning ka atong tari, dir toli ot.
24Manglarning a atongi ta mulo a ututnala rop ning mulo nunung suri, mulor tortorot ka mang di ka saran tari ta mulo, pa dir saran tari ot.
25“Ning mulo nunung, pa mulo nuk pas ta utna ning tik i tol laulau tari o mulo, mulor nuk duman seni, sur e Tamamulo saot ana langit ir kepsen anumulo na toltol laulaula otleng.”
27La hanot ulak saot e Jerusalem. Ning e Iesu i taltal ana rumai a artabar, a leklek a tena artabarla tetek e God, taum ana tena asaerla tagun a warkurai pa a ningnigola la han teteki.
28La dekeni mange, “Esi na ngas a rakrakai ning u tol a ututnala ne ono? Esi i saran tar a rakrakai tam sur ur tol a ututnala ne?”
29E Iesu i keles la mange, “Iau otleng ar deken mulo ana ning a kabah. Pa ning mulor keles iau, io, ar atai mulo ana rakrakai ning a sira tol a ututnala ne ono.
30Mitahaia a baptais ning e Jon i baptais a taraila ono? Mitisaot ana langit, o tana taraila ka? Mulor atai iau.”
31Pa la warwara kumna pas mange, “Ning dalar atongi mang, ‘Mitisaot ana langit,’ ir keles dala ka mange, ‘I mangasa ning bel mulo tortorot onoi?’
32Ika ning dalar atongi mange, ‘Tana taraila,’ a tarai lar balakut dala.” La matatan a taraila, anasa la rop la tortorot o e Jon mang i a propet.
33Pa la keles e Iesu mange, “Bel mila tasmani.” Pa e Iesu i atai la mang, “Iau otleng bel ar atai mulo ana rakrakai ning a sira tol a ututnala ne ono.”