Luke 20:14-28

¹⁴Idu muro nari rededi vene yaku vesi iniye iniye nidodi resi niyadi, ‘Mina bi muro biyaguna amiye nigo. Nesi umuyenadi, ma beika baika ini baba yaku ferego bi uni nigo!’

¹⁵Ye waini meko muro etofarori makusi umuyeyadi. “Ye waini meko muro biyaguna amiye bi ina vene rofu gokai beika be rego?

¹⁶Ina bi baesi muro nari rededi vene umuyesi muro bouna vene mago.” Amiye yaku mina sina neideyadiri, bi niyadi, “Makai bi ga ogau niyaine!”

¹⁷Idu ina vene vesi niyo, “Ye mina bura reyo bi beika? ‘Yava akuna vene moi kekevata uyadi fore bi yava moi gira redo fore iniye niyo.’

¹⁸Mina fore fafau kaere amiye yaregedi bi ode tumu tumu regedi, ma mina fore kaere fafau yarego bi mina amiye ufoyoma rego ma budoka nigo.”

¹⁹Ma mina meda nemoko makari ago gira oteimana vene ma Sei ma amiye utari naivo vene di varika vene yaku ina moi gira regika ida maina reyadi, adina diba niyadi mina mokena ago ina vene fafau niyo. Idu amiye rofu ori resi

²⁰Iesu vei mona resi ini ura bi Rome vene di gavana di ourefeidena ma vava gabireri aegedi. Dada amiye be fore masi nifeideyadi, kaere bi sina buni buni kana dudu niyagane. Idu rama iniye bi, Iesu ini ago nigori ni eru regedi.

²¹Ye baesi ina rofu niyadi, “Oteimana amiye, una una diba ya bi sina rama maka nisa amiye. Ya bi amiye gokai kana bi de mokeisa, idu sina rama dudu maka Sei di ida oteimaisa.

²²Una ni, Caesar rofu takesi fore fei rena bi uni ago gira rofu rorobo ba ide?”

²³Idu bi sena ini eru rena vegu vei mama resi niyo,

²⁴“Siriva fore yokoi na oteimafa. Bi kaere di vima ma roka nufa?” Ye nikabai reyadi, “Caesar di.”

²⁵Kamini niyo, “Beika Caesar di, bi Caesar mafa, ma beika Sei di, bi Sei mafa.”

²⁶Beika ago niyo rofu amiye di nemokori eru regika anua reyadi; ini ago dairi maro rofu tururu reyadi, dada bere niyadi.

²⁷Kamini Sadducee vene be, kaere bi dadi rae rena fufuta maradi, bi Iesu rofu baeyadi.

²⁸Resi nikaitegasa niyadi, “Oteimana amiye, Moses yaku una rofu bura reyo bi: ‘Amiye kaere ini dubuini muyesi ini rema ferego, idu mida bi koina, mina amiye bi ini obu mesi ini dubuini di mida moiyainedi.’