Luku 9:3-31

³Ɩlɛnɑ ɩ tɔ-wɛ sɩ: Ye ɩ́ tɛɛkɩ ɩ́ tɑɑ kpɑɣɑ pʋlʋ, pɑɑ kpɑ́tʋ́ɣʋ́, pɑɑ huluɣu, pɑɑ tɔɣɔnɑɣɑ, pɑɑ liɣitee, pǝ́cɔ́ ɩ́ tɑɑ kpɑɣɑ cɑpɑnɑɑ kɛ nɑɑlɛ nɑɑlɛ.

⁴Ye ɩ́ tɑlɑ timpi nɑ ɩ́ lɑɑlɩ nɑ ɩ́ sʋʋ tǝyɑɣɑ ŋkɑ kɑ tɑɑ, ɩ́ sɑɑlɩ tǝnɑ hɑlɩ mǝ tɛɛʋ.

⁵Nɑ ye ɩ́ tɑlɑ timpi nɑ yǝlɑɑ ɩ́ tɑ mʋ-mɛ, ɩ́ lɩɩ nɑ ɩ́ kpiisi-wɛɣɛ mǝ nɔɔhɛɛ mʋsʋɣʋ, nɑ pǝ́ hʋ́lɩ́ sɩ ɩ́ lɑpɑ-wɛɣɛ tɔʋ, ɩ́ yele.

⁶Ḿpʋ́ɣʋ́ pɑ tɛɛwɑ nɑ pɑ́ cɔɔkɩ ɩcɑtɛ ɩcɑtɛ nɑ pɑ́ heeliɣi Lɑɑpɑɑlɩ Kʋpɑŋ, nɑ pɑ́ wɑɑsǝɣɩ kʋtɔntʋnɑɑ kɛ pɑ kʋtɔmǝŋ.

⁷Wulɑʋ Helɔtɩ nɩɩ pǝ tǝnɑ mpi pǝ tɔŋɑ lɑpʋ kɛ mpʋ tɔ, ɩlɛnɑ pǝ liɣiti-ɩ sɔsɔm, ɩ tɑ nyɩ ɩsǝnɑ ɩ́ lɑ tɔ. Pǝ tɑɣɑ pʋlʋ, lɛlɑɑ nɑ́ tɔŋɑɣɑ kɛ́ sɩ Yohɑɑnɩ wei pɑɑ kʋwɑ tɔ ɩnɩ ɩ femnɑ.

⁸Lɛlɑɑ sɩ Ilii lɩɩnɑ. Hɑlǝnɑ lɛlɑɑ sɩ Ɩsɔ kʋyɔɣɔtʋtʋ tɛlǝsǝlɑɑ kʋpǝmɑ tɑɑ nɔɣɔlʋ lɩɩnɑ.

⁹Ɩlɛnɑ Helɔtɩ sɩ: Mɑ yelɑɑ nɑ pɑ́ sɛtɩ Yohɑɑnɩ nyʋɣʋ ɩlɛ, ɑweɣelɛ pʋntʋ wei ɩnɩ ɩ tɔm mɑ nɩɩ pɑ yɔɣɔtǝɣɩ ɩsǝntɔ tɔ? Hɑlǝnɑ ɩ́ pɛɛkǝɣɩ sɩ ɩ́ nɑ-ɩ.

¹⁰Yesu Tillɑɑ kɔmɑ pɑ́ mǝlɩ Yesu kiŋ, ɩlɛnɑ pɑ́ kɛɛsɩ-ɩ pǝ tǝnɑ mpi pɑ lɑpɑ tɔ. Ḿpʋ́ɣʋ́ ɩ kpɑɣɑ-wɛ nɑ ɩ́ ponɑ-wɛɣɛ kpeeŋɑ kɛ ɩcɑtɛ nte pɑ yɑɑ sɩ Pɛtɛsɑitɑ tɔ tǝ kiŋ.

¹¹Pɑɑ nɑ mpʋ tɔ, sɑmɑɑ nɩɩwɑ nɑ pɑ́ hu ɩ wɑɑlɩ, nɑ ɩ lɑŋlɛ hʋlʋmǝnɑ pɑ kɔntɛ. Nɑ ɩ́ heelɑ-wɛɣɛ Ɩsɔ Kɑwulɑɣɑ tɔm, nɑ ɩ́ wɑɑsɩ pɑ tǝnɑ mpɑ pɑ fɛɩnɑ ɑlɑɑfǝyɑ tɔ.

