San Lucas 20:14-28

¹⁴Per chi guná de bɨnqui laab, ax raipdeb saadeb: “Laabɨy ná ni yanné liu rut nuu uvquɨ. Gultoo idinxúnbɨ, par chalee gac guɨchliuc xtennɨ.”

¹⁵Chiy guléedeb laab lo liuqui ax gudinxúdeb laab. Jesús gunabdiidxny de bniety ni caninény: —Anre laat, ¿xa rlilot gunné bniety ni ná xtenni guɨchliuqui laadeb?

¹⁶Rguixtiia lot dec laab zeedbɨ par quinxúb laadeb ne sdeedbɨ guɨchliuqui stuby de bniety. Chi bindiagdeb ziy ax guniideb: —¡Quɨt cuelaaz Dios gac ziy!

¹⁷Per Jesús bguiaany lodeb ax guniiny: —Belati gati ziguiy, ¿xi zelo ni cá lo xquiits Dios rut rnii?: Guia ni aldi guleguun de ni rzuub yuu, guiaqui ná ni mazru blliú par guzub yuuqui.

¹⁸Tutix ni ldap guiaqui, laab sdeedbɨ guelzii. Per belati guiaqui yabni quia bniety ax snitlotecni bniety.

¹⁹De bxoz ni rnabee de bxoz cun de maistrɨ ni nán ley hóracqui rcaazdeb ninaazdeb Jesús, te pur gucbeedeb dec ni guniiny ná contrɨ laadeb, per bdxibdeb de bniety.

²⁰Ax bxiaalddeb de ni zeldaats laany, digaizy gúndeb dec laadeb nádeb bɨnzaac, par quíilydeb nez inii Jesús tuby diidx ni chalee gúndeb entriagu laany lo gobernador xte Roma.

²¹Chiy gunabdiidxdeb laany: —Maistrɨ, dunnɨ nánnɨ dec laabiu rniibiu ne rliuubiu zec ni riáld. Te pur nez lobiu tubylote ná bniety ne guldípacbiu rliuubiu bniety xa xquel rcaaz Dios ibány bniety.

²²Guniibiu dunnɨ, ¿ta ná güen idillynɨ xte impuest lo gobernador xte Roma, o quɨt náti güen?

²³Per Jesús gucbeegacny de mal xgab xtendeb ax raipny laadeb:

²⁴—Gul liuu nare tuby mɨly. ¿Tú lon cá loc, ne tú láng cá loc? Laadeb cuaibdeb: —Xte rey César.

²⁵Chiy raipy Jesús laadeb: —Guldeed César ni ná xte César, ne guldeed Dios ni ná xte Dios. Ax quɨt xi dixúti bdxialdeb nicuaquiadeb laany pur de ni guniiny nez lo irate bniety.

²⁶Rdxalotisdeb zec ni cuaibny lodeb, ax quɨtru xi guniitideb.

²⁷Chiguld tuby tiop de bɨny saduceu güeguiaadeb Jesús. Ne de saduceuqui quɨt reldilaaztideb dec sbány de bɨnguty stuby. Pur ningui raipdeb Jesús:

²⁸—Maistrɨ, ley xte Moisés rnii dec belati gaty tuby bniety nguiu ne isáanbɨ chialbɨ sin quɨt niactideb de family, chiy bets bniety ni gutyqui ná par guchnaab viudqui par gacdeb de family xlat betsbɨ ni gutyqui.