Maga 1

1

2

3

4

5

6

7

8

9

10

11

12

13

14

15

16

¹Godeïe malö Yesu Gelesoïe Ado Mala Hedabi dafidi mi gäwi amo gowe.

²Godeïe ado säla ïlo Aisaeaea dafidi bea säla ïe bebagi ado gowe dëdëla negei amo dialea. Nïe ado säla ïmolö, gaula awäse amomada dïe idi fodolasimäia ema dafidimola sämolömelë.

³Sege nafade udia dolö aligisia made ami nea afädëa wesalea sähalea, Dafidilo Geloi misiäia idi daiala hamogimalo. Ïe idi amoda mogola fodolasimalola säha neamelëla säi amo dëdëla negei dialea.

⁴Amala dëdëla negei dibe amo gadola sege nafade udia dolö aligisia made ami ödägi gelo Yone misi. Ea maala nea sähalea, Nafade hamoi amo Godea hëmäia dili iso asigi besumalo. Amalahilä iso asigi besui amoda ödägi gemolö dialeala säla ïaha nelo.

⁵Udia dolö yafie Yudia sege gaamu holöfalï holöfalï dibea amilage Yalusalemelage sulubadela nelo amoli e neebea ami maala gedoi. Maalahilä ilia nafade hamoi amo sisiaha maadesebegi, Yonea ili Yodona ödägi gei.

⁶Yone eda sugua gamele hilïa fagulo hamoi amo salugalahilä sugua gafodo gadoi malibu negela nelo. Eada galiawage äwiïe ödäge naha nelo.

⁷Ea ado mala sähalea, Ne dafidi misi neawe. Hobea ne baagia afädë moholömelë. Ne holöfalï neebewe gadoi made eda ilibia edefade neebe amo moholömelë. Na ïe emo usililo ëfë gumusula dialea fisigämolö dofea made neawe.

⁸Na dili ödäea gesa neawe, ea Godeïe Gesamia dili gesa namolömelëla säla ïaha nelo.

⁹Segeyo afädë amo galamu Yesu e Galili segeïe gaamu Nasalesela maasebegi, Yonea Yesu ödä Yodonagi gei.

¹⁰Yesu ödägi gela ödägila agesua fodolo aliga adogoi amole, mu dusuia gase amo melï. Amala dusuia gasebegi, Gesami haea maliabu gadoi digalahilä ema fisebe amo melï.

¹¹Beaha nebegi, selesaia mosöalahilä ado säia idogosalea sähalea, Nïe malöfalïe, na di boba hamolahilä dima obeägï edefademalä neawela säi.

¹²Ado säha maadesebegi, Godeïe Gesamia Yesu sege nafade udia dolö aligisia made ami mosaloi.

¹³Amala sigi awäla ifosisebegi, e ami segeyo nabülasi biyidia nelo. Yesu neebea ami mugabe Saidania ea nafade hamomabelela fedogola bimolö misi. Yesu sugua ilaba elö elöi neebea ami nebegi, selesaia fiia e ugila negemolö misi.

¹⁴Yone nafodola negei nebegi, Yesu e Galili awälahilä Godea Beaha Maadela Sigi Neebe amoïe Ado Mala Hedabi säla ïaha nelo.

¹⁵Yesuea sähalea, Segeyo daiala negei dilo amo walio gogi gausiala digasebego. Godea Beaha Maadela Sigi Neebea ami namolö amo ga madefalï dialeamelë. Dili asigi besula Ado Mala Hedabi gomu gaula mogomalola säla ï.

¹⁶Yesu e Galili oeabo agesu amogi awäha nea beahamelebe seme digiilo dolö äudä Saimonoge ïe edoo Ädulule seme selëgë digiisa neebe melï.

¹⁷Bealahilä Yesuea elema sähalea, Ne awäsewe gadola bëgëla misië. Alia udia dolö nimäia. Na alima neala oleledeläla säi.

¹⁸Amala säsebegi, elea fodolofalï selëgë negesilahilä e bëgëla asi.

¹⁹Yesu e holöbö sedade awälahilä beahamelebe Sebediïe malö Yemesege ïe edoo Yone dudaia nea selëgë hamogisa neebe melï.

²⁰Bealahilä fodolofalï ele wesebegi, elele eedo Sebedige bidi nimolö hamoi hamosa nefolalo amolige dudaia amilahilä ele Yesu bëgëla asi.

²¹Ili Gabaniama beselagalalahilä salea. Segeyo Sabada gafegi Yesu e gedolo mosöa awälahilä ea mala säla olelesa nelo.

²²Mala dawadigi amolia säla olelelo amo gadola made, Yesuea geloi gaulahilä, geloi hïdo elöi olelesebegi, udia dolö sefolalo amolia nabalahilä ili asigigi fudugisa sefolalo.

