1Pomwe Jezu adamala, adayenda m'mizinda na m'mi acimbapaliza na kufotokoza nkhani ya bwino ya Umambo bwa Mulungu. Ndipo akhadayenda na ateri wace khumi na awiri,
2na akazimbo winango omwe akhadazulidwa bziwanda na kuwalimbisa matenda. Ndipo iwo akhali Maliya omwe akhacemeredwa Madalena, omwe akhadazulidwa bziwanda bzinomwe
3na Juwana mkazi wa Kuza omwe akhali m'tsogoleri wa mabasa ya Herodi, na Suzana na winangombo omwe akhamuthandiza na bzinthu bzawo.
4Ndipo nthithi wa wanthu azinji kwene-kwene udakonkhana kocekera kumizinda yentse kuti udzabve Jezu. Ndipo iye adawatsikira matere aciti:
5Na tenepo mulimi m'bodzi adakabzala mbeu yace. Pomwe iye akhabzalapo, mbeu inango idagwera m'phepete mwa njira. Tsono iyo idapondidwa ndipo mbalame zidadya.
6Ndipo mbeu inango idagwera pamwala, idamera iciuma thangwe pakhalibe nyontho.
7Inango idagwera m'minga, idamera icikula pabodzi na mingayo tsono idatutumuka.
8Tsono inango idagwera pandovolo ndipo idakula icibala bzisapo madzana na madzana. Pomwe adamala kulewa iye adathumizira pomwe kulewa aciti: Ule omwe ana makutu mbaabvesese bwino!
9Ndipo ateweri wace adamubvundza kuti: “Kodi matere yamweya yali kulewani?”
10Ndipo Jezu adawatawira kuti: “Ndiri kukulatizani bzinthu bzakubisala bza Umambo bwa Mulungu. Tsono kuna winango ndin'dzawatsikira matere kuti akanyang'anisa adzasaye kuwona cinthu. Ndipo akadzatetekera adzasaye kubvesesa.
11Kuthumbudzula kwace ni uku: Mbeu ni Fala la Mulungu.
12Ire yomwe idagwera munjira ni wanthu omwe ambabva fala, tsono angawabwerera diabu ambawatengera falalo kuti asaye kubvumira acipulumusidwa.
13Ndipo ire yomwe idagwera pamwala ni wanthu omwe ambabva fala aciritambira na kukondwa. Tsono iwo ambakhomekera lini. Nakuti iwo ambabvuma panthawe ing'ono-ng'ono, tsono akapumpsidwa ambataya cikhulup iro.
14Ire yomwe idagwera m'minga ni wanthu omwe ambabva, tsono ambadzaleka thangwe ra kufuna bzinthu bzizinji: puleja na madyaka. Ndipo iwo ambadzakhwima lini mumzimu.
15Tsono ire yomwe idagwera pamataka ya pandovolo ni wanthu omwe ana mtima wa bwino na wakulungama. Ndipo iwo akabva fala ambateweza na kulimbika. Na tenepo ambabala bzisapo bzabwino.
16Palibe munthu omwe ambaphatiza m'bvuniko aciugwanankira na mkhate, ayai aciuikha pantsi patalimba. Tsono, ambauikha padzulu kuti wanthu akapita ambawone ceza.
17Na tenepo palibe cinthu cakubisala comwe cingadzasaye kusokoloka. Napo cakubisidwa comwe cingadzasaye kudziwika ayai kuwoneka padeca.
18Tetekerani bwino! Ule omwe ana bzinthu kale an'dzapasiwa pomwe. Tsono ule omwe alibe cinthu. Napo bzing'onong'ono bzomwe ali kuyesa kuti anabzobzo an'dzatengweredwa pomwe.
19Ndipo mai wa Jezu na abale wace adabwera kuti kudzamuwona. Tsono iwo alibe kukwanisa kupita mukhana iyemo thangwe mukhadadzala wanthu. .
