Luuka 9:3-31

³Khuwooza yoori: “Mwilawaka mwihithuule hatha etthu, wala pakhora, wala mfukho, wala phaawu, wala nzurukhu, wala ajapi yaphiiri.

⁴Nyuupa ethiito mwinttelaaye opokhereliwa, mwimake attaapho mpakha olaavo.

⁵Amana mwihipokhereliwi saana, mwilaakamo nsitati mwaya mpho mwitathe lifufu la mmoolu mwenu khwa oshaahiti waya yo.”

⁶Aphano yo khulankha khusala alawa aviraka mmamiti alaleyaka hapari zooshapweya na awaavonisaka alwele wakhula phantte.

⁷Nsatoro Herooti khusiila vitthu zaari orettikhanaazo ye khwiiya wootikinisiwa mwaasa atthu akina aari olupa yoori Yaahaya ti ye asisimuwiye muufwa.

⁸Akina aari olupa yoori Aliyaasi ti ye awaapuweleliye, akina aari olupa yoori oto napiyu mmote wa raku eetta osisimuwa.

⁹Ila Herooti khulupa yoori: “Yaahaya miiyo kaarumiye yoori ashijiwe, khi oto kininsiilaaye alupiwaka na anrettaaye vitthu epo ti paani?” Khusala atakhacha yoori amoone.

¹⁰Maaswihaapa apale n'ooruti khumuuza Yinsa zooshi aarettaziyeezo. Aphano, ye khuwaathuula khusala alawa sitati moote yaari wiitthiwaaye Betesayita.

¹¹Ila khuntti ya atthu n'oojuwa khusala anlotta. Ye khuwaapokherela khusala awooza monkoni woofwalume wa Nnyizinku na awaavonisaka apale aari ohithajiyaaye ovonisiwa.

¹²Njuwa leettelaka oveva, apale khumi na awiri khumwaattama Yinsa khumuuza yoori: “Owooze atthu apa alawe mmamiti mpho amake eekesaka etthu-yoojiwa, maana mphu niriimo makuluttu.”

¹³Ye khuwaajipu yoori: “Mweeyeena mwiwenkhe etthu-yoojiwa.” Yo khunjipu araka: “Niriinaaye apha, phaawu thaanu na swi piiri paasi, woohiiyi olawa wuuzanya etthu-yoojiwa khiniwaafiyela atthu ooshi apa.”

¹⁴Alume aariivo aari etthu ya alufu thaanu, ila ye khuwooza anakhiyoni awe yoori: “Mwiweekhaze atthu hamusiini wakhula khuntti.”

¹⁵Yo khuretta etthiipo khuweekhaza ooshi.

¹⁶Khuthuula phaawu thaanu na swi epile piiri khweekesa otulu, khuparikhiya khumeya khuwenkha anakhiyoni awe yoori awaawanyeze atthu apale.

¹⁷Ooshi khuja khurupala, epile zaasaliiye khulokottheliwa khwiitaala khelenke khumi na piiri.

¹⁸Siikhu moote, Yinsa eetta olompa otthwe, anakhiyoni awe ari kharipu, nawiisha khuwoozela yoori: “Atthu anri miiyo ki paani?”

¹⁹Yo khunjipu yoori: “Akina anri weeyo o Yaahaya Namoosa, akina Aliyaasi, akina theenya anlupa yoori weeyo o napiyu mmote wa raku weetta osisimuwa.”

²⁰“Khi mweeyo mwinri ki paani?” Pheeturu khujipu araka: “Weeyo o Al-Masiihu wa Nnyizinku.”

²¹Yinsa khuwaahirimiza yoori vitthu epile ahimuuze hatha ntthu.

²²Khuwooza araka: “Mwaana wa Pinaatamu ona yoohoowa nkatthi wa vitthu za waatta na okatthaliwa pi anamalokozela a tiini na attunkhulu a mahaakhimu a tiini mpakha anamanozela a kano; onlawa afwe, siikhu yattaatthu asisimuwe.”

²³Khuvira awoozaka atthu ooshi yoori: “Nkhama ntthu atakha okilotta miiyo, ona yoojikatthala mwennyewe, khuvikela nsalapa awe wakhula siikhu khusala akilotta.

²⁴Amana ntthu atakha wuusuru ohaayi awe, ontta ompwetheya; ila otule onimpwetheyaaye ohaayi awe mwaasa wa miiyo, oto onteela wuusurukha.

²⁵Ona fwayita-ni ntthu opattha vitthu zooshi z'oolumwenku, ila khujipwetecha ama khujitapanya mwennyeweru?

²⁶Otule anikoonelaaye haaya miiyo na mattakhuzi aka, na Mwaana wa Pinaatamu onteela omoonela haaya mmana ataaka nnuuru mwawe na nnuuru wa Paapa na malayikha oottakatthiifu.

²⁷Kiniwuuzani khweele yoori awaapo apha akina ahinteelaaye ofwa mpakha oone ofwalume wa Nnyizinku.”

²⁸Ziviriyeevo etthu ya siikhu naane paata yoolupa mattakhuzi apale, Yinsa khunthuula Pheeturu, Yaahaya na Yaakhumpa, Ye khuwela vamwaako olawa olompa.

²⁹Alompaka etthiipile omaasho wawe khuzukuluwawo, kuwo zawe khwiiya zoolakala na za waara nkhama ozerima.

³⁰Nasaapiru khumpuwelela atthu awiri khusala attakhulana, aari Munsa na Aliyaasi.

³¹Aatiiye nnuuru ya pinkuuni khusala amuuza Yinsa khwa nanna aari weettelaazo ohoowa na ofwa Yeruzaleemu nkhama etthiipo Nnyizinku asharutheliyeeyo.