1Pomwe Jezu akhali pathawale la Jenezaleti wanthu azinji akhamupsindiza kuti abve fala la Mulungu.
2Pamwepo iye adaona miyadiya miwiri yomwe ikhali m'phepete mwa madzi. Ndipo akhombwe akhadabuluka acimbatsuka bwazi bwao.
3Ndipo iye adapakira m'mwadiya wa Simau, acikumbira kuti amugwinyire panyanza pang'ono. Ndipo iye adakhala aciyamba kuwapfundzisa.
4Pomwe adamala kuwapfunzisako, iye adauza Simau kuti: “ Kathuse bwazi pa panyanza pale kuti ukamphe ntsomba.
5Tsono Simau adamutawira aciti: “Misiri, ife-pano kuphata basa usiku bwentse, tsono tiribe kuphata cinthu! Nakuti ndimwepo muli kundiwuzayu, tin'kathusa.
6Pomwe iwo adacita bzimwebzo, adaphata ntsomba zizinji kwene-kwene, mpaka bwazibo bukhafuna kung'ambika.
7Ndipo iwo adacemera na manja andzawo omwe akhali m'mwadiya winango kuti adzawathandize. Ndipo iwo adayenda acikadzaza miyadiya miwiriyo, mpaka iyo icikufunambo kulobzika.
8Pomwe Simau Pedru adawona bzimwebzire adagodama kuna Jezu aciti: “Mbuya, fundukirani pana ine-pano, thangwe ine-pano ndine nyakuphonya.
9Pamwepo iye na andzacewo, adadabwa thangwe ra ntsomba zizinji zomwe adaphazo.
10Bzidacitikambo bzibodzi-bodzibzo kuna Tiyago na Juwau wana wa Zebedeu anzace wa Simau. Ndipo Jezu adamuwuza Simauyo aciti: “Leka mantha, kuyambira lero ukhala khombwe wa wanthu.
11Ndipo iwo adakatsamisa miyadiya yawo pamcenga, acisiya bzentse, acimutewera.
12Pomwe iye akhali mumzinda ubodzi, ndipo adabwera munthu m'bodzi akhana mapere thupi lentse. Pomwe iye adaona Jezu, adabzithusa kutsogolo kwace acimudandaulira kuti: “Mbuya, penu mun'funa, mungandilimbisembo.”
13Ndipo iye adamukhuia na boko aciti: “Inde, ninfuna! Limba.” Panthawe ibodzi-bodziyo mapereyo yadapola.
14Iye adamuuza kuti aleke kuwuza munthu na m'bodziyo: “Maka akabzilatize kuna baba wa ntsembe, acikapereka ntsembe ya kupolesedwa kwaceko, ninga momwe Mozeji adalewera, kuti bukhale umboni bwawo.”
15Natenepo mbiri yace ikhabvekera kwene-kwene. Ndipo nthithi wanthu ukhabwera kuti udzabve na kudzalapidwa matenda.
16Ndipo iye akhayenda kukapemba payekha.
17Ntsiku ibodzi pomwe iye akhapfundzisa, pamwepo pakhadalambo afalizeu na apfunzisi wa ntemo. Iwo akhadacokera kumii ya kuJudeya, ya kuGalileya na ya kuJeruzalema. Ndipo mphambvu za Mbuya zikhana iye kuti alape atenda.
18Adabwerambo wanthu omwe akhadanyamula munthu wakulemala pa pamakhangala, iwo akhafuna kupita naye m'kati kuti akamutule pana Jezupo.
19Tsono iwo adasaya pakupitira naye thangwe ra kuwanda kwa wanthu. Natenepo iwo adakwira pantsodzi acikundula uswa. Ndipo iwo adamupindza na khangala lacero, pafupi na Jezu .
20Pomwe iye adaona cikhulupiro cawoco, adamuuza wakulemala ule kuti: “Munthuwe, bzakuipa bzako bzalekeredwa.”
