1Ndipo Jezu adacemera ateweri wace khumi na awiri. Na tenepo iye adawapasa mphambvu zakuzula nazo bziwanda na zakulapa matenda.
2Ndipo adawatuma pomwe kuti akapalize umambo bwa Mulungu na kukalapa atenda.
3Na tenepo iye adawauza kuti: “Lekani kutakula cinthu cibodzi cokha ca kuphata m'manja, ninga m'psimbo, budu, mkate, kobiri, ayai mikanjo miwiri.
4Panyumba pomwe mun'fikirapo, khalani pamwepo mpaka kucoka kwanu mui umweyo.
5Wanthu omwe an'saya kukutambiraniwo akutumulireni pfumbi la m'minyendo mwanu, kuti likhale umboni bwanu kuna iwo.
6Ndipo iwo adayenda m'mi yentse kukapaliza nkhani yabwino na kukalapa atenda kumphimpha zentse.
7Pomwe Mambo Erody adabva bzentse bzomwe bzikhacitikabzo iye adaneseka kwene-kwene. Thangwe wanthu akhalewa kuti Juwau wamuka pomwe pa paimpfa.
8Winango akhalewa kuti Eriya wabwerera pomwe. Ndipo winangombo akhati m'polofetapolofeta winango wakale-kale wamuka pomwe pa paimpfa.
9Na tenepo Erody adalewa kuti: “Juwau ndidamugwatisa kale msolo. Tsono mbani winango omwe ndiri kumubvera mbiriyo?” Ndipo Erody akhafunisisa kuti amuwone.
10Pomwe atumikiwo adabwerera adakamulongosolera Jezu bzentse bzomwe adacita. Ndipo iye adawatenga aciyendanawo kumzinda wa Betsaida.
11Pomwe wanthu adabva bzimwebzo, ndipo iwo adamutewera. Na tenepo Jezuyo adawatambirambo bwino, aciwafotokozera Umambo bwa Mulungu. Ndipo iye adanthandiza atenda omwe akhafuna kulapidwa.
12Pomwe kukhadoka, ateweri wace adamuuza kuti: “Abalaliseni wanthuwa kuti ayende m'mii na m'minda yomwe iri m'fupi-m'fupi muno kuti akakumbire malo na cakudya. Thangwe tiri kuno n'kuthengo.
13Ndipo iye adawauuza kuti: “Apaseni cakudyaco imwepo.” Tsono iwo adatawira kuti: “Tiribe cakudya cizinji, tina mikate mixanu na ntsomba ziwiri basi. Pinango ticite kukawaguala cakudyaco kuti iwo wentse akwane!
14Pamwepo pakhana wanthu amuna ninga bzulu bzixanu. Ndipo iye adawauuza ateweriwo kuti: “Akhazikeni m'magulu ya makumi-maxanu, makumi-maxanu.
15Ndipo ateweriwo adawakhazika tenepoyo.
16Pamwepo iye adatenga mikate mixanuyo na ntsomba ziwirizo, adanyang'anisa kudzulu acibzisimba. Ndipo adabzigwata-gwata, acipasa ateweri kuti agawire wanthu.
17Na tenepo wanthuwo adadya acikhuta wentse. Ndipo adalokota mbvululu zakusala acidzaza bzitundu khumi na bziwiri.
18Pantsiku inango Jezu akhana ateweri wace. Ndipo iye akhapemba yekha kumbali Na tenepo iye adawabvundza kuti: “Kodi wanthu ambalewa kuti ine-pano ndine yani?”
19Ndipo iwo adatawira aciti: “Winango ambalewa kuti ndiwe Juwau M'batizi. Winango ambalewa kuti ndiwe Eriya. Winangombo ambalewa kuti ndiwe mpolofeta wakale-kale omwe adafa wamuka pomwe.
20Pamwepo iye adawabvundza kuti: “Kodi imwepombo mumbalewa kuti ndine yani?” Ndipo Pedru adatawira kuti: “Ndiwe Krixtu wa Mulungu.”
