SAN LUCAS 20:14-28

¹⁴Pero are jehe na vicon na xan, ndache chó na: “Xan jihi xan sayé ngoi nontte jihi inchin herencia, mexinxin nasoenxon na xan para que ján na sittoá na cain.”

¹⁵Cottimeja joantsjegaxin na xan de nttauva mé co nagoenxon na xan. Cottimeja joanchiangui Jesús ngain chojni co ndac̈ho: ―¿Quehe sinchehe xinajni mé ngain tti chojni que vittoehe jnguihi xa?

¹⁶Jehe xa tsí xa co nasoenxon xa chojni mé co sanjo xa jnguihi xa ngain ojé chojni. Are vinttequinhi chojni jihi, vinttendac̈ho na: ―¡Que Dios sanjoha joachaxin yá!

¹⁷Pero Jesús tsjehe ngain jehe na co ndac̈ho: ―Mexinxin, ¿quehe rroc̈ho tti jitaxin ngain Palabré Dios? Nttiha ndac̈ho: Tti ẍo que joinchegondaha xittette nchia, ẍo mé tti ẍo joiguehe icha importante.

¹⁸Quexeho chojni que tsonttenguixin ẍo jihi, tsonchjian pedazo cuerpoe na. Co si ẍo jihi setsinga ẍo ngataha ná chojni, chojni mé rrocjan cuerpoe polvo.

¹⁹Cainxin xidána que vaquetonha ngain icha xidána co ximaestroe ley nttiha joinao xa rrotse xa Jesús ngain rato mé ixin coinxin xa que ixin ejemplo jihi rroc̈ho de ixin jehe xa. Pero ẍagoen xa cain chojni.

²⁰Mexinxin rroanha xa canxion xí que tsaya ngain Jesús co xí mé vanchehe xa que ixin jehe xa anto jian xa para que rrojinchenichja xa Jesús ná cosa nchaoha para nchao rrocjanguihi xa Jesús ngain xigobernador.

²¹Mexinxin joanchiangui xa ngain Jesús co ndac̈ho xa: ―Maestro, janha na nona na que soixin nichja co nchecoenhe chojni tti ndoa, co ncheha juzgado chojni rico ojé que chojni noa, sino que soixin ndoa nchecoenhe na de ixin tti rinao Dios.

²²Ndachjenji ni ra: ¿Anchao jí tsjenga na hna impuesto ngain xiemperador, o ani nahi?

²³Pero Jesús oconohe de tti jianha que jehe xa teẍaxaon xa de ixin jehe, co jehe ndac̈ho ngain xa: ―¿Quedonda rinao ra sincheyana ni ra?

²⁴Tjagohna ni ra ná tomi. ¿Quensen con jinganito jihi, co quensen nombré jitaxin jihi? Jehe xa vinttendac̈ho xa: ―Con xiemperador co nombré xa.

²⁵Cottimeja ndac̈ho Jesús ngain xa: ―Mexinxin chjehe ra xiemperador tti jiquininxin xa, co danjo ra ngain Dios tti jiquininxin sayé jehe.

²⁶Co jamé c̈hoha joinchenichja xa Jesús ni ná cosa nchaoha; sino que vinttegoan xa admirado de ixin tti ndac̈ho jehe co jamé ndavinttetencoa xa.

²⁷Después de cain jihi canxion xisaduceo vinttecji xa ngain Jesús. Xisaduceo vaguitticaon xa que chojni que ndadenhe irroxechonha na; mexinxin ndac̈ho xa ngain Jesús:

²⁸―Maestro, ley que vayé Moisés jitaxin que si ná xí ndadenhe xa co sittohe c̈hihi xa co si ẍonhi chjan joichonda na, xichó xindavenhe chonda xa que secao xa jehe nc̈higanha mé co rrochonda na chjan para que chjan mé sehe xan inchin xenhe tti ndavenhe.