San Lujc 20:14-28

¹⁴Per chi baguiaa ree bén guin laax, rëb loj lasaꞌ reeman: “Xin guinan na̱j xin yayaꞌnnë guidxliuj guin. Yagüjt reex din gacan du xieen ree.”

¹⁵Dxel babëë reeman laax loj guidxliuj guin, bagüjt reeman laax. Zianz gunabdiidx Jesús loj ree bén caneenëman, rëbaman: ―Yan, ¿xhie naladxidi güünnë bén na̱j xguidxliuj laan bén guin ree?

¹⁶Naj rni lojdi guial ziꞌtaman din gugüjtaman bén guin ree dxel gudëëman guidxliuj guin loj ree ben ren. Chi biguiejn reeman zian dxel rëb reeman: ―¡Gagnë Dios ad zajct zian!

¹⁷Per Jesús baguiaaman loj reeman, abiꞌ rëbaman: ―Bal id zajc zian ¿xhieza rën guiëb ni ca loj xtiidx Dios? Lod rëb: Guiaj ni gulëëgoꞌn ree bén rüjn yu, laan na̱j ni mazri been sirv gojcnë yu guin.

¹⁸Chutëëz bén yab guijc guiaj guin, gacaman ziꞌc tijb ni riroox, guiáad bal yab guiaj guin guijcaman, gacaman ziꞌc tijb ni ryüüdëj.

¹⁹Bixhioz rniabee ree bixhioz con ree mextr rajc ley, hor guin gajc guyën reeman niniaaz reeman Jesús guial gogbee reeman cuzaꞌtaman laa reeman, per bidxeb reeman bejn ree.

²⁰Abiꞌ guxhaal reeman bén ziglaꞌch ree laaman din güünzi reeman guial gulüü na̱j reeman benzaꞌc, din yaguiil reeman mod guiniee Jesús diidx ni gudxiib reeman guijc, din chileꞌ yayü reeman laaman loj gobernador Rom.

²¹Dxel gunabdiidx reeman lojman, rëb reeman: ―Mextr, dunujn rayagbee guial rnieel rulüü tëël ziꞌc rayal, din par lüj tiblojzi na̱j bejn, abiꞌ walil rulüül guial xhienaag rën Dios guiban bejn.

²²¿Zagdxen ya radijxan impuest loj rey César, o ad zagdxetan?

²³Per gogbee gajc Jesús xgab mal ni cayüjn reeman abiꞌ rëbaman loj reeman:

²⁴―Gol balüü tijb cintabl lon. ¿Chu loj ca lojn chu tëë laj ca lojn? Badxiꞌ reeman laan, rëb reeman: ―Loj rey César ca lojn në lajman.

²⁵Dxel rëbaman loj reeman: ―Gol badëëcliza loj rey César ni na̱j xieen César, guiáad loj Dios gol badëë ni na̱j xieen Dios.

²⁶Abiꞌ gra ni guneeman niz loj ree bejn, achetri badxejl nudxiib reeman guijc din niniaaz reeman laaman. Badxali loj reeman ni guneeman abiꞌ achetri rëb reeman.

²⁷Tioꞌp choon ree bénsaducew bignaj Jesús, bénsadusew guin ree ad rliladxt reeman guial yaban ree bengüt, zeel rëb reeman loj Jesús:

²⁸―Mextr, loj xley Moisejs rëb guial bal guiët tijb xinguiaaw abiꞌ achut xiꞌnx guyu con lacheelix, bijch xingüt guin guxhliaanë béngunaa bizëjb guin din chuꞌ xiꞌn reex ziꞌc gulüü xiꞌn xin güt guinan.