SAN LUCAS 20:14-28

¹⁴Pero ajcüwa monrang najiüt tiül corrül wüx tajawüw micual neneay iüt, quiaj tapiüngüw nejíwan quiaj: “Nej aag ayaj apmaneay aaga corrül cam. Tabaats mambiyaats, ndoj icoots apmaneayiiüts a iüt cam”, awüw.

¹⁵Quiaj tasapüw, tawüniw tiül corrül, tambiyaw. ¿Cuane ipiüngan apmarang a neneay iüt wüx ombasüw ajcüwa monrang najiüt quiaja?

¹⁶Pues apmamb mambiy nejiw, condom apmayamb alinoic ajlüy monrang najiüt mayac teowixaw aaga corrül quiaj ―aj nejiw Teat Jesús. Ajcüwa nipilan wüx tanguiayiw aag ayaj, tapiüngüw: ―¡Malüy Dios ngo marang atquiaj! ―awüw.

¹⁷Teat Jesús tajaw teombasüw nejiw, quiaj tapiüng: ―¿Neol, cuane wüx amb apiüng tiül Mipoch Teat Dios? niüng apiüng: Aaga piedra leawa taloxiw ninguiün monrang iüm, nganüy laíün marang xeyay netam piedra tiül oxing iüm.

¹⁸Jane apmajmiüc wüx aaga piedra quiaj, apmapol nej; pero sitiül aaga piedra quiaj apmajmiüc wüx ombas aljane, nómban apmacuiaach tiüt ―aw Teat Jesús.

¹⁹Ajcüwa montangtang miteaats at mondüy wüx aaga poch tüünd Moisés quiájan tandiümüw masapüw nej, cos tayajcüw aaga andeac quiaj andüy wüx ombasüw nejiw amb apiüng. Pero timboloj mandüyiw nipilan, áag taton ngo marangüw nicuajind.

²⁰Ndoj tüjchiw mamb acas monxey mandacüwiw. Ajcüw ayaj ajüic atnej najneaj arangüw, pero ambüw mayambüw nguineay alndom mandacüwiw, masapüw wüx, mayambüw leaw andeac Teat Jesús, mayacüw nej teowix natang nenajiüt.

²¹Quiaj tiünüw masajüw nej: ―Teat, sajawan ique indeac iquiaach leaw naleaing, ngo mewaiich. At aton ique ngo mepiüng wüx jane tiül nipilan netam, jane ngo metam. Ique iquiaach Mipoch Teat Dios atnej netam.

²²Nganüy isaj xicon ¿naleaing netam majwan tomiün müünd aaga César, ngwüy ngo metama? ―ajüw nej.

²³Teat Jesús tajaw neol tatüniw nej manguiayiw aag ayaj, quiaj tasaj nejiw: ―¿Neol tendiüman meyacan xic wüx naéle?

²⁴Ich miün noic tomiün majawaats. ¿Jane mitey alwüxe, aton jane minüt alwüx a tomiün cama? ―aj nejiw. Quiaj tasajüw nej: ―César ―ajüw.

²⁵Quiaj tasaj nejiw: ―Ijchan a César leaw aneay nej, aton ijchan Teat Dios leaw aneay Teat Dios ―aj nejiw Teat Jesús.

²⁶Ngo maxomüw alngün poch leaw alndom masapüw wüx, áag leawa tandeac niüng teamanguiayiw nipilan. Leawa tarang, nejiw mbayatoj manguiayiw leaw asaj nejiw, ndijchiütójan.

²⁷Condom acas saduceos tambüw majawüw Teat Jesús. Ajcüwa saduceos quiaj apiüngüw mondeow langome apmapacüw alinomb.

²⁸Tasajüw Teat Jesús: ―Teat, Moisés tarang tiül minawiig nej, tapiüng: Sitiül nop naxey mandeow, macül mintaj nej lemben omal, ngome tajiürüw micualüw nejiw, quiaj michiig nej netam mengoch owix aweaag aaga lemben omal quiaj, majiürüw micualüw majüic atnej micoj nej tajiür micual nej.