Luka 20:14-28

¹⁴“Bong ye kene yo di tooltool ke kapkingi tina ngan tikamata ye in nga, ngan di tapdi tiwetewete nen, ‘Kakamata, kumu taunu tani in natunu la iman i. Kumata le be pang dama ni nga, ngan ole ikolo tamana ye kumu i a iyei kumu taunu. Le kaman a taraumate le imata, a be nen ngan so yo tamana be ikap panga nga, ngan takap le imot paidi.’

¹⁵Le nga tila tikauu a tiyolle a tikatte du ke diki, inbe tiraumate le imata.” Yesu iwete pang di nen a imot, motong la itor di nen, “Ngan nen le kumu taunu tani in ole iyeie soo so pang di tooltool ke kapkingi tina?

¹⁶Ya in ole iman man iraumatamata di tooltool tina le imot, inbe itara kumu tani in lo di tooltool kapala baedi a nen ngan matadi kala.” Ngan yeisa be di tooltool tina tilongo yo Yesu iwete nen nga, le nga tiyei ne, “Ona tiap! Kin iyei urata nen be!”

¹⁷Motong la Yesu matana pang ye di tooltool tina, inbe itor di nen, “Betanga ke Maro yo tiwodo lo ye rau nga, ngan punu belei? Ngan betanga tina ngan iwete nen, ‘Pat yo di tooltool ke renge rumu lodi panga tiap a tisukraii i, in la iyei pat dook mata yo ipamede rumu le imede i.’ 

¹⁸Ngan di tooltool tina le imot yo be timol le du tirau di pang ye pat i nga, ngan ole turadi bokobokobe le moromorana. E be pat tani in imol le du ikata tool sa nga, ngan ole igarungu tool tani le dook tiap yege.”

¹⁹Yesu iwete nen, ngan di tooltool maimai ke paroranga so pang Maro tiye di pannoongoo ke ger ke Maro nga, ngan lodi galanga nen be nga ikatte betanga ye di. Le nga lodi be le tikauu ye kene tani in a tiparama, bong ngan titattadai di tooltool yo man tigaua nga.

²⁰Motong la di tooltool kuto maimai ke paroranga so pang Maro, tiye di pannoongoo ke ger ke Maro tina ngan tiwanga di tooltool kidi pattu a be lo tigoigoi ye Yesu. Di ngan tillung be lo tilongo betanga ki, inbe titar talngadi ye, a be nen ngan Yesu iwete le be koon kapsap ye betanga sa nga, ngan ole la tillaikoo pang di tooltool maimai tina ye betanga ki, a be nen ngan tikauu la titaru lo tool kuto mai yo matan kala malala mai Yudia i, in baene.

²¹Le nga tilo, motong la tiwete pang Yesu nen, “Pannoongoo! Am nga lomam galanga be betanga kiong yo kuwetewete a kupatomonai di tooltool ye nga, ngan tarantatu le imot. Le betanga kiong yo kuwete pang di tooltool yo edi maimai, inbe edi maimai tiap nga, ngan gaongo leu. Inbe kupatomonai di tooltool ye dada moolmool yo ke Maro ngan le imot.

²²Ngan la be amtorong nga, ong i lom belei? Nga dook mata be ole am tooltool ke Yuda nga amtar pat pang tool kuto mai kidi Rom yo Sisa i, too tiap?”

²³Bong ngan Yesu lono galanga yo di tooltool tina ngan tikapye be tillungu, ngan oo. Le nga iwete pang di nen,

²⁴“Kapatnaia pat silba ngan atu a akamata.” Le nga tipatnaia pat tina ngan atu pang Yesu a ikamata, motong la itor di nen, “Sei kanningana inbe ene iken ye pat i nga?” Ngan tiyei ne, “In Sisa.”

²⁵Motong la iwete pang di nen, “Aoo, ngan dook mata! Be so ke Sisa, ngan kakap pang Sisa. E so ke Maro, ngan kakap pang Maro.”

²⁶Le nga di koi ki tina ngan titakrai ye betanga yo Yesu iraua betanga kidi ye i. Le tiwete touo betanga siap, sila tiwur inbe tipas le tipalongo leu. Yesoo bong taukadi dada yo be tikaua lungunu ye Yesu, a nen ngan ikapsap ye betanga sa ye di tooltool matadi nga.

²⁷Motong la di Sedusi pattu timan pang ye Yesu be man titoru. Ngan di Sedusi tina, ngan di Yuda pattu yo tiwete be di tooltool timmata nga, ngan o ke be timadit mulu tiap. Le nga man titoro Yesu nen,

²⁸“Pannoongoo, muku ngan Mose iwodo betanga atu be tatoo in nen. Kumata le tool atu be ikere le rimana ipasuiu kan kase siap, inbe tamoto tani in imata nga, ngan taini ole ikoli a iyooloo tap ke toonoo, a be nen ngan garup tani in ipasui kase sa panga nga, ngan ole iseke rara ke toonoo tani in pang dama a ila.