Lucangundru 9:3-31

³Ja Nau tanangu jatana wonti: “Panila paltuni manianimai; wata wonapita, wata billi, wata buka, wata mardatandra; jura bakana wata kati mandru ngamalkananto.

⁴Ja mina pungani jura matja wirina, naka ngamanimai, ja nakandru wirarianimai.

⁵Ja worderuntjali jurana wata patala nganai, nunkangupini ngurandru dunkanimai, ja bakana puturu jurani tidnandru kantikantianimai malka nganala tanangu.”

⁶Tana wapana kurana wonti, ja ngura kulno ja kulnuni palkingana wonti, paruparu ngantjani jaura kaukaubala ja tepi ngankala.

⁷Herodili mitaia kapakaparali pratjana ngarana, mina nunkangundru pantjinani, nau japali nganana wonti, ngangau palpa jatana wonti: “Johannes narindru matja jiritjina.”

⁸Palpa: “Elias wondraterina warai;” palpa: “Propheta kulno warula narindru matja jiritjina.”

⁹Ja Herodes jatana wonti: “Nina Johannes mangatandra ngato wokaribana paraia: ja worana Naupini nganai, nunkangundru ngato jenia ngarai?” Ja nulu ngantjana wonti nina najila.

¹⁰Ja Apostela matja tikana, tanali nunkangu kaukau bana wonti, mina pirnala tanali ngankanala; ja Nulu tanana tjirimalkana wonti, ja ngura kulnuja, tala nunkani Bethsaida kutingana wonti.

¹¹Kana wolarali jenia ngujamana, tana nunkangu karipaterina wonti; ja Nulu tanana patana wonti, ja tanangu Godaia mililandru kaukaubana wonti, ja kana muntja Nulu tepi ngankana wonti.

¹²Ditji kunarkuni mili marapratjana ja mandru nunkangu wokarana wonti ja jatana wonti: “Kana wolara jinpau, ngangau tanaia ngura pirnani ja wakani wirinanto bukaia; ngangau ngaiana ninkida pitarani nganai.”

¹³Nau tanangu jatana wonti: “Jura tanangu jinkianau tajinanto!” Tana jatana wonti: “Ngaiani ninkida windri buka ngunku mara wora ja paru mandru ngamalkai; ngaiani kara wapananto, ja tanangupini kana wolarani buka burungankananto?”

¹⁴Ngangau tana kana 5,000 nganana wonti. Nau milini nunkanani jatana wonti: “Tanaia ngamana ngarinanto witta kulno ja kulno, milingeru marapratjana pota mara wora.”

¹⁵Ja tanali jeruja ngankana wonti, ja pratjana ngamana ngarina wonti.

¹⁶Nulu buka ngunku mara wora ja paru mandru patana wonti ja pariwilpani najina tarana wonti, ja tanana ngurungutana wonti, ja tanana wokaribana wonti, ja milini nunkanani jinkina wonti, tana kana wolarani jinkinanto.

¹⁷Ja tanali tajina wonti ja jerturina wonti, ja tanali buka worduwordu kampana wonti billi marapratjana ja mandru manamiri.

¹⁸Ja jendranguta Nau kulnulu ngatjinani, mili nunkangu jurborina wonti; ja Nulu tanana jekibana wonti ja jatana wonti: “Mina kana jatai, worana ngani?”

¹⁹Tanali kalabana wonti ja jatana wonti: “Johannes multibanietja; palpa Elias; palpa jatai Propheta kulno warula matja jiritjina.”

²⁰Nau tanangu jatana wonti: “Mina jura jatai, worana ngani nganai?” Petrulu kalabana wonti ja jatana wonti: “Godaia Christus.”

²¹Nulu tanana daudauana wonti, ja tanangu jirijiribana wonti, wata kulnuni jenia kaukaubala.

²²Nau jatana wonti: “Kanaia Ngatamura pirna ketjaketjananto, ja pinaru worali ja Priesta pirnali ja jaura jinkinietjali niniaia worala nganai ja nari ngankala nganai, ja ditjini parkulani Nau jiritjila nganai.”

²³Nau pratjanani jatana wonti: “Warle ngantjai ngakangu karipaterila, nau munta panila ngundrateriatimai, ja nulu kunarku nunkani ditji pratjanani maniatimai, ja ngakangu karipateriatimai.

²⁴Ngangau warle tepi nunkani ngantjai kulkala, nulu nina tintala nganai; ja warle tepi nunkani tinkai ngakangundru, nulu nina kulkala nganai.

²⁵Ngangau jenia kanani ngumu nganai kara, nulu mita maru maninani, ja munta tintaterinani kara, nandraterinani kara?

²⁶Ngangau worananau ngakangundru ja ngakani jaurandru nintali nganai, nunkangundru bakana Kanaia Ngatamura nintali nganala nganai, Nau nunkanani, ja ngaperaia, ja angela kulikiria pirnalani wokarala nganai.

²⁷Morlalu ngani jurangu jatai: Tanangundru palpa, ninkida terkala wapaia, tanalipini nari wata wontjala nganai, tanali Godaia milila najinantulu.”

²⁸Jendranguta Nulu tanapini jaura matja mudana, ditji mara wora ja parkulani, Nulu Petrus ja Johannes ja Jakobus patana wonti, ja mardawonpaia tarana wonti ngatjila.

²⁹Ja Nau ngatjinani, mudla nunkani njeranjerarina wonti, ja kati nunkani bulurina wonti ja kintjalkururina wonti.

³⁰Ja mai, kana mandra nunkangu ngankamalina wonti, pudla Moses ja Elias nganana wonti.

³¹Pudla pirnalali wondraterina wonti, ja mudana nunkani kaukaubana wonti, nina Nulu morlalu ngankananto Jerusalemini.