Luka 20:14-28

¹⁴Tauitaitawata ia se ita, se oioiriba, si ene, ‘Tanuaga ede teina: ehei! ia ta unui, oea ta abo ta abi itabom eda oea.’

¹⁵Arinai vine oeana eai ia se heduiahalai, eo se unuhemate. Vine oeana tanuagana tatao wa ia abo edoha ena abiabidi?

¹⁶Ia abo i laoma oea tauitaitawataina wa abo i unuhematedi, vine oeana abo i mosei hari tatao aridi eai.” Isi riba ta se ataiei abo si ene, “Eaubada taba nige meta doha!”

¹⁷Ia i itadi, i ene, “Ina riba ta saha se uriyao si ene, ‘We’u wa numa tauabina se gabaei, iaede i hemala we’u tubeina eai i lau.’

¹⁸Tau esau eo esau i beu teina we’u ta potana eai abo i tamogorugoru; ia we’u wa i beu potana eai, ia abo i hemala ahu.”

¹⁹Nei huiana eai ne kohena lailaidi eo tauuriuri tataodi edi dobila se eooi bena ia se abilau nimadi eai: tatao mo se matausiedi; paana se itayao teina parabole ta i ribaei wa arinai i hegirudi.

²⁰Isi ia se itaitasipoi tauwesewese se hetamaridi se lau se boraborai, si ene bena isi tau laulaududurai tataodi, bena riba se hepilipili ia abo se moselaei gavana nimana gigiborina eai.

²¹Isi ia se oimurini, si ene, “Tanuagamai e, ai nuatui oa em riba eo em lauheata se dudurai, hinage nige tau esau u heasisinapai, Eaubada ena dobila tatao u heatamamohoiedi.

²²Laugagaeo i ene saha, i dudurai Kaisara takisi monina ta mosei, e nige’e?”

²³Edi borabora i italobaidio, ie ribalau aridi eai i ene, “Aue saha au nohoigu ta?

²⁴Hage denari esega au heitagu. Eai ana ao, eo eai ena uriuri ede meta?” Arinana se heuio, si ene, “Kaisara enana.”

²⁵Abo i ribalau aridi eai, i ene “Kaisara ena ginauri au laei Kaisara arinai, eo ena Eaubada ena ginauri au laei Eaubada arinai.”

²⁶Ena riba nige se hepilipilidi tatao matadi eai: ena riba se noonooei: nige ariarinadi.

²⁷Sadukea tataodi headi abo se laoma ia arinai, edi nuatu si ene, tatao nige mate eai se torouio, ia se oimurini

²⁸si ene, “Tanuagamai e, Mose ena uriuri arimai eai i ene, tau esau, ena doga i tawasorao ie mate nige nanatunayao, ena doga abo ena wabu i hai tumadiyao abo i hetubudi ena doga wa enana.