LUKA 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Pasabudu libodzi iye akhapita na m'munda wa mapira. Ndipo ateweri wace adachola msoso acimbapukuta na manja acidya.

²Tsono afalizeu winango adawabvundza kuti: “Kodi thangwe ranyi muli kucita bzinthu bzomwe bzimbaletsedwa kucita m'masabudu?

³Ndipo Jezu adawatawira aciti: “Kodi mulibe kuwerenga bzomwe adacita Davide na andzace pomwe adabva njala?

⁴Iye adapita m'nyumba ya Mulungu na andzace, acidya mikate ya kucitira ntsembe yomwe ikhafunika lini kuti iwo adye maka azibaba wa ntsembe okha”.

⁵Iye adawauza pomwe kuti: “Mwana wa Munthu ni Mbuya wa Sabudu kubodzi.”

⁶Pasabudu linango, Jezu adayenda mnyumba ya kupembera. M'mwemo mukhana munthu wakulemala boko la didi.

⁷Ndipo afalizeu na apfundzisi wa mtemo akhamunyang'anisisa kuti amuwone penu iye angadamulimbisa pasabudupo, kuti awone thangwe ra kum'manga nalo mulandu.

⁸Tsono iye akhadziwa kale ndzeru zawo. Ndipo iye adamuwuza wa kulemala boko ule kuti: “Lamuka uime pakatipa!” Na tenepo iye adalamuka aciima.

⁹Ndipo Jezu adawabvundza kuti: “Kodi ndiciponi cinibvumizidwa kucita pasabudu: kucita cabwino ayai cakuipa? Kupulumusa munthu ayai kupha?

¹⁰Ndipo iye adawanyang'anisa wanthu wentse omwe akhali pamwepo, aciuza munthu wa kulemala boko ule kuti: “Futhula boko lakoli!.” Ndipo iye adafuthula bokolo, licilinganira na lindzace.

¹¹Pamwepo iwo adakalipa kwene-kwene. Na tenepo iwo akhapangana kuti angadamucite ciani Jezuyo.

¹²Pantsiku zimwezire Jezu adakwira m'phiri kukapemba. Iye adaphuphudza usiku bwentse acimbapemba Mulungu.

¹³Pomwe kudacena, iye adasankhula ateweri wace khumi na awiri, aciwasapasa dzina kuti atumiki:

¹⁴Simau omwe adadzamupasa dzina kuti ni Pedru, na m'bale wace Andereya, Tiyago, Juwau Firipi, Bartomeu,

¹⁵Mateu, Tumee, Tiyago mwana wa Alufeu, Simau omwe akhacemeredwa Mulindiri,

¹⁶Juda mwana wa Tiyago na Juda Kaliyoti omwe adadzamuphindukira.

¹⁷Ndipo iye adapolika nawo kucigwa komwe kukhana ateweri wace azinji kwene-kwene. Ndipo nthithi wa wanthumbo azinji akhadacokera kuJudeya na kuJeruzalema na kumphete kwa madzi ya nyandza ya Tiru na Sidonya.

¹⁸Iwo akhadabwera kuti adzamubve na kudzalapidwa matenda. Iye akhalimbisa pomwe wale omwe akhambagwa mizimu ya kusaya kudziwika.

¹⁹Ndipo wanthu wentse akhafuna kumukhuya, thangwe iye akhana mphambvu. Na tenepo adawalimbisa wentse.

²⁰Ndipo iye adanyang'anisa ateweri wace, aciti: Wakusimbidwa ndimwe wakusauka, thangwe Umambo bwa Mulungu mbwanu.

²¹Wakusimbidwa ndimwe omwe muna njala tsapano-lino, thangwe mundzakhuta. Wakusimbidwa ndimwe omwe lero muli kulira nakuti mundzaseka.

²²Wakusimbidwa ndimwe omwe muli kuwengedwa na wanthu, muli kupambulidwa, muli kutukwanidwa, acikucemerani madzina yakuipa na thangwe ra Mwana wa Munthu!

²³na tenepo dzakondweni ntsiku imweyo, mucidzasekera, thangwe mabaibai yanu kudzulu yan'dzakhala makulu kwene-kwene. Nakuti azibabawo adacitambo bzimwebzi kuna apolofeta.

²⁴Tsono tsoka kuna anyakudala, thangwe muli kutsangalaza kale.

²⁵Tsoka kuna imwe anyakudya bwino, nakuti mundzabva njala. Tsoka kuna imwe omwe muli kusekera tsapano-lino. Nakuti mundzadandaula mucilira.

²⁶Tsoka kuna wale omwe ambatumbizidwa na wanthu wentse. Nakuti azibabawo adacitambo bzimwebzo kuna apolofeta wakunama.

²⁷Ndiri kukuuzani winango omwe muli kundibvamwe kuti mucitire lufoi awengi wanu. Citani bzinthu bzabwino kuna wale omwe an'kuwengani.