¹²Pǝ kɔmɑ nɑ ilim cɑɑ tɛm, ɩlɛ ɩ ɩfɑlɑɑ nɑɑnʋwɑ nɑ nɑɑlɛ kɔmɑ ɩ kiŋ ntɛ́, nɑ pɑ́ tɔmɩ-ɩ sɩ: Tɔɣɔnɩ sɑmɑɑ ɩnɛ ɩnɩ nɑ ɩ́ polo ɑcɑlɛɛ tɑɑ nɑ pǝ cɔlɔ cɑcɑkǝŋ tɛɛ nɑ pɑ́ hiki tǝsʋʋlɛnɑɑ nɑ tɔɣɔnɑsɩ. Pǝ tɑɣɑ pʋlʋ, cǝnɛ kɛ́ nyɩɩtʋ tɑɑ kɛ́.

¹³Ḿpʋ́ɣʋ́ Yesu cɔwɑ sɩ: Mɩɩ hɑnɑ sɑmɑɑ ɩnǝɣɩ tɔɣɔnɑɣɑ kɛ mǝ mɑɣɑmɑɣɑ. Tǝnɑɣɑlɛ pɑ cɔ-ɩ sɩ: Ntɔŋ potopotonɑɑ kɑkpɑsɩ nɑ tiinɑ nɑɑlɛɣɛ tǝ wɛnɑ yɑɑ? Yɑɑ n cɑɑ sɩ tɑ́ɑ́ yɑnɑ tɔɣɔnɑɣɑ nɑ tǝ cɛlɑ sɑmɑɑ tuutuumɑ ɩnɛ ɩ tǝnɑ?

¹⁴Apɑlɑɑ kɑ wɛ ɩsɩɩ yʋlʋpee iyisi kɑkpɑsɩ (5000) kɛ mpʋ. Ḿpʋ́ɣʋ́ Yesu heelɑ ɩ ɩfɑlɑɑ sɩ: Ɩ́ cɑɣɑsɩ-wɛɣɛ tintikɑ tintikɑ ɩsɩɩ yʋlʋpee nɩɩlɛ nɑ nɑɑnʋwɑ nɑɑnʋwɑ.

¹⁵Ɩlɛnɑ Yesu ɩfɑlɑɑ nɩɩ ntɩ nɑ pɑ́ cɑɣɑsɩ pɑ tǝnɑ tǝmɑm.

¹⁶Tǝnɑɣɑ Yesu kpɑɣɑ potopotonɑɑ kɑkpɑsɩ nɑ tiinɑ nɑɑlɛ ɩnɩ, nɑ ɩ́ teki ɩ ɩsɛ nɑ ɩ́ sɛɛ Ɩsɔ kɛ́ ɩ nɑ tǝmlɛ. Ɩlɛnɑ ɩ́ fɑɣɑ-wɛ nɑ ɩ́ cɛlɑ ɩ ɩfɑlɑɑ sɩ pɑ́ tɑlɑ sɑmɑɑ ɩnɩ.

¹⁷Ḿpʋ́ɣʋ́ pɑ tǝnɑ pɑ tɔɣɑɑ nɑ pɑ́ hɑɣɑ. Hɑlǝnɑ pɑ́ tɔɔsɩ hɔɣɔlɑsɩ kʋkpisɑsɩ kɛ tɔkǝŋ nɑɑnʋwɑ nɑ nɑɑlɛ.

¹⁸Kʋyɑkʋ nɑkʋlɩ Yesu sǝlǝmɑɣɑ Ɩsɔ kɛ́ ɩ tike kɛ kpeeŋɑ. Ɩlɛnɑ ɩ ɩfɑlɑɑ polo ɩ kiŋ. Ḿpʋ́ɣʋ́ ɩ pɔɔsɑ-wɛ sɩ: Yǝlɑɑ tɔŋ sɩ mɑ kɛ́ ɑwe?

¹⁹Ḿpʋ́ɣʋ́ Yesu ɩfɑlɑɑ cɔwɑ sɩ: Pɑ tɔŋ sɩ Ɩsɔ lʋm sɔlʋ Yohɑɑnɩ, nɑ lɛlɑɑ sɩ Ilii, nɑ lɛlɑɑ sɩ Ɩsɔ kʋyɔɣɔtʋtʋ tɛlǝsǝlɑɑ kʋpǝmɑ tɑɑ nɔɣɔlʋ lɩɩnɑ.

²⁰Tǝnɑɣɑ Yesu pɔɔsɑ ɩ ɩfɑlɑɑ sɩ: Nɑ mɛ se, mǝ hʋʋkɩ sɩ mɑ kɛ́ ɑwe? Ḿpʋ́ɣʋ́ Piyɛɛ nɔɣɔ tǝkpɑʋ sɩ: N kɛ́ Ɩsɔ Mesii.

