LUKA 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Panthawe imweyo pakhana wanthu omwe adawuza Jezu nkhani ya agalileu omwe adaphedwa ndipo Pilato adasanganiza mulopa na ntsembe zawo.

²Na tenepo iye adawabvundza kuti: “Kodi mun'kumbuka kuti agalileu omwe adaphedwa akhali anyakuphonya kwene-kwene kuposa andzawo, kuti abonere tenepoyo?

³Ndiri kukuwuzani kuti, akhali lini. Tsono mukasaya kukhumbula mun'mala mwentse ninga iwombo.

⁴Ayai kodi mun'kumbuka kuti wanthu khumi na asere omwe adagweredwa na cinyumba ca Silowee ciciwapha, akhali anyakuphonya kwene-kwene kuposa wanthu wentse wa kuJeruzalema?

⁵Ndiri kukuwuzani pomwe kuti akhali lini. Tsono imwepo mukasaya kukhumbula mun'mala mwentse ninga iwombo.

⁶Ndipo Jezu adawatsikira matere aciti: “Munthu m'bodzi akhadabzala mkuyu m'munda mwace. Ndipo adayenda kuti akache nkhuyu, tsono iye adazisaya.

⁷Na tenepo iye adawuza nyakulindira mundayo kuti: 'Kwapita magole matatu pomwe ndidaubzala mkuyuyu. Lero ndanyang'ana-nyang'ana mwentsenemu tsono ndiribe kuwona cinthu. Ugwate! Thangwe ranyi uli kundodya mbuto pamwepa?'

⁸Tsono iye adatawira kuti: 'Ulekeni, Mbuya, gole lino lokha. Ine-pano nin'ucerera-cerera ndicikha manyowa.'

⁹Penu un'dzabala, n'psabzabwino basi. Ayai ukadzasaya kubala ndipo mudzaugwate bwino.”

¹⁰Pasabudu linango Jezu akhapfundzisa m'nyumba ya kupembera ibodzi.

¹¹Ndipo m'mwemo mudabwera mkazi omwe akhadapundusidwa na ciwanda magole khumi na masere. Na tenepo akhafamba kota-kota nakuti iye akhakwanisa lini kuthamula na pang'onopo.

¹²Pomwe Jezu adamuwona, adamucemera aciti: “Mkaziwe! Watsudzuka pakuborena kwako na matendaya.”

¹³Pamwepo adam'sanjika manja. Ndipo iye adathamuka, na tenepo adapasa mbiri Mulungu.

¹⁴Tsono mkulu wa nyumba ya kupembera pomwe adawona kuti Jezu adamulimbisa pasabudupo iye adakalipa, aciwuza wanthu kuti: Imwepo muna ntsiku zitanthatu zokha za basa. Mukafuna mubwere ntsiku zimwezo mudzalimbisidwe, si kuti pasabudu.

¹⁵Ndipo Mbuya adamutawira kuti: “Mpfakafakamwe. Kodi imwepo mumbafungulira lini pasabudu ng'ombe na mabulu m'mathanga mwanu kuti mukamwese?

¹⁶Kodi bzikhali lini bwino kumutsudzula ntsingazi mwana wa Abramuyu pasabudu? Nakuti Sathani akhadam'manga magole khumi na masere.

¹⁷Pomwe iye adamala kulewabzimwebzo anyakumuwenga wentse adanyala. Ndipo wanthu wentse adakomedwa na bzinthu bzomwe Jezu adacitabzo.

¹⁸Ndipo Jezu adawabvundza kuti: “Kodi Umambo bwa Mulugu mudakhala ninga ciani? Ningadzabulinganize nanyi?”

¹⁹Budakhala ninga njere ya mtowe yomwe munthu adabzala m'munda mwace. Ndipo iyo idamera icisanduka muti ukulu. Na tenepo mbalame zidakondza bzitsa m'mithawi mwawene.”

²⁰Na tenepo adawabvundza pomwe kuti: Kodi ningandendemeze nanyi umbambo bwa Mulungu?

²¹Ningabundendemeze na cimera comwe mkazi m'bodzi adasanganiza na phala m'mitsoko mitatu, mpaka bzentse bziciwira.”

²²Pomwe Jezu akhayenda kuJeruzalema adapita na m'mizinda na m'mii acimbapfundzisa.

²³Ndipo munthu m'bodzi adam'bvunza kuti: “Mbuya! Kodi wanthu omwe an'dzapulumusidwa mbang'ono-ng'ono?” Iye adamutawira kuti:

²⁴“Pitiratuni pomwe msuwo ukali bwandzupa. Ndiri kukuwuzani cadidi kuti wanthu azinji an'dzafunambo kupita tsono an'dzakwanisa lini.

²⁵Nakuti mwenekaciro nyumba akadzalamuka acifunga msuwoyo. Ndipo imwepo mun'dzasala kunja. Na tenepo mukadzagugudza msuwoyo mucikuwa kuti: 'Mbuya! Mbuya! Tifungulirenimbo!' Ndipo iye an'dzatawira kuti: 'Nin'kudziwani lini kuti ndimwe yani imwepo.'

²⁶Na tenepo imwepo mudzadandaula kuti: 'Ndife-pano omwe tikhadya ticimbamwa namwe pabodzi, ndipo imwepo mukhambatipfundzisa m'miseu mwathu.

²⁷Tsono iye an'dzakutawirani kuti: 'Ndinikudziwani lini ine. Cokani pano! Thangwe imwepo mwentse ndimwe anyakuphonya.'

²⁸Pamwepo ndipo mun'dzalira mucikeketa mano pomwe mukadzawona Abramu, Izaki, Jakobi na apolofeta wentse ali mu umambo bwa Mulungu. Ndipo imwepo mucisala kunja.

²⁹Na tenepo wanthu azinji an'dzabwera kucokera kumabvadzuwa na kumadokero, kudzaulu na kunyantsi acidzakhala m'mipando ya pacikondweso ca umambo bwa Mulungu.

³⁰Ndipo wanthu winango omwe mbakumalizira an'dzakhala wa kuyamba. Na winangombo wakuyamba an'dzakhala wa kumalizira.

³¹Panthawe imweyo adabwera afalizeu winango acimuwuza kuti: “Coka pano! Thangwe Herodi an'funa kukupha.”

³²Ndipo iye adatawira kuti: “Ndokoni mukamuwuze kalikhooyo kuti: 'Ine-pano lero na mangwana ndinizula bziwanda na kulimbisa atenda. Tsono mkuca ndipo ndin'dzamaliza.'

³³Na tenepo ndiri kuphata njira lero, mangwana na mkuca. Nakuti mpolofeta wentse bzin'funika lini kuti afera kunja kwa Jeruzalema.

³⁴Jeruzalema! Jeruzalema! Umbapha apolofeta na kuboma atumiki wa Mulungu. Kodi ni kangasi ndikhafuna kale kukumbatirira wana wako, ninga momwe nkhuku imbabwamira tutiyo twayene, m'mapapidwe. Tsono imwepo mudalamba mwekha!

³⁵Ndipo nyumba yanu in'dzasala iribe munthu. Na tenepo ndiri kukuwuzani cadidi kuti mun'dzandiwona lini pomwe mpaka imwepo mucidzalewa kuti: “Wakusimbidwa ni ule omwe ali kubwera mudzina la Mbuya.”