Luk 20:14-28

¹⁴Mba ntɛ abum a dalɛ ŋanəŋk wəkakɔ mɔ, kɔ ŋalokɛnɛ: ‹Wədelɛk kɛ kɔn ɔfɔ wəkakɔ. Padif kɔ ntɛ tɔŋsɔŋɛ dalɛ dede dɔyɔnɛ dosu mɔ.›

¹⁵Kɔ abum a dalɛ aŋɛ ŋasumpər wan ka wəka dalɛ, kɔ ŋawurɛnɛ kɔ dalɛ kəsək kɔ ŋandif.» Kɔ Yesu eyif acəŋkəl ɔn, «Cəke cɔ pəmar wəka dalɛ nwɛ pəyɔ ŋa-ɛ?»

¹⁶Kɔ Yesu ɔnɔcər: «Pəmar wəka dalɛ nwɛ pəder pədif abum a dalɛ akakɔ fəp, pəbaŋ sɔ dalɛ pəsɔŋ abum alɔma.» Ntɛ afum ŋane moloku mmɛ mɔ, kɔ ŋaloku: «Ta tatɔkɔ tɛtam kəyi!»

¹⁷Kɔ Yesu ɛŋkafəli kəro k’ɔmɔmən ŋa, k’eyif: «Cəke cɔ toloku tecic tantɛ toloku oŋ-ɛ?: ‹Tasar ntɛ acəmbər kəlɔ ŋanace mɔ, ipede pɔyɔnɛ oŋ tasar mpɛ posumpər kəlɔ mɔ.›

¹⁸Nwɛ o nwɛ ɛtɛmpɛnɛ pi kəroŋ, ɛntɛpɛ; məna nwɛ pɛntɛmpɛnɛ sɔ kəroŋ mɔ, pomputək’əm.»

¹⁹Atəksɛ a sariyɛ kɔ aloŋnɛ apɔŋ ŋac-tɛn kətəp kɔ waca tɛm tatɔkɔ, bawo ŋanacərɛ a te taŋan tɔ Yesu ɛnalokɛ capafɔ cacɔkɔ; mba ŋac-nesɛ afum akɔ ŋanayi di mɔ.

²⁰Kɔ ŋayɛfɛ kəkaŋkəla-kaŋkəla Yesu. Ti disrɛ, kɔ ŋasom afum aŋɛ ŋanabaŋɛnɛ kəcəŋkəl moloku mɔn mɔ. Afum ŋanayi aŋɛ anasom kəkɔ-sumpər Yesu dəmoloku mɔ, ntɛ tɔŋsɔŋɛ ŋatam kəbɛr kɔ wəbɛ dəwaca, nwɛ ɛnatɔmpər kətam kɔ fənɔntər dɔtɔf mɔ.

²¹Kɔ afum asom aŋɛ ŋaŋcaŋ kɔ moloku: «Wətəksɛ, səŋcərɛ fɔ moloku mamɛ məŋloku məc-təksɛ mi afum mɔ mɔsɔk; məfɔkiti fum kənəŋk kɔn, mba kaŋce kɔ məntəksɛ afum kəkɔt nkɛ kəmbɔt Kanu mɔ.

²²Awa, məloku su ma, pəmar kəsɔŋ dut dosu wəbɛ wəka Rom ba, ka pəmar fɛ ti?»

²³Mba kɔ Yesu ɛnɛpəl kɔta kəŋan, k’oloku ŋa:

²⁴«Nəmentər’im pəsam gbəleŋ bin. Kəro ka ana kəyi pəsam papɔkɔ-ɛ, kɔ tewe ta wəkayi?» Kɔ ŋaloku, «Wəbɛ wəka Rom.»

²⁵Kɔ Yesu oloku ŋa: «Awa, nəsɔŋ wəbɛ wəka Rom pɔkɔ pɔyɔnɛ pɔn mɔ, kɔ Kanu sɔ pɔkɔ pɔyɔnɛ pa Ki mɔ.»

²⁶Afum aŋɛ ŋantam fɛ kəsumpər kɔ dəmoloku kənay nkɛ dacɔ; mba ntɛ moloku ma Yesu meŋciyanɛ ŋa mɔ, kɔ ŋaŋcaŋk.

²⁷Kɔ aSadisi alɔma ŋander nnɔ Yesu eyi mɔ. ASadisi akakɔ ŋaŋc-loku a k’afi-ɛ, kəyɛfɛ kəyi fɛ sɔ. Kɔ ŋayif Yesu moloku mmɛ:

²⁸«Wətəksɛ, ntɛ tɔ Musa ɛnacicɛ su: ‹Kɔ wɛŋc ka fum efi pənɛŋcɛ mba ta ɔyɔ wan-ɛ, wɛŋc wəkɔ eyi doru mɔ, ɛntam kənasər wəran ka wəfi pəkomɛ kɔ awut.›