21Tsono afalizeu na apfundzisi wa ntemo adayamba kung'ung'udzika acimbati: “Kodi mbani umweyu ali kutukwana Mulunguyu? Mbani winango angalekere bzakuipa kuposa Mulungu?”
22Nakuti Jezu akhadziwa kale ndzeru zawo ndipo adawauza kuti: “Thangwe ranyi muli kukumbuka bzimwebzi mmitima mwanumu?
23Kodi cakupusa kulewa n'ciponi kuti bzakuipa bzako bzalekeredwa ayai kuti lamuka uyende?
24Ninfuna kukulatizani mudziwe kuti Mwana wa Munthu ana mphambvu za kutonga pantsi pentse na kulekerera bzakuipa.” Ndipo iye adamuuza wakulemalayo aciti: “Lamuka, takula khangala lakoli uyende kumui.”
25Panthawe ibodzi-bodziyo iye adalamuka iwo aciwona na maso, natenepo adatakula khangala lace lomwe akhadagonerayo. Adabwerera kumui acimbapasa mbiri Mulungu.
26Ndipo wanthu wentse adadabwa, acipasambo mbiri Mulungu. Iwo adabva mantha kwene-kwene acimbalewa kuti: “Lero taona malengwa.”
27Pomwe adamala bzimwebzo, Jezu adayenda acigumana nyakupimisa mtsonkho m'bodzi, dzina lace akhali Levi, omwe akhadakhala pambuto ya kupimira mtsonkho. Ndipo adamuwuza kuti: “Nditewere!”
28Ndipo iye adalamuka acisiya bzentse, acimutewera.
29Ndipo Levi adamucitira cikondweso cikulu kwene-kwene kumui kwace. Pamwepo pakhana anyakupimisa mtsonkho azinji na winangombo omwe akhadakhala nawo patsantsali la kudyera.
30Ndipo afalizeu na apfundzisi wawo wa mtemo akhang'ung'udzikira ateweri wacewo, acimbati: “Thangwe ranyi muli kudya na kumwa pabodzi na anyakupima mtsonkho na anyakuphonya?”
31Ndipo Jezu adawatawira aciti: “Wanthu wakulimba an'funa lini mulapi, tsono wale omwe ali kuduwala.
32Ine ndiribe kubwera kudzacemera anyakulungama, tsono ndabwera kudzacemera anyakuphonya kuti akhumbule.”
33Ndipo iwo adamubvundza kuti: “Thangwe ranyi ateweri wa Juwau ambabzimana cakudya kazinji, acimbapemba? Na atweri wa afalizeumbo ambacita bzibodzi-bodzibzo. Tsono wakowa thangwe ranyi ambadya na kumwa?.
34Ndipo iye adawatawira aciti: “ Mungakakamiza anyakucemeredwa kumsinda wa malowozi, kuti abzimane kudya uko na namwali wa cimuna ali pamwepo?
35Tsono in'dzakwana nthawe yomwe an'dzamutenga namwali wacimuna, pamwepo ndipo iwo an'dzabzimana cakudya.”
36Ndipo iye adawatsikira pomwe matere aciti: “Palibe munthu omwe ambasona cigamba cipsa pa pacakubvala cakusakala, thangwe cigamba cipsaco cin'bwerera cicing'amba cakubvala cakusakalaco, nakuti cigambaco cin'bverana lini na nguwoyo.
37Palibe pomwe munthu omwe ambaikha vinyu ipsa m'mabiyau ya kale-kale. Nakuti vinyuyo imphokesa mabiayau ndipo vinyu icitaika na mabiyauyo yacipsweka..
38Tsono vinyu ipsa, mbaiyikhidwembo m'mabiyau mapsa,.
39Palibe pomwe munthu omwe ambamwa vinyu ya kale-kale acifuna pomwe ipsa, thangwe iye anilewa kuti: “Ya kale-kale ire n'jabwino.”