²⁸Simbani wentse omwe ambakulewani kuipa. Pemberani wale omwe ambakupfudzani.

²⁹Akakumenya mbama kuphutu libodzi, muperekere pomwe linango. Akakutengera bhachi lako, muleke atenge pomwe hembe.

³⁰Pasa munthu ali wentse comwe iye ankukumbira. Penu munthu an'kutengera cinthu leka kumupsokonyola.

³¹Citirani bzabwino andzano ninga momwe mun'funira kuti wanthu akucitirenimbo.

³²Penu municitira lufoi wale omwe ambakucitiranimbo okha, kodi mun'dzatambira mabaibai yanyi? Nakuti anyakuphonya ambacitira lufoi wale omwe ambawacitirambo.

³³Penu imwepo mumbacita bzinthu bzabwino kuna wale omwe ambakucitiranimbo bzabwino okha, kodi mun'dzatambira mabaibai yanyi? Nakuti anyakuphonya ambacitambo bzibodzi-bodzibzo.

³⁴Penu mun'kumbiza cinthu munthu omwe an'dzakubwezerani ekha, kodi mun'dzatambira mabaibai yanyi? Nakuti anyakuphonya ambakumbizambo anyakuphonya andzawo kuti adzawabwezere pomwe.

³⁵Tsono imwepo citirani lufoi awengi. Ndipo acitireni bzabwino, akumbizani bzinthu lekani kudikhira kuti akubwezereni pomwe. Nakuti mabaibai yanu yan'dzakhala makulu kwene-kwene. Ndipo mundzakhala wana wa Iye wa Kudzulu. Nakuti iye ngwabwino kuna wakusaya kutenda na anyakuipa mitima.

³⁶Khalani na ntsisi ninga Babanu ngwa ntsisimbo.

³⁷Lekani kumbatonga andzanu kuti Mulungu adzasaye kukutonganimbo. Lekani kumanga mulandu andzanu kuti Mulungu adzasaye kukumanganimbo. Khululukirani mitima andzanu kuti Mulungu adzakukhululukirenimbo.

³⁸Pasani bzinthu andzanu kuti Mulungu adzakupasenimbo na mphimo yabwino, ya kutsindira, yakudzala na mpololo, ndipo andzakupasani na mtima wentse. Nakuti mphimo yomwe mumpimira nayo andzanu ndiyo an'dzakupimiranimbo nayo.

³⁹Ndipo iye adawatsikira pomwe matere aciti: Kodi zimola angakhale langa kuna zimola mwandzace? Nenene! Nakuti wentse an'gwera m'dindi.

⁴⁰M'pfundzi ambadziwa lini kuposa m'pfundzisi wace.Tsono munthu ali wentse angapfundzisidwa bwino ambadzadziwambo ninga m'pfundzisi waceyo.

⁴¹Kodi thangwe ranyi uli kukwanisa kuwona manthongo yomwe yali m'maso mwa mwanzako, ucisaya kubva citsetswa comwe ciri m'maso mwako?

⁴²Ungauze tani mwandzako kuti: “Bwera ndikupukuse manthongo. Kodi iwepo uli kubva lini citsetswa comwe ciri m'maso mwakomo? Mpfaka-faka! Toma kucosa citsetswa comwe ciri m'maso mwakomu kuti undzawone bwino yali m'maso mwa mwandzakomu.

⁴³Palibe muti wabwino omwe umbabala bzisapo bzakuipa. Ndipo palibe pomwe muti wakuipa omwe umbabala bzisapo bzabwino.

⁴⁴Na tenepo muti uli wentse umbadziwika na bzisapo bzawene. Ndipo palibe munthu omwe ambacha nkhuyu m'muti wa kalinkhato. Palibe pomwe munthu omwe ambacha masau mu mpangala.

⁴⁵Munthu wabwino ambalewambo bzinthu bzabwino bzomwe bziri mumtima mwace. Tsono munthu wakuipa mtima ambalewambo bzinthu bzakuipa.

⁴⁶Thangwe ranyi mumbandicemera “Mbuya, Mbuya,” mucisaya kucita bzomwe nimbalewa?

⁴⁷Munthu ule omwe anibwera kuna ine acibva mafala yangu aciteweza adalinganira na

⁴⁸munthu omwe adacera madindi yakuzika kwene-kwene mpaka kuphata mwala acimanga nyumba yace. Pomwe madzi yadadzala, nkulo udayerera ucigwinya nyumbayo. Ndipo iyo iribe kugwededzeka nakuti ikhadamangidwa bwino.

⁴⁹Tsono ule omwe ambabva mafala yangu acisaya kuyateweza, adalinganira na munthu omwe adamanga nyumba yace acisaya kuzikisa madindi. Ndipo madzi yadadzala, nkulo udayerera ucigwinya nyumbayo. Na tenepo iyo idagumuka icigweratu yentse. Pomwe iyo idagwa ikhalibe ntsandula.