1Pomwe Jezu akhayenda ulendo bwace, ndipo iye adapita na njira mumzinda waJerikoo.
2Ndipo munthu m'bodzi dzina lace Zakeu, mkulu wa anyakupimisa mtsonkho, ndipo iye akhadadala pomwe kwene-kwene.
3Ndipo iye akhafuna kudziwa Jezu. Tsono iye akhakwanisa lini kumuwona na thangwe ra wanthu ndipo iyembo akhali m'fupi pomwe kwene-kwene.
4Na tenepo iye adathamanga kutsogolo kwa wanthuwo acikakwira mu mkuyu kuti amuwone Jezuyo. Nakuti iye angadadzapita na pamwepo.
5Pomwe Jezu adafika pamwepo adanyang'anisa m'dzulumo acimuwuza kuti: “Zakeu, buluka kankulumize! Nakuti ine-pano ndin'funa kuyenda nawe pabodzi kumui kwako lero”
6Na tenepo iye adabuluka na kankulumize aciyenda naye pabodzi kumui kwaceko acimutambira na kukondwa kwene-kwene.
7Ndipo wanthu wentse omwe adawona bzimwebzo akhang'ung'udzika acimbati: “Onani ule, wakafikira kumui kwa munthu nyakuphonya.”
8Tsono Zakeuyo adalamuka acimuwuza Mbuya aciti: “Bvani Mbuya, ine-pano ndinipambula bzinthu bzangu bzentse pakati ndicipasa anyakusauka. Penu ndidabera munthu ndinim'bwezera kanai kentse.
9Ndipo Jezu adamuwuza kuti: “Cipulumuso cafika m'nyumba muno lero. Thangwe umweyu ni mwanambo wa Abramu.
10Nakuti Mwana wa Munthu adabwerera kudzalinga na kupulumusa wanthu wakutaika.
11Pomwe iwo akhabva bzimwebzo ndipo Jezu adawatsikira matere. Nakuti iwo akhali pafupi na Jeruzalema ndipo akhakumbuka kuti umambo bwa Mulungu bungadawonekeratu pamwepo.
12Ndipo Jezu adawawuza kuti: “Pakhana munthu m'bodzi wambiri omwe adayenda kudziko la kutali kwene-kwene, kuti akatambire umambo ndipo akamala acibwerera.
13Ndipo iye adacemera anyabasa wace khumi, aciwasiira wentse kobiri za minyezi mitatu-mitatu, aciwawuza kuti: 'Ndiri kukusiirani kobirizi kuti mucitire nazo malonda mpaka kubwerera kwangu.”
14Tsono wanthu wa m'muimo akhamuwenga, ndipo iwo adatumiza muimikiri na mafala aciti: “Ife-pano tinifuna lini kuti munthu omweyo akhale mambo wathu.”
15Pomwe iye adabwerera kucokera kukatambira umambo bwacebo. Ndipo adacemeresa anyabasa wace omwe akhadasiyira kobiri wale kuti adzawabvundze kuti ni mphindu lanyi lomwe adawona na kobirizo.
16Ndipo wakuyamba adabwera acilewa kuti: 'Mbuya, kobiri yanu yamphindula pomwe zinango khumi.'
17Na tenepo mbuya waceyo adamutawira kuti: 'Bzakoma kwene-kwene, ndiwe nyabasa wabwino! Nakuti wakhulupirika na cinthu cing'ono ndipo un'dzatonga mizinda khumi.
18Ndipo adabwerambo waciwiri aciti: 'Mbuya, kobiri yanu yaphindula pomwe zixanu.'
19Na tenepo umweyo adamutawira kuti: 'Iwepo un'dzatonga mizinda mixanu.'
20Ndipo adabwerambo pomwe winango aciti: 'Kobiri yanu iyi mbuya, ndikhadaikoya, idamangirira papfundo.
21Nakuti ndikhanamwe mantha, thangwe ndimwe wanthu wakunesa kwene-kwene. Mumbatenga cinthu comwe n'canu lini. Ndipo mumbabvuna bzomwe mulibe kubzala.'
22Ndipo iye adatawira kuti: 'Nyabasa wakuipa, ndin'kumanga mulandu na thangwe ra mafala yakoya. Nakuti iwepo ukhadziwa kale kuti ine-pano ndine munthu wakunesa kwene-kwene, ndinimbatenga bzinthu bzomwe mpsangu lini. Ndipo ndinimbabvuna bzomwe ndiribe kubzala.
23Thangwe ranyi ulibe kukakoya kobiri yanguyo kuthenthe la kobiri? Pomwe ine-pano ndingadadzabwera ndipo ndingadadzaitambira na phindu.
