LUKA 20:14-28

¹⁴Pomwe iwo adawona mwanaceyo adalewa kuti: “Uyu ndiye mwenekaciro utaka. Mbatimupheni kuti mundayu ukhaliretu wathu!”

¹⁵Ndipo iwo adamukwekwetera kunja kwa mundayo acikamupha. “Kodi mwenekaciro mundayo an'dzawacitanyi?

¹⁶Ndipo iye an'dzabwera aciwaphambo anyakulima wentsenewo. Ndipo an'dzawatengera mundayo acipasa winango.” Pomwe adabva bzimwebzo iwo adalewa kuti: “Bzingacitike lini!”

¹⁷Tsono Jezu adawanyang'anisa aciwabvundza kuti: Bzakunembedwa bzimbalewa kuti: “Mwala omwe amisiri wakumanga nyumba adaulamba, omweyo ndiwo udadzakhala wakufunidwa kwene-kwene paphampha la nyumba.” Kodi bzimwebzi bzimbathandauza ciani?

¹⁸Munthu omwe an'gwera pamwala omweyo iye an'bzichola. Ndipo ule omwe unimugwerayo iye an'nyodoka ninga mufu.

¹⁹Panthawe imweyo apfundzisi wa ntemo na akulu wa azibaba wa ntsembe akhafuna kumumanga. Nakuti adadziwa kuti materere adatsikayo, Jezu akhalewa iwo. Tsono iwo akhana mantha na wanthu.

²⁰Ndipo iwo akhamubenda. Na tenepo adatuma wanthu anyakutapa mkanwa omwe akhabzilatiza ninga wanthu wabwino. Na tenepo iwo akhafuna kumuphata na mafala yomwe angadalewayo. Ndipo acimupereka kuna anyakutonga na kuna acikunda wa mtongi.

²¹Ndipo iwo adamubvundza kuti: “Misiri tin'dziwa kuti umbalewa na kupfundzisa bwino. Ndipo ulibe tsankhulo na wanthu. Tsono umbalewa na kupfundzisa njira ya Mulungu mwa cadidi. .

²²Kodi n'bzabwino kupima mtsonko kuna Seza aya, n'bzabwinoa lini?

²³Tsono Jezu akhadziwa kale ndzeru zawo ndipo adawatawira kuti:

²⁴“Ndilatizeni kobiri ibodzi kuno. Kodi nkhopei na dzinali n'bzayani?” Na tenepo iwo adatawira kuti: “N'bza Seza.”

²⁵Ndipo iye adawawuza kuti: “Pasani Seza bzomwe n'bza Seza. Ndipo pasanimbo Mulungu bzomwe n'bza Mulungu.

²⁶Tsono iwo alibe kukwanisa kumutapa mkanwa na bzomwe iye adatawirabzo. Na tenepo iwo adadabwa na matawiriro yaceyo ndipo adanyamaliratu.

²⁷Ndipo adabwera asaduseu winango, omwe akhalewa kuti palibe munthu ambalamuka paimpfa.

²⁸Na tenepo iwo adamubvundza kuti: “Misiri, Mozeji adatinembera mtemo kuti: 'Munthu akafedwa m'bale wace acisiya mkazi alibe wana, ndipo m'bale waceyo mbaapite nthaka kuti abalire wana m'bale wace adafayo.