LUKA 20:14-28

¹⁴Ila waja iwalimi viwamonile, wailongela, ‘Ino iyo muhazi wake mwene mgunda. Natumkome, na uhazi wake wowa wetu!’

¹⁵Avo wamwasa hanze ya umgunda, abaho, wamkoma.” Yesu kawauza, “Ija mwene umgunda wa izizabibu kowatenda choni waja iwalimi?

¹⁶Kokwiza kuwakoma wanhu waja, na umgunda wa izizabibu kowagwaa walimi wayagwe.” Wanhu viwahulike gano, walonga, “Sambigatulawilile gano!”

¹⁷Ila Yesu kawalola, abaho, kawauza. “Nyandiko zino Zing'alile nhegulo yake choni? ‘Dibwe dilemigwe na wazenzi digaluka kuwa dibwe da kutamanilwa ng'hani kubanza mabwe gose.’

¹⁸Munhu yoyose yondayadigwile dibwe dija kokanhika vidanga vidanga, na kamba dibwe dija dihamgwila munhu, domsiginha lipilipi.”

¹⁹Wafundiza Malagizo ga Musa na wakulu wa wakulu wa nhambiko bahaja walonda kumgoga Yesu, kwavija wavitanga kamba kadilonga hala dino yowalonga hewo, ila wawadumba wanhu.

²⁰Wakala womuhembula ng'hani, abaho, wawatuma visepi waitendile kamba wanhu wanogile. Watamanila kumnamata Yesu mmbuli zayalongile, giladi wamgoge wamgele mmakono ga mkulu wa undewa wa Loma.

²¹Wanhu waja wamulongela Yesu, “Mkulufunzi, tuvitanga kamba kolonga na kufundiza mbuli za kweli, na kamba hudumba kihanga cha munhu yoyose, ila kofundiza ikweli vija Mulungu voyowalonda wanhu watende.

²²Tulongele, vino vinoga tweye kuliha kodi ha mkulu wa undewa wa Loma ama havinogile?”

²³Ila Yesu kaumanya ubala wao, kawalongela,

²⁴“Ndagusileni ihela. Twaga na kihanga kino kili muno cha munhu yalihi?” Walonga, “Va mkulu wa undewa wa Loma.”

²⁵Avo Yesu kalonga, “Vinoga. Avo muliheni mkulu wa undewa wa Loma vija vili va mkulu wa undewa wa Loma, na muliheni Mulungu vija vili va Mulungu.”

²⁶Hawadahile kumnamata mmbuli ziyalongile haja hameso ga wanhu, avo wanyamala, wakanganya nyidikilo yake.

²⁷Abaho, Masadukayo wayagwe, waja wolonga kamba wanhu hawazuka, weza ha Yesu na mbuza,

²⁸walonga, “Mkulufunzi, Musa katwandikila tweye lagizo dino, ‘Kamba munhu yahadanganhika na kaleka mwehe ila halelile nayo mwana, mdodo ama mkulu wa munhu hiyo kolondigwa yamsole ija ikizuka yamulelele wana ndugu yake yadanganhike.’