1Panthawe imweyo bzulu na bzulu bza wanthu adakhonchezana ndipo iwo akhapsindizana. Na tenepo Jezu adatoma kulewa-lewa na ateweri wace aciti: Cenjerani na mapfundziso ya afalizeu, nakuti ngakunama.
2Ndipo palibe cinthu cakumpsinkhika comwe cin'dzasaya kukundulidwa, na cire comwe cin'dziwika lini ndipo cin'dzadziwika.
3Na tenepo bzentse bzomwe mudalewa pam'dima bzin'dzabzeka pakungwerewera. Na bzentsembo bzomwe mwalewa na kawere-were m'gwangwa, bzin'dzakuwidwira pantsodzi.
4Jezu adawawuza pomwe kuti: Axamwali wangu! Ndiri kukuwuzani kuti muleke kugopa wanthu omwe ambapha thupi lokha, akamala bzimwebzo palibe cinango comwe ambacita.
5Tsono ine-pano ndin'funa kukulatizani omwe an'funika kugopedwa. Ndipo gopani ule omwe akapha munthu, ana mphambvu ya kumuthusa m'cidindi ca moto. N'cadidi kuti omweyo m'mugopeni.
6Kodi munthu ambagulisa lini ajolo axanu na konto ziwiri basi? Na tenepo palibe na m'bodzi yekha omwe Mulungu ambamuyebwa.
7Napo tsisi lentse la mumsolo mwanuli, Mulungu adaliwerenga kale. Lekani kugopa, thangwe imwepo mun'funika kwene-kwene kuposa ajolowo.
8Ndipo Jezu adalewa pomwe kuti: Ule omwe an'dibvuma pakati pawanthu, na Mwana wa Munthu an'dzamubvumambo pakati paanjo wa Mulungu.
9Tsono ule omwe an'dilamba pakati pawanthu, ndipo Mwana wa Munthu an'dzamulambambo pakati paanjo wa Mulungu.
10Ule omwe an'tukwana Mwana wa Munthu, Mulungu an'dzamulekera bza kuipa bzace. Tsono ule omwe an'nyoza Mzimu Wakucena, Mulungu an'dzamulekera lini.
11Ndipo akadzakutengani acidzayenda namwe kunyumba zakupembera, ayai kuna atongi na kumphambvu za umangi, dzalekeni kukhala na thupo kuti mun'dzatawira ciani ayai mun'dzalewa ciani.
12Nakuti Mzimu Wakucena un'dzakupfundzisani panthawe imweyo kuti mun'dzalewa ciani.
13Munthu mwinango pantithipo adakuwa kuti: “Misiri, uzani m'bale wanguyu kuti tigawane utaka bwa babathu.”
14Ndipo Jezu adamutawira kuti: “Nandi iwe! Kodi mbani adandipasa basa la kutonga na kugawira wanthu utaka?”
15Ndipo iye adawawuza pomwe kuti: Khalani na cheru kuti muleke kucita m'tima loko-loko na cinthu, nakuti moyo wa munthu ulibe basa na kuwanda kwa bzinthu bzacebzo.
16Na tenepo iye adawatsikira pomwe matere aciti: “Pakhana munda wa munthu m'bodzi nyakudala omwe udakosa bzakudya bzizinji kwene-kwene.
17Ndipo iye adakumbuka mumtima mwace kuti: 'kodi ine-pano phoso limweri ndini likoya kuponi?
18Ndipo iye adalewa kuti: 'Ndin'dzapfudza magwangwa yanguya ndicidzamanga yanango makulu ndipo ndicidzakoya m'mwemo phosolo na bzinthu bzangu bzinango.
19Pamwepo ine ndin'dzalewa na mumtima kuti: 'Moyo wangu una bzinthu bzentse bzomwe un'funa bza magole mazinji, tsapano derekha, udye, umwe, udakondwa.'
