LUCAS 20:14-28

¹⁴Per chene wii yra mén guin xpee men, wulsaa men diiz, re men: “Laa ménree nak ne gyanno blag ubree; yoo yket be men, chen gyanno bo laa be.”

¹⁵Lex wboo yra mén guin mee guin lo lyu guin, wket men mee. ’Naaree naa, ¿pagox ylaa xpexwaan blag ub yra mén guin?

¹⁶Yna noo lo de ne chiid men yket men yra mén guin, lex ydee men blag ub lo stebëd mén. Chene won yra mén guin zenga, re men: ―¡Naleg Dëdyuzh gakdet zenga!

¹⁷Per wii Jesus lo men, lex re Ne: ―¿Pagox rna ne re lo xgyiich Dëdyuzh cheguin? Nga re: Gye ne axtegue rlaandet mén ne rlep yuu, laa we wak gye ne mazre rkyiindee.

¹⁸No kwaskyertee men ne gyab led gye guin, zakbyu men, per belne gyab gye guin led men, zakbyudoo men.

¹⁹Wlaan yra maxter ley yra men fxuz ne rnebééy lo yra fxuz nguu men Jesus chegyiib orgueguin, porke wyenen men ne por laa por laandxee men wzëët Ne yra diiz guin, per wdxe men mén.

²⁰Lex wxaal men tebëd mén ne noze rkanlo wen, za men gwleedx, chen gan pe gue Ne chen tsël gan pezee ydekwent men Ne lo gobernador.

²¹Por neguin re men lo Ne: ―Maxter, nan noo yra noo ne ryal ne rnii de no ne rneluu de no ne zadet lextoo de gan txu nak mén, sinke nli ne rneluu de ne ybán mén zegne rlaan Dëdyuzh.

²²Guna gan ¿pe wen gyizh noo zeg impwest lo rrey-Roma u wendeto?

²³Per kom wyenen Ne ne ngyidet ne rlebleedx men, lex re Ne lo men: ―¿Penak rye de gan pezee gyab noo lo xetramp de?

²⁴Guluu te med lo noo. ¿Txu lo wa no txu la wa ka lo we? Wke men re men: ―Lo rrey-Roma we no le la rrey-Roma we.

²⁵Lex re Ne lo men: ―Guex gudee ne nak xen rrey lo rrey, le ne nak xen Dëdyuzh gudee lo Dëdyuzh.

²⁶No delo lo yrandxee diiz ne re Ne nes lo yrandxee mén, axtegue bet wzëldet gan pe nkanlo men chen nkagyii men Ne, lel rzee rzak men yra ne rke Ne. Noze chi wbiin men.

²⁷Wa tebëd men ne nak sadusew lo Jesus. Kom rlaleedxdet men ne sban mengut, por neguin re men lo Ne:

²⁸―Maxter, lo ley ne wdee Dëdyuzh lo Moises zëëd ne belne guet te mén, per wapdet xewnaa men mëëd, bech men rap degne ytsëlnyano wnaa guin, chen gap men mëëd ne gak zegnak zhiin mén guin ne wet.