MAK 8:1-26

¹Kale kanumsa kota, unang tinum kwiin tagang iyo, asok Yesus imi weng uyo tinangkamum o age-nilipta, tala tala kelip e, imi iman uyo binim kebelu kalaa age-nalata, Yesus ilami okumop man iyo olabela tal tamip bogobe-nala e,

²“Unang tinum kalip imi nisino bii am asuno kelip koyo, imi iman uyo binimanepmu bisop albip kalaa ageta niyo i-filin-bii kuta,

³iip maak kalip iyo simanim ilo talbip kale, kanube iman tep imdali ilimi abiip iinon-temip bole, abe-bom-nilip e, iman tep iip kal du molan-temip o,” agela e,

⁴minte okumop man isiik Yesus imi bogobe-nilip e, “Tinum binim iip koyo bret uyo dogap-tele kulu-nulupta, ifelup une tii kelan-temaalip o,” agelip e,

⁵minte isiik ninggil imi daga-nala e, “Ipmi bret uyo intap kal albu o?” agela e, bogo-nilip e, “Ban kal o,” agelip e,

⁶kota Yesus iyo unang tinum iyo bogobela daak kafin diim tonip e, bret ban kal uyo kulu God iyo, “Misam o,” age-nala e, bret uyo fegela ko-nala e, ilami okumop man imi kobela ita kulep unang tinum iyo taga-em tiine-bilip e minte,

⁷ninggil iyo aniing kangkang iip maak maak iyo albip kale mungkup, Yesus iyo kulu God iyo, “Misam o,” age ilami okumop man iyo bogobe-nala e, “Aniing kaso taga-e-bom no kemin o,” agela e, taga-em tiinemip ko.

⁸Kale unang tinum iyo kulu unan-bii tii kelip e bole, okumop man iyo tebe iman un-bom-nilip tukup tukup ke-bilip uyo afeta-bii ko-nilip e, basket ulumi kup ban kal koyo abulip dongenu ko.

⁹Kale unang tinum bret so aniing so unelip bilip iyo foa tausen (4,000) umaak kalip ita unelip binimanu e bole, Yesus iyo tebe imdala daaginip e,

¹⁰kota ilami okumop man sino ninggil te tam bot tem ton-nilip e, yak Distrik Dalmanuta umi milii kutam iinip ko.

¹¹Kale Falosi iip maak maak iyo tal Yesus so wengaal digin-bom dup-kugu-bom bogobe-nilip e, “Kabaa. Kabo mirakel ko age kuguup ugulumi migik umaak kafalebelapta, nuyo utamupta e, kabo God yagal kamdala ti-salap kalaa agelum o,” agelip e,

¹²imi aget tem uyo iluum tebepmu bogobe-nala e, “Ibo bogopne-nilip, ‘Mirakel ko age kuguup ugulumi migik umaak kanubelapta, utamum o,’ age dagagamin ba ko. Kale niyo ibo weng uyo dam bogobelan o ageta kale, kanupmin aget fugun-bilip tinum ibo niyo mirakel ko age kuguup ugulumi migik fen-bilip bomaak kanubeli utaman-temaalip o,” age-nala e,

¹³kota Yesus iyo asok unang tinum iyo kugol imkala e, ilami okumop man iso ninggil tam bot tem ton-nilip e, daage yak ok muk milii kutam iinip ko.

¹⁴Kale Yesus imi okumop man ninggil iyo bret uyo ilumano kutu-nilip e, bret maagup uta kup bot tem ilep kwep tilip kale,

¹⁵Yesus iyo weng kem uyo felep yak ku to do weng maak bogobe-nala e, “Nugumal ibaa. Ibo Falosi so Herot so imi yiis ko age tukolip bret fitimin umi mufekmufek uyo tele utama-bom kupkek kupkek kem tiine-bom-nilipta o,” agela e,

¹⁶ninggil iyo Yesus imi do weng bogola bomi magam uyo utamin-tem ke-nilip e bole, ninggil igil tegen-bom-nilip e, bogolip, “Nuyo bret binim kalaa age-nalata, yiis bomi sang uyo bagan-be bele o?” agan-kalip e minte,

¹⁷Yesus iyo boyo utam-nala e, ninggil bogobe-nala e, “Intaben o age-nilipta, ibo bogo-nilip, ‘Nuyo bret binim utamta, kam agan-be o,’ agan-bilip a? Ipmi aget tem uyo ilum ilum bii kopmuta, ibo utamipta e, yiis umi sang ugo ba kale, mufekmufek migik umi sang uta bagan-be kalaa ageta utam dagaa kulin-tem albip aga?

¹⁸Ibo tiin so e minte tolong so kuta, utama-bom e minte, tolong do no ke bam daalin-tem aga? Siin uyo bret ogal fegela kobeli ipkil kulu tinum ilimi kup faiv tausen (5,000) kalip imi ifelip un-bom tukup tukup kemsip uyo, ibo basket uyo intap kal abu-silip a? Ibo ilumanobip aga o?” agela e, isiik bogobe-nilip e, “Tuluun kal abu-sulup o,” agelip e,

²⁰asok maak so ninggil imi daga-nala e, “Asok aaltam komi bret ban kal fegela kobeli ipkil kulu unang tinum ilimi kup foa tausen (4,000) kalip imi ifelip un-bom tukup tukup kemsip uyo, ibo basket uyo intap kal abu-silip o?” agela e, bogobe-nilip e, “Ban kal abu-sulup o,” agelip e,

²¹Yesus isiik bogobe-nala e, “Ibo kanubeli utam-silip boyo, intaben o age-nilipta, nimi titil boyo tele utamin-tem ke-silipta, aget yamyam uyo fugun-bilip o?” agan-kala ko.

²²Kale Yesus ninggil iyo daage no abiip Betsaida ko no tamip e, abiip kasel iyo tinum maak tiin bigibesu iyo dep tal Yesus imi bogobe-nilip e, “Tinum keyo kapmi sagaal umaak togobelapta, imi tiin uyo tambalanepmuk o,” agelip e,

²³Yesus iyo tinum tiin bigibesu iyo abiip uyo kupkaa sagaal kegal aafuu duptamo yang tiginal kweng iinom-nala e, tiin tem uyo mok togobe sagaal togobe-som-nala e, daga-nala e, “Kabo kek fen mufekmufek umaak utamap bele ki?” agela e,

²⁴tiin baa-nala e, bogola ko. “Niyo mufekmufek umaak tele utamanbaali kale, tinum iip maak maak iyo itaman-bii kuta, bilip iyo at ko agan-bilita, tiine-bilipta, kota tinum umdii ko tiinan-bilip kalaa agan-bii o,” agela e,

²⁵asok Yesus ilami sagaal alop kano kulep yak tiin diim uyo togobela e, kota tiin daga-bom-nala e, fomtuup utamata e, nimi tiin uyo asok tambalanepnelu kalaa age-nala e bole, alugum mufekmufek uyo tambaliim kup utama kalaa age-nala e,

²⁶Yesus iyo tebe tinum beyo daala ilami am iinak o agan-som-nala e, bogola ko. “Kabo yang abiip uyo, ‘Niyo tambalani o,’ age alugum iyo kafalebelap katamamin ba o,” agela e, am iina ko.