20Tsono Mulungu adamuwuza kuti: 'Nandi dzengawe! Usiku buno unifa iwepo. Kodi apa mbani an'sala na bzinthu bzomwe udakoyabzi?'
21Na tenepo, bzidakhala ninga munthu nyamingululi omwe ana cuma cizinji kwene-kwene, tsono alibe kupasa Mulungu cinthu.
22Na tenepo Jezu adawacenjeza ateweri wace kuti: “Lekani kukhala na thupo mumtima kuti mun'dzadyanyi ayai kuti mun'dzabvalanyi nthupi mwanumu.
23Nakuti moyo ngukulu kuposa cakudya, na thupimbo lina basa kuposa cakubvala.
24Ndipo onani akhungubwe. Iwo ambalima lini, ambabvuna lini, alibe magota ayai magwangwa. Ndipoi Mulungu ambawadyesa basi. Tsono imwepo mun'funika kwene-kwene kuposa mbalamezo!
25Kodi mbani angakhale nathupo na moyo wace ndipo angakwanise kubzithumizira pomwe ntsiku ibobzi?
26Na tenepo penu imwe mun'kwanisa lini kucita bzinthu kang'onobzi, thangwe ranyi muna thupo na bzinthu bzinango?
27Tsono onani maluwa momwe yambakulira! Ndipo iyo yambaphata lini basa ayai kusona bzakubvala. Napo Salomau na mbiri yentse yomwe akhanayo, akhalibe bzakubvala bzakugaka bwino kuposa maluwayo.
28Ninga momwe Mulungu ambabvazikira mausuwa ya mthengo, yomwe yambamera ninga lero mangwana yacipsa na moto. Napo imwepombo ndimwe wanthu wakusaya cikhulupiropa, kodi iye angakwanise lini kukubvazikanimbo?
29Na tenepo lekani kukhala na thupo kuti mun'dzadyanyi ayai kuti kun'dzamwanyi.
30Thangwe wanthu wa mudziko, ndiwo ambafunisisa bzentsenebzi. Tsono Babanu an'dziwa kale kuti imwepo mun'bzifuna.
31Tomani mwanyang'ana umambo bwa Mulungu. Ndipo bzinthu bzinangobzo Iye an'dzakupasani.
32Nandi tubzifuwo tuwangu, lekani mantha! Nakuti Babanu an'funa kukupasani umambo bwace.
33Na tenepo gulisani bzinthu bzanu, mupase anyakusauka. Ndipo sonani mabudu yomwe yan'sakala lini. Nakuti cuma ca kudzulu cimbamala lini, komweko kulibe mbava, ayai manthedza kuti yangajete.
34Nakuti pale pomwe pana cuma canu na mtima wanu uli pamwepombo.
35Ndipo kondzekerani kuti muphate basa. Mibvuniko yanu ikhali idagaka.
36Na tenepo khalani ninga anyabasa ali kudikhira mbuya, omwe an'bwerera kucokera kucikondweso ca malowozi. Ndipo iye akafika akadzagugudza msuwo mudzam'fungulire na kankulumize.
37Ndipo wakusimbidwa mbaanyabasa wale omwe Mbuya akabwera an'dzawagumana adamudikhira. Ndiri kukuwuzani cadidi kuti iye an'dzawakhazika patsantsali la kudyera iye acibvala ndipo aciwatumikira.
38Ndipo wakusimbidwa pomwe n'bale omwe mbuya an'dzawagumana adamukhalilira napo n'pakati pausiku ayai madandakweca.
39Na tenepo dziwani kuti penu mwenekaciro nyumba angadadziwa nthawe yakubwera mbava, ndipo iye angadailekerera lini kuti ichole nyumbayo.
40Na tenepo khalani wakukondzekera nakuti Mwana wa Munthu an'dzabwera panthawe yomwe imwe mukhadikhira lini.
41Pamwepo Pedru adabvunza kuti: “Nandi Mbuya, kodi muli kutsikira matereya ife tekha ayai kuna wanthu wentse?”