21Tsono iye adawacenjeza kuti aleke kuuza munthu na m'bodziyo ekha bzimwebzo.
22Na tenepo iye adawauza pomwe kuti: “Mwana wa Munthu andzabonera kwene-kwene. Ndipo iye an'dzalambidwa na atsogoleri wa wanthu, na akulu-akulu wa azibaba wa ntsembe na apfundzisi wa ntemo. Na tenepo iye an'dzaphedwa. Tsono an'dzalamuka pomwe pa paimpfa zikadzapita ntsiku zitatu.
23Ndipo iye adawauuza kuti: “Penu munthu an'funa kunditewera, cakuyamba mbaabzilambe yekha acitakula mtanda wace ntsiku zentse kuti anditewere bwino.
24Ndipo munthu ali wentse omwe an'funa kupulumusa moyo wace, mbaatome kuutaya nakuti ule omwe an'taya moyo wace na thangwe rangu, iye adzaupulumusa pomwe.
25Kodi munthu angakhale na phindu lanyi akawona bzinthu bzentse bza pa padziko la pantsi, iye akamala n'kubzipha ayai n'kubzikweteka ekha?
26Nakuti munthu ali wentse omwe an'bva manyazi na ine na mafala yangu, ndipo Mwana wa Munthu adzamubverambo manyazi akadzabwera na mbiri yace na ya Baba na ya Anjo wakucena.
27Dziwani kuti pana winango pamwepano iwo an'dzafa lini acidzasaya kuwona Umambo bwa Mulungu.
28Pakupita ntsiku zisere pomwe Jezu adalewa mafalaya, iye adatenga Pedru na Juwau na Tiyago acikwira nawo m'phiri kuti akapembe.
29Pomwe iye akhapembapo, nkhope yace idasandulika na bzakubvala bzace bzidacena ninga kupenya kwa Mulungu!
30Ndipo panthawe imweyo adawoneka wanthu awiri acimbalewa-lewa naye: iwo akhali Mozeji na Eriya.
31Na tenepo iwo akhadayetima kwene-kwene acimbalewa bza mayendedwe ya Jezuyo yomwe yangadadzacitikira kuJeruzalema.
32Ndipo Pedru na andzace akhadagona tulo. Tsono pomwe iwo adapenya, adawona kuyetima kwace na kwa andzace omwe akhanaye pabodziwo.
33Pomwe iwo akhayenda, Pedru adauza Jezu kuti: “Mbuya, n'psabwino kuti tikhaliretu pompano! Mbatikonzde bzikumbi bzitatu: cibodzi canu, cinango ca Mozeji na cinango ca Eriya.” Tsono iye akhadziwa lini kuti ali kulewa ciani.
34Panthawe akhalewa bzimwebzopo udabwera mtambo uciwagwanankhira. Pomwe iwo akhali munthambomo adabva mantha.
35Ndipo munthambomo mudabveka fala liciti: “Uyu ni Mwanangu, omwe ndidasankhula! Mutetekereni.”
36Pomwe falalo lidanyamala Jezu adasala yekha. Ndipo iwo adanyamala basi pantsiku zimwezo. Na tenepo iwo alibe kuuza munthu bzomwe adawonabzo.
37Pomwe iwo adabuluka m'phirimo mangwana yandzace, nthithi wa wanthu azinji kwene-kwene udabwera kudzawona Jezu.
38Ndipo munthu m'bodzi adakuwa panthithipo aciti: “Mbuya ndiri kukukumbirani kuti mundiwonerembo mwananguyu. Nakuti iye ni m'bodziyu yekha.
39Ndipo iye ambagwa ciwanda, panthawe imweyo ambakuwa-kuwa cicimugwesera pantsi na kunjenjemera, acimbacoka maphobvu. Ndipo pakumalizira cicimutcola manungo.
40Na tenepo ndikhadakumbira kale ateweri wanuwa kuti acithothe tsono alibe kucikwanisa.”
