Luka 20:14-28

¹⁴Eme soŋaŋ jaŋe ine ŋokâ‐ticne honerâ nazaŋ gazaŋ erâ mumbiŋ, ‘Eki hâcne juku gie ʒi rauckeocmu, murâ qapene gie ʒi nâŋâcne ezejec.’

¹⁵Iŋuc murâ kâteo tuŋke tuŋke rarâ qâhâmombiŋ. Eme gie rune e soŋaŋ weniŋuc ejareocmu?

¹⁶Manaŋgopieŋ, e warerâ soŋaŋ iŋucne jopa qâhâmoc ejarerâ gie‐ticnao soŋaŋ furune râec‐jopaocmu.” Eme jaŋe manarâ mumbiŋ, “Aricne, iŋuc mi ejâmbâŋkezo.”

¹⁷Mupie Jesuzi hone dendeŋ‐jopahuc muwec: “Miti dâŋɋâreŋ moc kecʒiŋuc fokac i fuŋne weniŋucte? ‘Ficbapa ŋic jaŋe wâtuŋ surehuc behembiŋ, wâtuŋ izi mi jâmâ wâtuŋ ezejec i!’

¹⁸Ŋic moczi jâmâ wâtuŋ ira herâ sahac‐ticne imackeocmu, â wâtuŋzi ŋic mocte faio waha qaocmu ine qâgâreckeocmu.”

¹⁹Iŋuc mume miti qaqazu â taha bapa micne jaŋe ʒoaŋ ijaha kâpâcwâru baniŋte mumbiŋ. Jesu e dâŋ suŋsuŋne jaŋere muwec, i mana tararâ iŋuc ecnezo murâ ŋic jaŋere hâwic‐jopame behembiŋ.

²⁰Eme jaŋe Jesure ruc bahuc doc bapa ŋic erao sorec‐jopapie rambiŋ. Eme ŋic izi hâcne miti hawari juhuc Jesu dâŋzi bitiŋ bacnepie kime kiarao râeniŋte

²¹mu esâic ecnehuc mumbiŋ: “Qaqazu, nâŋe gore fuŋne manaŋgopeneŋ, go dâŋ sâcne nâza qazuc eekic, erâ fekicne fosâoc‐jopahuc dâŋ mi muhasickeekic, ehuc Anuture hata jâmbomacko mutiŋne‐nâreekic.

²²Irec mutec mananaŋ, Roma ŋicwofuŋ takesi moneŋ râcnepene sâckeekac me mâcne?”

²³Mupie eeatuc‐jeŋicte fuŋne mana tararâ muwec,

²⁴“Ŋoŋe siliwa moneŋ moc bâfuarâ nowatupie honepe, ira more hawari â qâreŋ fokac?” Eme jaŋe mumbiŋ, “Roma ŋicwofuŋte.”

²⁵Eme jazarâ muwec: “Murâ ŋicwofuŋte biŋe i ŋicwofuŋ râcnenʒepieŋ, â Anuture biŋe i Anutu râcnenʒepieŋ,”

²⁶Iŋuc mume jaŋe dâŋticne batackerâ wemocko ŋic jaŋere maio qorickenʒapiŋ. Irec mâc wareckerâ dâŋjeŋic fâsâewec.

²⁷Jaŋe rahapie sadukaio ŋic gâcne Jesurao fisimbiŋ. Ŋic i jaŋe, hâmockonec fafahare mi fokac, iŋuc muhuc jumbiŋ.

²⁸Jaŋe hâcne fisirâ Jesu dâŋ ʒiŋuc muhuc âzâcnembiŋ: “Qaqazu, Mose e dâŋ kecʒiŋuc mutâcnewec, ‘Ŋic moczi ŋokac rorâ ɋâric‐ticne mi fuahame hâmome ɋanezi hozec‐ticne rorâ hahac‐ticnere biŋe ɋâric bâfuazejec.’