42Ndipo Mbuya adatawira aciti: “Kodi mbani msunga cuma wandzeru na wakukhulupirika, omwe mbuya angadzamusiire panyumba pace kuti ambadzagawire phoso andzace nthawe ikakwana?
43Wakusimbidwa ni msunga cuma ule omwe mbuya wace akabwera an'dzam'gumana acicita tenepo.
44N'cadidi kuti iye an'dzam'pasa mpando ukulu wakumbawonerera bzinthu bzace bzentse.
45Tsono nyabasa ule omwe angadakumbuka kuti: “mbuya wangu ali kucedwa kubwera.” Ndipo iye aciyamba kutukwana na kumenya anyabasa andzace wale, wacimuna na wacikazi. Ndipo acimbadya na kumwa aciledzera.”
46Ndipo pantsiku yomwe an'dzafika mbuya waceyo pomwe angadzafika mbuya waceyo, pantsiku yomwe iye akhamudikhira lini. Ndipo iye adzamulum, acimucosa basa.
47Napo iye acidziwisisa bzomwe bzin'funa mbuya wace iye akasaya kucita na kubziteweza, adzachangidwa kwene-kwene.
48Ndipo ule omwe akhandziwa lini bzomwe bzikhafuna mbuya wace, akacita bzinthu bzakuipa, na tenepo an'dzachangidwa pang'ono. Tsono ule omwe an'tambira bzizinji an'dzasundidwambo bzizinji. Na ulembo ule omwe an'khulupiridwa na bzinthu bzizinji, iye an'dzasundidwambo bzizinji.
49Ndipo ine ndidabwerera kudzaphatiza moto padziko la pantsi. Na tenepo ndikhafuna kuti nthawe ino ukhale uli kugaka kale!
50Ine-pano ndina batizo linango kuti nditambire. Tsono ndina ciya mpaka iro licitike.
51Kodi mun'kumbuka kuti ndidabweresa m'tendere pantsi pano? Ne-ne-ne, ndidabweresa kupambulana.
52Na tenepo kucokera lero mpaka kutsogolo, banja la wanthu axanu lin'dzapambulana. Wanthu atatu an'dzawengana na wanthu awiri. Ndipo awiri acidzawenganambo na atatuwo.
53Ndipo baba-munthu an'dzawengana na mwana. Ndipo mwana aciwenganambo na baba munthuyo. Na ma-munthu a'ndzawenagana na mwanace wacikazi. Ndipo mwana wacikaziyo acidzawenganambo na mamaceyo. Mibzala an'dzawengana na mulowola. Na mulowolayo acidzawenganambo na mibzalayo.
54Ndipo Jezu adawawuza pomwe wanthu wale kuti: “Mukawona m'tambo uli kukwira ucicokera kumadokero mumbalewa kuti mbvula in'bvumba. Ndipo iyo imbabvumba cadidi.
55Ndipo mukabva condzi cicicokera kunyantsi, mumbalewa kuti lero kunipsa. Na tenepo kumbapsa cadidi.
56Mpfakafaka! Imwepo mumbadziwa kufotokoza makhalidwe ya pantsi na kudzulu. Kodi thangwe ranyi mun'saya kudziwa kuthumbudzula bzinthu bzomwe bziri kucitika nyengo inobzi?
57Kodi thangwe ranyi mumbasaya kutongana mwekha bzabwino?
58Penu una mulandu na munthu, iye akafuna kukakutongesa kumphala, toma wayezera kuyanjana naiye munjira, kuti asaye kukakulewera kuna m'tongi. Ndipo m'tongiyo aleke kukupereka kumphambvu ya umangi. Kuti iye asayembo kukakufungira m'kawoko.
59Na tenepo diri kukuwuza kuti un'dzacoka lini m'kawokomo penu ukanati kumala kulipira mulanduyo.