²¹Tǝnɑɣɑ Yesu kpɑɑlɑ-wɛɣɛ teu sɩ pɑ́ tɑɑ heeli-tǝɣɩ nɔɣɔlʋ.

²²Ḿpʋ́ɣʋ́ ɩ heelɑ-wɛ tɔtɔ sɩ: Yʋlʋ Pǝyɑɣɑ mɑ́ mɑɑ tɔɣɔ kʋnyɔŋ kɛ sɔsɔm. Nyʋɣʋ nyǝ́mɑ nɑ kɔtǝlɑɑ sɔsɑɑ nɑ Ɩsɔ Tɔm sɛɣɛsǝlɑɑ kɑ́ lɔ-m, hɑlɩ pɑ́ kʋ-m. Amɑ mɑɑ fe kʋyɛɛŋ tooso wule.

²³Ḿpʋ́ɣʋ́ Yesu tɑsɑ pɑ tǝnɑɣɑ heeluɣu sɩ: Wei ɩ cɑɑ sɩ ɩ́ tǝŋɩ-m pʋntʋ ɩ́ lɑ ɩ tǝɣɩ ɑwusɑ, nɑ ɩ́ sǝɣǝlǝɣɩ ɩ sǝm tesikɑ kɛ pɑɑ ɩfemle nte, nɑ ɩ́ tǝŋǝɣǝnɑ-m.

²⁴Pǝ tɑɣɑ pʋlʋ, ye wei ɩ pɛɛkǝɣɩ ɩ weesuɣu tǝcututu, ɩ tɛŋnɑ sǝpʋ. Amɑ wei ɩ́ lɑpɑ ɩ tǝɣɩ ɑwusɑ kɛ mɑ tɔɔ, pʋntʋ kɑ́ hikinɑ weesuɣu.

²⁵Ye yʋlʋ pǝsɑɑ nɑ ɩ́ hiki ɑntulinyɑ nyǝm tǝnɑ, nɑ ɩ mɑɣɑmɑɣɑ ɩ́ wɑkǝlɑɑ, yɑɑ ɩ lɑpɑ yem, leɣelɛ pʋntʋ kɑsǝyɑɣɑ ɩlɛ?

²⁶Ye wei ɩ sǝpɑ mɑ fɛɛlɛ yɑɑ mɑ kʋsɛɣɛsǝtʋ fɛɛlɛ, Yʋlʋ Pǝyɑɣɑ mɑ́ mɑɑ sɩ pʋntʋ fɛɛlɛ tɔtɔɣɔ wɑɑtʋ wei mɑɑ kɔnnɑ mɑ teeli nɑ mɑ Cɑɑ nyǝŋ nɑ mɑ ɩsɔtɑɑ tillɑɑ nɑŋŋ nyǝ́mɑ nyǝŋ tɔ.

²⁷Tɑmpɑnɑ kɛ mɑ heeliɣi-mɛ, mpɑ pɑ wɛ cǝnɛ tɔ pɑ tɑɑ nɑpǝlɩ kɑ́ nɑ́ Ɩsɔ Kɑwulɑɣɑ nɑ pǝ́cɔ́ pɑ́ sɩ.

²⁸Ɩ tɛmɑ tɔm ntǝɣɩ yɔɣɔtʋɣʋ nɑ kʋyɑkʋ siki kɛ́ ɩlɛnɑ ɩ́ kpɑɣɑ Piyɛɛ nɑ Yohɑɑnɩ nɑ Sɑɑkɩ nɑ pɑ́ kpɑ pʋɣʋ tɔɔ kɛ́ Ɩsɔ sǝlǝmʋɣʋ.

²⁹Ɩ tɔŋnɑ sǝlǝmʋɣʋ, ɩlɛnɑ ɩ ɩsɛntɑɑ lɑɣɑsɩ, nɑ ɩ wontu hʋlʋmɩ, hɑlǝnɑ tǝ tee kɔkɔ kɛ sɔsɔm.

³⁰Tǝnɑɣɑ pɑ tutɑ ɑpɑlɑɑ nɑpǝlǝɣɩ ɩ kiŋ kɛ nɑɑlɛ nɑ pɑ́ nɑ-ɩ pɑ́ yɔɣɔtǝɣɩ. Apɑlɑɑ mpɛ sɛsɛ Moisi nɑ Ilii kɛlɛ.

³¹Mpɛ pɑ kɔmnɑ nɑ ɩsɔtɑɑ teu sɔsɔɔm, nɑ pɑ́ yɔɣɔtǝɣǝnɑ-ɩ ɩ kpente nte tǝ cɑɑ Yosɑlɛm kɛ lɑpʋ ɩsɩɩ Ɩsɔ kɑ sɩɩwɑ tɔ tǝ tɔm.