41Ndipo Jezu adalewa aciti: “Nandi dzindza la wanthu wakusaya kukhulupira na kusaya ndzerumwe! Kodi mun'funa kuti ndikhale namwe ndicikubonerereni mpaka lini? M'bwerese kuno mwanakoyo.”
42Pomwe akhayenda naye mwanayo, ndipo ciwandaco cidamuthusa pantsi acimbanjenjemera. Tsono Jezu adacizula. Pamwepo mwanayo adalimba ndipo acimupereka kuna babaceyo.
43Na tenepo wanthu wentse adadabwa na mphambvu za Mulungu. Nakuti wanthu wentse adadabwa na bzomwe akhacita Jezu. Na tenepo iye adauza ateweri wace kuti:
44“Bvesesani bwino mafala yanguya: 'Mwana wa Munthu ankaperekedwa m'manja mwa wanthu.”'
45Tsono iwo alibe kubva bwino mafalayo. Nakuti yakhali yakubisika kuna iwo asye kuyabvesesa. Na tenepo iwo adagopa kumubvundza.
46Ndipo ateweriwo akhaganizana okha-okha kuti mbani nkulu pakati pawo.
47Pomwe Jezu adadziwa ndzeru zawo, atenga mwana acimuimisa pana iyepo.
48Ndipo iye adawauza kuti: “Munthu omwe an'tambira mwana ninga uyu mu dzina langu, iye an'tambirambo ine-pano. Ndipo ule omwe an'tambira ine ule, iye an'tambirambo ule omwe adandituma. Nakuti ule omwe an'bzicepsa pakati panupa, umweyo ndiye nkulu.”
49Ndipo Juwau adatawirambo kuti: “Misiri, tawona munthu ali kuzula bziwanda mu dzina lanu. Tsono ife-pano tamuletsa thangwe iye ngwathu lini.
50Ndipo Jezu adamutawira aciti: “Lekani kumuletsa, thangwe munthu omwe ambaticitira lini kuipa, omweyo ngwathu.”
51Pomwe idakwana nthawe yace Jezu kuti akwire kudzulu, iye adalonga ulendo kuti ayende kuJeruzalema.
52Ndipo adatsogoza atumiki wace kuti akanyan'gane malo. Na tenepo iwo adafika m'mui wa Asamaliya.
53Tsono wanthu wa m'mwemo alibe kumutambira thangwe iye akhandopita njira aciyenda kuJeruzalema.
54Pomwe Juwau na Tiyago adawona bzimwebzire, adamubvundza Jezu kuti: “Mbuya, kodi munfuna kuti ticemerese moto wakudzulu kuti uwatenthe?
55Tsono Jezu adaceuka aciwakalipira.
56Pomwe adamala bzimwebzo iwo adayenda kumui winango.
57Pomwe iwo akhayenda munjira, munthu m'bodzi adalewa kuti: “Mbuya, ndinikutewerani kwentse komwe muniyendako.
58Ndipo Jezu adamutawira aciti: “Akalinkhoo ana mphako. Mbalame zina bzitsa, tsono Mwana wa Munthu alibe na mbutoyo yakutsamirisa msolo.
59Ndipo Jezu adauza pomwe munthu winango kuti: “Nditewere!” Tsono iye adatawira kuti: “Mbuya, bakadikhirani ndikapendese babangu.”
60Na tenepo Jezu adamutawirambo aciti: “Leka anyakufa apendesane okha-okha. Tsono iwepo ndoko ukapalize Umambo bwa Mulungu.”
61Ndipo winango pomwe adalewambo kuti: “Mbuya, ine ndinidzakutewerani. Tsono dikhirani ndikagonekane na abale wangu kumui.
62Na tenepo Jezu adamutawira aciti: “Palibe munthu omwe ambagaula na gejo acimbaceuka mbuyo. Ndipo iye akacita tenepo alibe basa mu Umambo bwa Mulungu.