24Ndipo iye adawuza wale omwe akhali pamwepo, kuti: 'Mutengereni kobiriyi, mupase omwe ana kobiri khumi ule.'
25Na tenepo iwombo adatawira kuna mbuyayo aciti: 'Iye anazo kale khumi!'
26Tsono ndiri kukuwuzani kuti: 'Munthu omwe ana bzinthu bzizinji andzatambirambo pomwe bzizinji. Tsono ule omwe alibe na cinthu, napo bzing'ono-ng'ono anabzobzo adzatengeredwa pomwe.
27Na tenepo anyamadulanthaka wangu omwe akhafuna lini kutongedwa na ine wale, abwereseni pano muwaphe ndiciwona maso.”
28Pomwe adamala kulewa bzimwebzo, Jezu adatsogola njira paulendo bwace bwa kuJeruzalema.
29Pomwe adafika kufupi na mii ya Betifaje na Betanya, pafupi na phiri la Olivera, iye adatuma ateweri wace awiri.
30Ndipo iye adawawuza kuti: 'Ndokoni m'mui omwe uli kutsogolo kwanuyo, mungakafika mun'kawona kabulu kadamangirira, komwe kakanati kupakiridwa na munthu. Ndipo mukakatsudzule mucibwera nako kuno.
31Penu munthu an'kakubvundzani kuti: “Thangwe ranyi muli kukatsudzula?” Ndipo imwepo mukamutawire kuti: “Mbuya ali kukafuna.”
32Na tenepo iwo pomwe adayenda adakabziwona bzentse ninga momwe Jezu akhadawauzira.
33Pomwe iwo akhatsudzula kabuluko, ndipo wenekaciro adawabvundza kuti: ''Kodi thangwe ranyi muli kukatsudzula kabuluka?”
34Na tenepo iwo adatawira kuti: “Thangwe Mbuya ali kukafuna.
35Ndipo iwo adakabweresa kuna Jezu, acitandika bzakubvala bzawo pakabulupo acimuthandiza Jezuyo kupakira.
36Pomwe iye akhayendapo wanthu akhatandikambo bzakubvala bzao munjira.
37Pomwe akhafika phompho la phiri la Olivera, mthithi wa ateweri wace wentse adayamba kusekerera, acimbatumbiza Mulungu na kukuwa, na thangwe ra matsenga yentse yomwe iwo adawona.
38Ndipo akhambalewa kuti: “Wakusimbidwa ni mambo omwe ali kubwera mu dzina la Mbuya! Mtendere kudzulu na mbiri kuna Mulungu wa kudzulu-dzulu.”
39Ndipo afalizeu winango omwe akhali pakati pamthinthi wa wanhtuwo adalewa kuti: “Misiri, uza ateweri wakowa kuti anyamale!”
40Tsono iye adawatawira kuti: 'Ndiri kukuwuzani cadidi kuti napo iwo akanyamala minyalai in'kuwa basi.
41Pomwe Jezu akhafika pafupi aciwona mzinda wa Jeruzalema iye adalira na ntsisi.
42Ndipo iye adalewa kuti: “Iwepo ungadakhala un'dziwa kuti n'ciani cingakupase mtendere lero-lino. Nakuti ico cidabisika ndipo ungaciwone lini na maso yako.
43Nakuti zin'dzafika ntsiku zomwe anyamadulanthaka wako an'dzakugwanjirira acikucerera cidindi ca cakukupanirira na kukubzinya kwentse-kwentse.
44Ndipo an'dzakupeyera kubodzi iwepo na wana wako mkatimo. Na tenepo an'dzasiya lini mwala udasanjika padzulu paundzace. Thangwe ulibe kuzindikira nthawe yomwe Mulungu wabwera kudzakuwona.
45Ndipo iye adapita m'nyumba ya Mulungu aciyamba kuthotha wanthu wentse omwe akhacita malonda mkatimo.
46Na tenepo iye adawawuza kuti: “Bzidanembedwa kuti nyumba yangu in'dzakhala nyumba ya kupembera. Tsono imwepo muli kuiyesa nkhunde ya mbava.
47Ndipo Jezu akhapfundzisa ntsiku zentse m'nyumba ya Mulungu. Tsono akulu-akulu wa azibaba wa ntsembe na apfundzisi wa mtemo, na atsogoleri wa mbumba akhafuna kumupha.
48Tsono iwo akhasaya mpata kuti angamucite tani, nakuti wanthu wentse omwe akhamubva, akhatengeka mitima na mafala yaceyo.
