Luka 20:14-28

¹⁴Fala warimi ware pawammonire mwana ire, wakisowera watupu-watupu: ‘Epa kankuja mwenyé haki yakuriti masamba‑ya! Tukeni timulaye, irati‑yo iwe yetu ofwe!’

¹⁵Basi, wakinlavira panja ya masamba are, wakimulaya.” Ikisa Insa akiwadairi: “Mwenyé masamba ire warimi ware awatendaja?

¹⁶Iye akuja, awapoteza warimi‑wo, na masamba‑yo awemisira wanu wengine.” Wanu ware pawasikire javire, wamba: “Visikune javyo!”

¹⁷Fala iye kawanang'aniza wanu ware rungu-rungu, ikisa kawadairi javi: “Sambi eya Mandiko‑ya javi: ‘Riwe rawakatare wajengi ndi rilawirire kuwa riwe maalumu’, mana ake kinani?”

¹⁸Insa akizidi kusowera: “Agwiríra onse eri riwe‑ri akuwa kipande-kipande. Warisaka kungwirira eri riwe‑ri, asaika-saikanga atenda ufu.”

¹⁹Wanlimu wa shariya na wakulungwa wa dini pawasikire kinyume cire, wakisaka wanfunge Insa kwa mpunde noure, konta wejiwa kuwa Insa kankuwasutumu ewo‑po, fala wakiwopa wanu ware.

²⁰Kwa javyo, wanlimu wa shariya na wakulungwa wa dini wakintunza Insa sana-sana. Ewo wawapereka wapererezi wamojawapo wakiritula kuwa wanu wakweli. Wakisakula wammonerere kamba iye asowera kinu cakunkoresa ipate wampereke ka guvinadoru, mwenyé uwezo na mamulaka.

²¹Ndimana wakindairi, wakamba: “Mwanlimu, tukwijiwa kuwa piya vyausowera na vyaufunda vyakweli, wala aulamula kwa kunang'aniza munu caari, ila kwankufunda kamili njira ya Mwenyezimungu.

²²Sambi, tambire kinu kimoja: Ofwe tijuzi au atijuzi kunripa nsoko Kaisari?”

²³Fala Insa nakwijiwa ujanja wawo ure, akiwambira:

²⁴“Nolotereni jarajara moja. Ewu uso‑wu na eya mandiko‑ya vyanani?” Ewo wakijibu: “Vya Kaisari.”

²⁵Iye akiwambira: “Basi, vinu vya Kaisari, mpeni Kaisari. Vinu vya Mwenyezimungu, mpeni Mwenyezimungu.”

²⁶Kweli, awapatire mbere ya wanu kunkoresa Insa na majibu ake. Kwasa javyo, washanga na majibu ake are, wakinyamala vii.

²⁷Ikisa, wakinfika karibu Masaduseu wamojawapo, ware wakatála kuwa kuwapo kufufuka ka wafwi.

²⁸Ewo wakindairi Insa javi: “Mwanlimu, Musa katandikira eya mandiko‑ya javi: ikiwa munu kafwa, kamwasa nkawake saapongore naye wana, nduye marehemu ajuzi amwingire manyumba nankweli ire, filihali apongola naye rilunga rikolo.