Luk 20:14-28

¹⁴“Ba wain togl sugl meglkwa yomba, ye kandre ana ye yene dipirkwa, ‘I wain togl nemyagl wam kaima ungwa. Nono ye sigogltre, ana ye wain toglmo nono inamga.’

¹⁵Yegl dindre, ye wain togl mina gundo imenda ende ana sigeglkwa. “Wain togl nemyagl wain togl sugl meglkwa yomba sragl ere tenambe?

¹⁶Ye undre wain togl sugl yomba i prapra sigogltre ana wain togl i yomba pere tenambuka.” Ana yomba ka i pirtre, ye dingwa, “Yeglmere ta paikrambuka!”

¹⁷Yesus toro mendigl pandigl yomba kandre ana krapoglkwa, “Ka yeglmere muno beglkwa pangwa i mambuno sraglmere pame? “‘Ana kamda wagle kombuglo i kinde wedi plendi menda endingwa. Ba kombuglomo wu kombuglo kauglange giglendi pangwa.’

¹⁸Yomba prapra yange kombuglo igle bolamugl simbi ye bogl deruwagl eraglkwa, ba kombuglo i yange yomba ta sinan, bogl deruwagl ere surmane eraglkwa.”

¹⁹Ana lo beke teingwa yomba ya pris kande wagle ye ka di simbogl dungwa i no erme keunde konbauna ta doko kan indre Yesus kane sinamnedi erikwa. Sraglpre, dumedi pre ana ye yomba kundutno geglkwa.

²⁰Ye eremogl Yesus suglmo mangigl wora aimande kanmogltre ana ka waiye yomba diendingwa. Ye kamo kaima pirkwa mereyegl ere ana kimbi-koglo krapeglmbi Yesus ka ta di aglau eran kandre, ana kanesi gavman kande tenaglkwa.

²¹Yeglpre, kuie kana eingwa yomba i krapogl Yesus teingwa, “Beke Notnga, ka dinga ya beke notnga i kuno orkwa, no punga ene yomba kanno pamara dikitnga, ba God prumere ka kaima yomba beke tenga.

²²Dinoro, nono takis Sisa tenamuno mo tekramne?”

²³Yesus eremogl ye kakimbi kogl dingwa i kanpogl sindre ana ye ditongwa,

²⁴“Ene moni silva suwarata i na ombuno diyo, ira kuiya ya kangiye tembe pame?”

²⁵Ye di ikine endingwa, “Sisa pangwa.” Yesus di yomba tongwa, “Ana Sisa taraglmo Sisa teiyo, te God taraglmo God teiyo.”

²⁶Ye yomba merkinde meglmara ka yegl dungwa i si akenaglkwa mere mango. Ana ye singokondi, kiendi meglkwa.

²⁷Sadyusi wagle tau Yesus moglmara undre, krapeglkwa. Ye eremogl yomba geglkwa andiglkraglme dingwa yomba.

²⁸Ye dingwa, “Beke Notnga, Moses lomo i nono pre muno boglkwa: Yagl ta gogltre, embiye kondinambuka ba gak ta kugl yeikran, ana goglkwa yagle i angigle ombugl embiye werai inan, ana ye yagl goglkwa dumomugl i gak kugl suglo sinambirka.