LUKA 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ndipo Jezu adawuza ateweri wace kuti: “Bzin'dzawoneka bzinthu bzomwe bzin'dzaphonyesa wanthu, tsono tsoka kuna munthu omwe an'dzabzicitayo.

²Na tenepo bzikhali bwino kuti munthu omweyo amangiriridwe thumba m'khosi acikamuthusa pakati panyandza, kuti aleke kudzaphonyesa munthumbo bzace.

³Cenjerani. Penu m'bale wako wakuphonyera, mutsimule. Penu iye an'khumbula, iwepo mulekere.

⁴Penu iye an'kuphonyera kanomwe pantsiku, acidzakukumbirambo pomwe kanomwe kuti umulekerere, na tenepo iwepo mulekereni basi.”

⁵Ndipo atumiki adakumbira kuna Mbuya aciti: “Tithumizireni cikhulupiro cathu!”

⁶Ndipo Mbuya adatawira aciti: “Penu imwepo muna cikhulupiro ninga njere ya ntowe mungadawuwuza mkuyuyu kuti: 'Zuka ukabzizike panyandza! Ndipo iwo ungabvume.'

⁷Ndipo Jezu adabvundza kuti: “Penu munthu ana nyabasa wace wakulima ayai nyakuusa ng'ombe, akatenepo iye wakotoka, kodi angamuuze kuti atom kukhala patsantsali adye?

⁸Ne-ne-ne, maka kuti: “Ndoko katome kubvala kuti undiphikire na kunditumikira kuti ndidye, ndicimwa . Ndipo ndikamala unidya ucimwambo bwino.”

⁹Kodi iye angamutende nyabasayo na thangwe ra kucita bzimwebzo? Ne-ne-ne!

¹⁰Na tenepo imwepo mun'dzalewa kuti: “Ndiro basa lathu limwero, nakuti tacita bzomwe mwatiuza.”

¹¹Pantsiku ibodzi pomwe Jezu akhayenda kuJeruzalema, iye adapita na m'malire mwa Samaliya na Galileya.

¹²Pomwe iye adafika m'mui winango, ndipo adagumana anyamapere khumi. Tsono iwo adaima kutali na iye.

¹³Ndipo iwo adakuwa aciti: “Nandi Misiri Jezu! Tibverenimbo ntsisi.”

¹⁴Pomwe iye adawawona adawauza kuti: “Ndokoni mukabzilatize kuna azibaba wa ntsembe.” Pomwe iwo akhayendapo mapereyo yadapola.

¹⁵Na tenepo m'bodzi wao pomwe adawona kuti wapola, adabwerera acimbapasa mbiri Mulungu na kukuwa.

¹⁶Ndipo iye adagodama pana Jezu acimutenda. Tsono iye akhali m'Samaliya.

¹⁷Ndipo Jezu adabvundza kuti: “Kodi mukhali lini wanthu khumi omwe mwapolesedwa maperemwe? Apa winango apfembawo ali kuponi?

¹⁸Kodi palibe munthu mwinango omwe angadadzatenda Mulungu kuposa nyakudzayu?”

¹⁹Ndipo iye adamuuza kuti: “Lamuka uyende, nakuti cikhulupiro cako cakupulumusa.

²⁰Pomwe Jezu adambvundzidwa na afalizeu kuti umambo bwa Mulungu bun'dzafika lini, pamwepo iye adawatawira aciti: Umambo bwa Mulungu bun'bwera lini bucicita kuwoneka na maso.

²¹Palibe munthu omwe an'dzalewa kuti: “Ubu pano” ayai “Ubo apo!” Thangwe umambo bwa Mulungubo buli m'mitima mwanumu.”

²²Pomwe adamala bzimwebzo adawuza ateweri wace kuti: “In'dzakwana nthawe yomwe mun'dzafuna kuwona mabwerero ya Mwana wa Munthu. Tsono mun'dzaiwona lini.

²³Ndipo wanthu an'dzakuwuzani kuti: “Uyu pano”, ayai “Uyo apo!” Tsono imwepo lekani kudzayenda ayai kudzawatewera.

²⁴Ninga momwe mpheni imbacetukira kudzulu, phampha na phampha ndipo bzin'dzacitikambo tenepo pantsiku yakubwera kwa Mwana wa Munthuyo.

²⁵Tsono bzifunika kuti atome kubonera kwene-kwene acilambidwa pomwe na ntundu omweyu wa wanthu.

²⁶Ninga momwe bzidacitikira panthawe za Nowa. Na tenepo bzin'dzacitikambo pantsiku zomwe Mwana wa Munthu adzafuna kubwera.

²⁷Nakuti wanthu akhambalowola na kumbalowozana, acimbadya na kumwa, mpaka pantsiku yomwe Nowa adapita muxitima ya m'mmadzi. Ndipo kudawoneka malenga-lenga ya madzi, na tenepo yadapha wanthu wentse.

²⁸Na tenepo bzidacitikambo bzibodzi-bodzibzo pomwe panthawe ya Loti: Wanthu akhadya, akhamwa, akhagula na kugulisa, akhalima, na kumbamanga nyumba.

²⁹Tsono pantsiku yomwe Loti adacoka muSodoma, kudzulu kudagwa malaxa ya moto ndipo yadapha wentse.

³⁰Na tenepo bzin'dzacitikambo, pomwe Mwana wa Munthu akadzabzilatiza.

³¹Pantsiku imweyo ule omwe an'dzakhala ali pantsodzi penu ana bzinthu bzace m'nyumba an'dzakwanisa lini kubuluka kuti adzabzitenge. Napo ulembo omwe an'dzakhala ali kumunda mbaadzaleke kubwerera kumui.

³²Ndipo kumbukirani mkazi wa Loti.

³³Nakuti munthu omwe an'funa kusunga moyo wace an'dzautaya. Tsono ule omwe an'dzataya moyo wace ni cadidi kuti iye an'dzaupulumusa.

³⁴Ndiri kukuwuzani bzacadidi kuti, usiku bumwebo wanthu awiri an'dzakhala adagona pamphasa ibodzi, ndipo m'bodzi an'dzatengedwa mwinangoyo acisala.

³⁵Ndipo akazi awiri akadzakhala ali kupeya pabodzi, pamwepo m'bodzi an'dzatengedwa mwinango acisala.

³⁷Na tenepo iwo adamubvundza kuti: “Kodi bzimwebzi bzin'dzacitira kuponi Mbuya?” Ndipo iye adawatawira kuti: “Pale pomwe pan'dzakhala cinthu cakufa pamwepo pan'dzakonchezana magola.”