²³Segeyo amo gala amala olelesa nebegi, dolö mugabe fedai afädë gedolo mosöa ami maala sulo amea üalalahilä sähalea,

²⁴Nasalese dolö Yesuo, nilï neebea wida dia abilia hamodelä misi. Nilï nufudadigidelä misile. Dida na dawa. Dida dolö mogoi hedabifalï Gode hï e neebeala misimelëla säi.

²⁵Amala säsebegi, Yesuea mugabe amoma nemola sähalea, Adomabu. Dolö go dïgïlahilä hä mosöla säi.

²⁶Amala säsebegi, mugabe amea dolö amo neala amulämelasilahilä üalalahilä doadigila asi.

²⁷Amala hamosebegi, udia dolö sulubadela sefolalo amolia fudugilahilä hilidomu sëdäwala säla didigala sähalea, Walio hamoi amo edodu. Mala gähe amo gabu. Walio dolö goea ado säi amoda geloi hïdo elöi gelola säimelë. Ea mugabema säseda, mugabea nabala hamolo gabula säi.

²⁸Yesuea hamoi amo udia dolö Galilimadi nefolalo amoli sulubadelaea nabala didigai.

²⁹Ili gedolo mosöa amila doadigila fedala Yemese Yonelebalä awäla Saimono Ädululele mosöa beselagalai.

³⁰Saimonoïe esöa hëgï olo oloi dibegi ilia Yesu maasebegi, ema fodolofalï säla ï.

³¹Säla ïasebegi, Yesu e udia oloi dibea ami awälahilä ea naabogi neawela nowela ifosi. Amala hamosebegi, hëgï dafidi dilo amo hogosa helela wahilahilä udia amea ili molö muäia neala ï.

³²Deadi eso digase gaalu, udia dolö nefolalo amolia oloi difolalo amo neala gaula, mugabe fedai nefolalo amoge sigi gaulala Yesu neebea gegedoi.

³³Udia dolö ami nefolalo amoli sulubadela maala mosöa nogila digalo idi galo mia ami gegedola nefolalo.

³⁴Amala hamosebegi, Yesuea udia dolö yafie olo elö elöla oloi dilo amo wahiladigi, mugabe fedai yafie nefolalo amo nesiladigiladigisa nelo. Amala hamosebegi, mugabe amolia Yesu eda gowe neala dawadigi nefolalo. Amalebeda Yesuea mugabe amolima sähalea, Dilia sämabula säi.

³⁵Segeyo sagala digaia made Yesu e yosefalï doadigila awälahilä udia dolö aligilo made dibea ami Godema adosa sulo.

³⁶Saimono ebalä nefolalo amolia Yesu e hohogola hobeala bëgëi.

³⁷Beagolelahilä ema sähalea, Neebe amoli sulubadelaea di hogosa neamelëla säla ï.

³⁸Amala säla ïasebegi, Yesuea säla obëgësalea, Sege gaamu ga made dibea ami ado mala oleledelä afiadi. Neda hamoi amo hamomolö misimelëla säi.

³⁹Amala sälahilä Galili sege sulubadelamadi nawesa nea gedolo mosö neebeadi ami awälahilä Yesuea ado mala säla oleleladigi, mugabe fedai nefolalo amoli nesiladigisa nelo.

⁴⁰Amala hamosa nebegi, dolö gudubu hamoi afädë Yesu neebea ami maalahilä emo gumu sasagala fia idogola salea sähalea, Dia ne wahimäiala helësëseda, hä dia ne wahilasimolöi nebegola säi.

⁴¹Amala säsebegi, Yesuïe isogi edefademalä bobasëmolöea nobalahilä, ïe naabo mogodigia gala, dolö amo diigisalea sähalea, Na amala helësësa, wahimola säi.

⁴²Amala hamosebegi, gudubu hamoi amo fodolofalï hogosa helelahilä wahii.

⁴³Yesuea dolö amo fodolofalï mosalola sälahilä amoma gelolafalï sähalea,

⁴⁴Dofä asiala elöma säloeo. Di wahii go odoama säla ïmabio. Gobela ïlo dolö neebea ami di siia bimäia olemolö mosalo. Amalahilä, di wahii go ilima olemolöïe, Mosesea säla negei dibe amo gadola nelebo afädë odala ïmalola säla ï.

⁴⁵Amala säla ï amo nabalahilä gaso, dolö amea awäha nea hamoi amo säla ïïa awäha nelo. Amala säsebegida Yesu e gaamu dibeadi amogi ilile siigi moholöi made beala udia dolö maadeido gasi gala nelo. Amala nebegi, udia dolö yafie sege dibe sulubadelagila Yesu e neebea ami mafusa nelo.