14Huan ihcuac inon tequitcamen oquitaque, omoluihque ic yehhuan: “Yehhuatl inin aquin quiselis in itetlocolil. Tiyohue ticmicti huan ijcon tehhuan timohuaxcatisque.”
15Oncan oquiquixtihque den tlamiloli huan oquimictihque. Oncan in Jesús otlahtlanihuac: ―Tel, ¿tlen quichihuas ica yehhuan inon iteco in tlamiloli?
16Hualas huan quinmictis inon tlaquehualten huan quimacas in tlamiloli in oc sequinten. Ihcuac oquicajque inon, oquihtohque: ―¡Ahmo maquimocahuili in Dios!
17Huan Jesús oquinitaloc huan oquiniluiloc: ―Tel, ¿tlen quihtosnequi in tlen ca ipan Itlahcuiloltzin? Quihtohua ijquin: In tetl tlen oquixtohuetzohque in tequitcamen, axan yeh in tlen ocachi quinequisque.
18In aquin huetzis ipan inon tetl cocohtonis. Huan tla in tetl huetzis ipan seya, quipechitiu.
19In tlayecancamen den tiopixcamen huan in tlamachtiyanimen den tlanahuatilten oquinequiyayahque tequitzquisque saniman in Jesús, tleca oquinehnehuilihque ica yehhuan omoluihque inon tlalnamictilistli. Huan oquinmoucaitaque inon tlacamen.
20Oncan oquintitlanque tlapihpiyanimen maixnesican tlamelajcanten. Huan ic teichtacahsisque ica tlen mihtos huan ijconon cuali tetemactisque imajco in hueyixtoc romanohteco.
21Ic inin otetlahtlanihque: ―Tlamachtiyani, ticmatihque mihtohua huan monextiliyahque in tlen melahuac. Huan ahmo mixcomaca ica in tlacamen, tlahmo monextiliyahque ica in tlen melahuac teohtli in Dios.
22Xitechilui tel, ¿cuali tictlaxtlahuilisque in renta in hueyixtoc romanohteco, noso ahmo?
23Huan Jesús omomat quenin ica inon ahmo cuali intlanehnehuilis, huan omoluihque: ―Tel, ¿tleca nechichtacahuiyahque?
24Xinechnextilican se tomin. Tel, ¿de aquin ixayac huan itoca quipiyas? Huan otenanquilihque: ―Den hueyixtoc romanohteco.
25Oncan omoluihque: ―Tel, xicmacacan in hueyixtoc in tlen iyaxca huan xitemacacan in Dios in tlen teyaxca.
26Huan ahhuel oteichtacaquitzquihque ica tlen omihto inixpa in tlacamen. Tlahmo oc noncua, oquimatque ica tlen omonanquilihque huan omocauque.
27Huan satepa sequin saduceos ohualahque teitaque in Jesús. Inon saduceos quihtohuahque ahmo oncan in ihxohualistli den mijcamen. Ijcon oteiluihque in Jesús:
28―Tlamachtiyani, in Moisés otechihcuiluihtehuac tla se tlacatl miquis huan quicautehuas isihuau huan ahmo oquipix niyan se iconeu, in icniu quipiya ihuan motlalis inon viuda huan quipiyas ipiluan poutos ica in icniu mijqui.
SAN LUCAS 20
SAN LUCAS 20:14-28