1Pantsiku ibodzi ya sabudu, Jezu adayenda kunyumba kwa m'kulu m'bodzi wa afalizeu kuti akadye. Tsono wanthu akhamubzokola.
2Pamwepo pakhana munthu m'bodzi omwe akhana matenda yacigwere-gwere.
3Ndipo Jezu adabvundza apfundzisi wa mtemo na afalizeu kuti: “Kodi mtemo umbabvumiza ayai umbabvumiza lini kulimbisa munthu pasabudu?”
4Tsono iwo alibe kutawira. Ndipo iye adatenga munthu ule acimulimbisa acimuwuza kuti ayende.
5Na tenepo Jezu adawabvundza kuti: “Mbani wa imwepo acikhala ana mwana ayai ng'ombe yace penu ikagwera mum'godi pasabudu, kodi iye angaleke kukanula?
6Tsono iwo alibe kutawira cinthu.
7Ndipo Jezu adawona wanthu omwe akhadacemeredwa pacikondweso acimbasankhula mipando yakulemekezeka, ndipo iye adawatsikira matere aciti:
8“Penu iwepo wacemedwa pacikondweso ca malowozi, leka kusankhula mpando wakulemekeza. Nakuti pan'dzakala pacemeredwa munthu wakulemekezeka kuposa iwepo.
9Ndipo nyakukucemera an'dzakuuza kuti: 'Coka pampando omweyu akhale nguyu.' Tsono iwepo na manyazi un'dzayenda ucikakhala pampando wakumalizira.
10Na tenepo ukacemeredwa, ndoko ukakhale pampando wakumalizira. Ndipo nyakukucemerayo acite kudzakuuza kuti: “Xamwali, ndoko ukakhale pampando wakulemezeka ule.” Ndipo iwepo un'dzalemekezeka pakati paalendo wentsenewo.
11Thangwe munthu ali wentse omwe an'bzitumbiza, iye an'dzanyazidwa. Na ule omwe an'bzicepsa an'dzalemekezedwa.
12Ndipo adawuzambo pomwe ule omwe akhadamucerayo kuit: “Iwepo ukacemera munthu kuti adzadye masikati ayai kudzalalira, leka kucemera axamwali wako, abale wako, na adzindza wako ayai anyapafupi wako wakudala. Kuti iwo adzaleke kukucemerambo acikubwezera bzomwe adadyabzo.
13Tsono ukacita cikondweso, cemera anyakusauka, anyakulemala, anyakupunduka na azimola.
14Na tenepo un'dzasimbidwa thangwe iwo alibe cinthu cakukubaira naco. Maka Mulungu ndiye an'dzakubaira panthawe yomwe anyakulungama an'dzamuka paimpfa.
15Pamwepo munthu m'bodzi omwe akhali patsantsali la kudyerapo pomwe iye adabva bzimwebzo adalewa kuti: “Wakusimbidwa ni munthu omwe an'dzadya mkate mu umambo bwa Mulungu.”
16Tsono Jezu adatawira kuti: “Munthu m'bodzi adacita cikondweso cikulu kwene-kwene ndipo iye adacemera wanthu azinji.
17Pomwe nthawe yakudya idakwana adatuma nyabasa kuti akawuze anyakucemeredwa kuti: “Bwerani! Bzakudya bzatokota bzentse!”
18Tsono wentse m'bodzi na m'bodzi adayamba kunyang'ana mathangwe yakulamba nayo. Ndipo wakuyamba adamutawira kuti: “Ndagula thengo kuti nditeme munda wangu, ndin'funa kutoma ndakaliwona. Na tenepo ndikhululukirenimbo mtima.”
19Ndipo mwinango adalewa kuti: “Ndagula midzombe khumi. Na tenepo ndin'funa kutoma ndakaiyezera. Ndiri kukumbira kuti undikhululukirembo mtima.”
20Ndipo mwingambo adati: “Ndalowola tsapanopa, na tenepo ndinibwera lini.”
21Ndipo mwenekaciro nyumbayo adakalipa adamuwuza kuti: “Ndoko kankulumize m'miseu, m'mankhunde mwa wanthu ukacemere anyakusauka, anyakulemala, azimola na anyakupunduka.”
22Ndipo nyabasayo adalewa kuti: “Mbuya! Ine ndakacita bzentse bzomwe mwandiwuzabzire, tsono mbuto ikalipo basi.”
23Pamwepo mbuya waceyo adamuwuza kuti: “Tsapano ndoko pomwe munjira na munkhunde ukawakakamize wanthu wentse abwere kuno kuti nyumbai idzale.
24Na tenepo wanthu wentse omwe ndatoma kucemera wale an'dzalawa lini cinthu pacikondwesoci.
25Na tenepo wanthu azinji akhamutewera. Ndipo iye adacewuka aciwauza kuti:
26Penu munthu an'funa kunditewera ndipo iye akasaya kuwengana na babace, na mamace, na mkazace, na wana wace, na abale wace, wacimuna na wacikazi na iyembo kubodzi, ndipo iye angakhale lini mteweri wangu.
27Na ulembo omwe an'saya kutakula mtanda wace acinditewera, iye angakhale lini mteweri wangu.
28Kodi mbani m'bodzi wa imwepo akafuna kumanga cinyumba cace, ambasaya kutoma kulewenga kobiri zace kuti awone penu zin'kwana kukondzera cinyumba caceco.
29Kuti bzidzasaye kucitika kuti akamala kuimisa majomicomi acisaya kumaliza, ndipo wanthu akadzawona an'dzamuseka,
30acilewa kuti: “Munthuyu, wayamba kukondza cinyumbaci, tsono alibe kukwanisa kucimaliza.”
31Ayai ni mambonyi omwe ambayenda kukamenya nkhondo na mambo mwandzace, iye ambasaya kutoma kulewenga acikunda wace kuti awone kuti na bzulu khumi an'kakwanisa kukamenya nkhondo na mwandzace omwe ana bzulu makumi mawiri ya acikunda?
32Tsono akakhala an'kwanisa lini ndipo iye an'tumiza muimikiri wace kuti akakumbire mtendere.
33Na tenepombo ule omwe an'saya kusiya bzinthu bzace bzentse iye angakhale lini mteweri wangu.
34Munyu ngwabwino! Tsono ukamala goso, bzingacitike tani kuti ukhale pomwe na goso?
35Na tenepo iwo un'phata lini basa m'munda napo kuucita manyowa. Ndipo umbataidwa kuthengo. Na tenepo ule omwe ana makutu yakubva, mbaabvesese.