20Ndipo wanthu adakamuuza kuti: “Mai wako na abale wako ali panjapa. Nakuti iwo an'funa kukuwona.”
21Tsono iye adawatawira kuti: “Mai wangu na abale wangu ni wale omwe ambabva Fala la Mulungu aciliteweza.
22Pantsiku ibodzi Jezu adapakira m'mwadiya na ateweri wace aciwauza kuti: “Mbatiendeni ng'ambu inango ya thawale ire.” Na tenepo iwo adayenda.
23Pomwe akhayambukapo, iye adakhwenchedwa na tulo. Ndipo m'thawalemo mudacita conzi cikulu kwene-kwene, na tenepo mwadiyayo ukhalodzika. Pamwepo iwo akhali pa pangozi ikulu.
24Ndipo ateweriwo adakam'musa aciti: “Misiri, Misiri, tiri kulobzika!” Pomwe iye adamuka adaimisa condzico na kubvunduka kwa madziko. Na tenepo condzico cidaima na bzentse bzicikhala bwino.
25Ndipo iye adawabvundza aciti: “Kodi kukhulupirara kwanuko n'kuponi?” Ndipo iwo adabva mantha na kudabwa na tenepo akhambabvudzana kuti: “Kodi mbani omweyu? Iye ali kuimisa condzi na madziyu, ndipo ibzo bzicibvuma kuima.”
26Ndipo iwo adayambuka thawale la Galileya acifika kumphimpha ya Jeraseno.
27Pomwe iwo adatsama adagumana na munthu m'bodzi wa mundzindamo omwe akhagwa bziwanda. Ndipo iye akhambakhala pezi kuyambira kale-kale. Ndipo iye akhakhala lini m'nyumba maka m'thenje.
28Pomwe iye adawona Jezu adakuwa acibzithusa m'minyendo mwace acilewa kuti “Nandi Jezu! Kodi un'funa kundicitanyi? Nakuti ndiwe Mwana wa Mulungu wa Wakudzulu.” Ndiri kukukumbira kuti uleke kundiboneresa!
29Tsono Jezu akhadatonga kale kuti bziwandabzo bzicoke m'thupi mwa munthumo. Nakui ntsiku zentse iye akagwa ndipo wanthu akham'anga na manyolo bzikamugwa wanthu akhamumanga na manyolo manja na minyendo acimbamulindira. Tsono iye akhambabwedza manyoloyo acithawira m'thengo.
30Jezu adam'bvundza kuti: “Kodi dzina lako ndiwe yani?” Ndipo iye adatawira kuti: “Ndine Bzulu. Nakuti iye akhagwa bziwanda bzizinji kwene-kwene.
31Ndipo bziwandabzo bzidamukumbira kuti asaye kubzithothera kuCidindi.
32Pafupi na pamwepo pakhana nkhumba zikhadya m'phepete mwa kaphiri. Ndipo bziwanda bzidamukumbira kuti abzirekere bzipite munkhumbamo. Ndipo Jezu adabzireka bzicipita.
33Na tenepo bziwandabzo bzidacoka mu munthuyo bzikapita mu nkhumbamo. Ndipo nkhumbazo zidapolika zicikagwera m'thawale, ndipo zentse zicifa.
34Pomwe amakabusa wa nkhumbazo adawona bzimwebzo, adathamanga acikawuza wanthu kumzinda na m'mii.
35Ndipo wanthu azinji adakawona bzomwe bzidacitikabzo. Pomwe iwo adafika pakhana Jezupo adakawona munthu omwe akhadacosedwa bziwanda ule akhadakhala m'minyendo mwa Jezu. Ndipo adabanganuka akhadabvala pomwe. Na tenepo iwo adabva mantha.
36Ndipo wanthumbo winango omwe adawona bzidacitikabzo, adawafotokozerambo ninga mowme adalimbisidwira munthu nyabziwanda ule.
