Luk 20:14-28

¹⁴“Ka navong koakeil talosilkatien enek ales natnali mul mai, keil aselus min keil eris avit, ‘?Milesi? Koanek vi natnali kati koa neiai enek heha en hen. !Rehou vini hemat! !Hemukonek, nei grep ekek hehi oser esuk!’

¹⁵Sakini, keil avuli kati ka alisi va ran nei grep enek. Evus, amu vini mat.” Navong Iesu viten tatavolien enek evus, les meatin keil ka vis keil vit, “?Mukave? ?Horetan ten nei grep enek houmon sa min meatin talosilkatien keil?

¹⁶Kei houmoni hemukok: hemai hou vini keil vasi imat. Hevus, hemaen nei grep osen min meatin sav keil ilosil kat revi.” Ka navong meatin keil alonge mukok, keil aviteni mini avit, “!Ei, Ahi sakras vamaen koanek vakur out!”

¹⁷Ka Iesu lele mal en keil ka vis keil vit, “Munak hermukteinek, vensa varei Tus Votut viteni vit, ‘Pos koa meatin keil toumien alei seseini, kei varei mai vi more vatiseng kati ten eim mulin pos sav keil.’

¹⁸‘Koakeil amusavoi eni imot ka asi keil one hemavulvul! Ka munak vatiseng koanek hemot hemal en meatin tai, meatin enek hemat varei.’”

¹⁹Navong asuv keil onen pris keil ral min tiser keil ten mengkatien keil onen Mosis alonge mukok, along kilea keke, en tatavolien koa Iesu viteni, avi koakeil alosil kat nei grep, ka Iesu mul selus vakat keil. Sakini, e vati avahuli kati, ka ametaun meatin keil koa amul rahiti lisenges.

²⁰Veni asuv keil onen pris keil ral min tiser keil ten mengkatien keil onen Mosis ametaun meatin keil, alekat sise keke avakaluvat Iesu en selusien onen. Sakini, asila tei en meatin keil taluvosien keke uva avales Iesu. Koakeil enek uva keke avaluvos visi avi more meatin keil. Veni amundemi keke munak akilea avasakin Iesu vasavoi en selusien onen, akilea avalingi en hen kavmen ten out Rom.

²¹Sakini, meatin keil taluvosien enek umai ven Iesu ka aviteni mini avit, “Tiser, mekilea keke asa keik koviteni ka asa kovisein meatin keil eni mal imok. Mekilea mun keke koles meatin vasi keil vatte tas, koakeil avi hetetamen ral min meatin kuren keil emun. Ka kovisein meatin vasi keil usil sise ten anatinien koa Ahi en vat meatin keil avousili.

²²Sakini, komai emai vati mevailea koanek ?En usite ten takis keil koa memul mevuli va min Sisa ten out Rom, mengkatien keil onen Ahi mul maen komai mevahuli, vuo romaentei?”

²³Ka Iesu lei kilea luvosien one. Sakini, viteni min keil vit,

²⁴“Alsan etai mani koa avul takis eni minau. Alles visi. ?Veinan sei ka isen sei mul ien?” Ka keil avit, “Onen Sisa.”

²⁵Sakini Iesu viteni min keil vit, “Hemukonek, mihesan asa koa onen Sisa heha ris mini. !Ka asa koa onen Ahi, mihesan risi heha min Ahi!”

²⁶Ka Farasi keil amutimanin varei en meteisauen ten selusien keil onen, sakini aro raeng enges. Ka alesi keke asakras avakaluvat Iesu en selusien keil onen en meten meatin keil.

²⁷Evus, tei en vangi Siu keil koa avise keil en ‘Satusi’ umai ven Iesu keke avakaluvati en selusien. Keil amundemi keke meatin sakras vamoul eris ran matien. Sakini aviteni min Iesu avit,

²⁸“Tiser, Mosis mutis mengkatien koanik orer: ‘Munak meatin tai mat ka lokovein ahin onen ka titaealu tovuol, tamun en tunali keil hetetalihe hetal min vatina onen. Hesakini, kei hesan titiali tai mini keke hekur isen tunali koa mat tuai.’