San Lucas 20:14-28

¹⁴Peru xi cavëë cha xi fahacuenda xitjë jan cha vëhë matsejen ne, sehe cavisiajmicjín cha cojo xicjin cha cuitjin: “Cha vihi ne, quihndi rë me xi cuahatsja cha xitjë vi. Niquen cha, cojo sa xi tsajan cuma nangui vi.” Cuatjin cavisiajmicjín cha.

¹⁵Hane xi cavaxëxin cha cha tsëhë nangui jan matsejen ne, sehe catsiquehen cha. ’Xi má nuju matsejen ne, ¿mé sahmi nai rë xitjë jan cojo cha xi cuacun fahacuenda jan?

¹⁶Cjue tsiquehen me cha, sehe sua me xitjë jan cjuahacuenda jingu sa cha sahmixa. ―‍Cuatjin xu cachja Jesús. Hane xi cahndë yëjë xuta cjua vëhë ne, cachja xu me cuitjin: ―‍¡Catamamiji cacun Nina xi cuatjin cuma! ―‍Cuatjin xu cachja me.

¹⁷Ngajan xi xi cavuya vutsejen Jesús xuta jan ne, cuitjin xu cachja me: ―‍¿Mé vijne xi cuitjin camahindu xcun xujun rë Nina?: Ndyojo xi catsitjungui chjinevexo ne, vëhë ndyojo xi cavéjña tjun tjun yuju rë xihndënaña. Cuatjin camahindu.

¹⁸Hya xi ngu xuta cjuinenguisun me xcun ndyojo vëhë matsejen ne, cuatëlanga rë me. Hane hya xi ndyojo vëhë cjuinenguisun rë ngu xuta matsejen ne, ña cuma të me. ―‍Cuatjin xu cachja Jesús.

¹⁹Vëhë xi cha xi vicuya cjuachacun cojo nahmi xi matitjun ne, jemu cavangui xu me chuva rë hacutjin cuma xi cjuaha me Jesús hora vëhë ni, tsëhë xi vëë me xi ejemplu xi cachja Jesús ne, condra rë me chja. Peru tsëhë xi tsacjun xu me xuta ne, vëhë xi cafaain xu me Jesús ngutjen.

²⁰Tu siu xu ni me cuidadu tsëhë cjua rë Jesús, hisca catsingatju xu me ngujo cha xi tsejen sacuaha xuta ndaja, xi cuangui cha chuva rë xi cuaxë rë cha Jesús ngu cjua xi cuaaintjin, cojo sa xi cuma chjahá rë me cjuechani rë me xcun xutaxa rë ndihyavasen.

²¹Hane cha xi cuacun jan ne, cuitjin xu cachja cha cojo Jesús. ―‍Maestro, ngayin ne, hyin ta ngayun ne, vicuyun rë xuta cojo cjuaquixi. Hacuaha tangun ni nújun cojo yëjë xuta ta, tsëhë xi ngayun ne, hatuxa vicuyun ndiya rë Nina cojo cjuaquixi.

²²Quihndë ne, sacuaha ley rë Moisés ne, ¿há sua cahndë́ xi cuechjen tujúnsa naja cojo César, me xi matitjun, o há suaain cahndë́? ―‍Cuatjin xu cachja cha.

²³Peru Jesús ne, tsëhë xi ha vacun rë me xi jemu ndacha cha ne, cuitjin xu cachja me cojo cha:

²⁴―‍Ningacun ná ngu tujún. Quihndë ne, ¿yo xcusun rë hacuaha yo ñihi rë xi quitahá xcun tujún vë? ―‍Cuatjin xu cavinenguise Jesús. Hane cha xi cuacun vë ne, cuitjin xu cafayangui cha: ―‍Tsëhë César. ―‍Chja xu cha.

²⁵Sehe ngajan xi Jesús ne, cuitjin xu cachja me cojo cha: ―‍Sá xi cuatjin ne, tuhun rë César xi tsëhë me, hane tuhun rë Nina xi tsëhë me. ―‍Cuatjin xu cachja me.

²⁶Hane camaji cavaxë xu rë cha Jesús ngu cjua xi cuaaintjin xi cuihndë xuta. Hane xi quijircun xu rë cha tsëhë cjua xi cafayangui Jesús ne, tu caviyujujyuu xu ni cha.

²⁷Hya xi camá ne, cafehe xu ngujo cha saduceo hiscan tacun Jesús. Cha xi cuicun vi ne, vicuya cha cjuachacun xi chja xi xuta xi cahme ne, cuyaain nga me cjuahñu. Ngajan xi cha xi cuacun cafehe jan ne, cachja xu cha cojo Jesús cuitjin:

²⁸―‍Maestro, Moisés ne, catsihindu me xcun xujun rë Nina xi sá xi ngu xihin cueya, hane tsajin rë chjuun rë hisca ngu quihndi ne, hntsë nima vëhë ne, meje rë xi cjuaha rë chjuun cahan vëhë, cojo sa xi sacú rë na quihndi xi cuma sacuaha quihndi rë nima vëhë.