37Na tenepo aJerasenewo, adamuwuza kuti acoke m'mwemo thangwe iwo akhana mantha kwene-kwene. Ndipo iye adapakira mwadiya acibwerera.
38Ndipo munthu omwe adazulidwa bziwanda ule adakumbira Jezu kuti ayendenayembo. Tsono Jezu adamuletsa, acimuwuza kuti:
39“Bwerera! Ndoko kumui ukafotokozere andzako bzentse bzomwe Mulungu wakucitirabzi. Na tenepo iye adayenda mu mzinda acikafotokoza bzentse bzomwe bzidacitikabzo.
40Pomwe Jezu adabwererapo, nthithi wa wanthu udamutambira bwino. Nakuti iwo ukhadikhira iye.
41Na tenepo adabwera munthu m'bodzi dzina lace Jairosi, ntsogoleri wa nyumba yakupembera. Ndipo iye adabzithusa m'minyendo mwa Jezu. Na tenepo iye adamudandaulira kuti ayende naye kumui kwace.
42Nakuti mwanace wa cikazi omwe akhali m'bodziyo yekha, wa magole khumi na mawiri akhadasala pang'ono kufa. Pomwe Jezu akhayenda wanthu azinji akhamupsindiza.
43Tsono pakhana mkazimbo winango omwe akhaduwala matenda ya kumwezi, mpaka magole khumi na mawiri. Tsono palibe munthu omwe adakwanisa kumulapa.
44Ndipo iye adayenda mbuyo mwa Jezu acikhuya kumphepete kwa mkanjo wace. Panthawe imweyo matenda ya kumweziyo yadaduma.
45Ndipo Jezu adabvundza kuti: “ Kodi mbani wandikhuyayu?” Tsono wanthu wentse adagaza. Ndipo Pedru adatawira kuti: “Misiri, wanthu ali kukupsindizaniwa ndiwo akukhuyani.
46Tsono Jezu adangingimira kuti: “Alipo munthu m'bodzi wandikhuya. Thangwe ndabva kuti mphambvu zacoka m'thupi mwangumu.
47Nakuti iye alibe kukwanisa kubzibisa. Ndipo iye adabwera ali kutetemera. Na tenepo adabzithusa m'minyendo mwa Jezu, acifotokoza pakati pa pawanthu wentse kuti adamukhuiranyi. Ndipo Jezu adamulimbisa tani pomwe panthawe ibodzi-bodziyo.
48Pamwepo iye adamuwuza kuti: “Mwanangu, cikhulupiro cako cakulimbisa. Ndoko na ufulu.
49Pomwe Jezu akhalewalewapo adafika munthu kucokera kumui kwa Jairosi, ntsogoleri wa nyumba yakupembera acimuwuza kuti: “Lekani kumudedemesa Misiriyu, thangwe mwananu wafa kale.”
50Pomwe Jezu adabva bzimwebzo, adamuwuza kuti: “Leka mantha! Khulupira basi. Nakuti mwanakoyo ani limba.
51Pomwe Jezu adafika kumui kwa Jairosiko, iye alibe kubvumiza munthu winango kuti apite m'nyumambo. Maka Pedru, Juwau, Tiyago na azibaba wa mwanayo okha.
52Ndipo wanthu wentse akhalira na kumbadandaula. Tsono Jezu adawawuza kuti: “Lekani kulira, mwanayu alibe kufa tsono iye adagona.
53Na tenepo wanthuwo adamuseka thangwe akhadziwa kuti mwanayo akhadafadi.
54Ndipo Jezu adam'phata boko mwanayo acilewa kuti: “Ntsikanawe, lamuka!”
55Ndipo iye adamuka cadidi. Natenepo, Jezu adawawuza kuti amupase cakudya.
56Ndipo azibabace adasusumwa nabzo. Tsono Jezu adawapfuwa makutu kuti aleke kuuza wanthu bzomwe bzidacitikabzo.
