1Iehova ena hereva na egu ai e kau, eto,
2Taunimanima natuna e, emu bese taudia ba hamaorodia, baoto, Dare na tano ta latanai bama mailaia, bena una tano taudia ese tau ta idia bogaragidia amo bema abia hidi, edia gima tauna ai bema halaoa;
3bena una tau ese dare na tano latanai e kaumu ai bema itaia negana ai, kibi bema hiriria, taunimanima ihadibadia:
4una negana ai ta ese kibi reḡena bema kamonai to bema noho hedavauhe, bena dare na bema mai, ena maun bema abia oho; ia rarana na ia sibona kwarana ai baine mia.
5Kibi reḡena e kamonai, to e noho hedavauhe; ia rarana na ia sibona latanai. A bema hedaraunelaia, bena ena mauri bema rauaia.
6A gima tauna ese dare ena mai bema itaia, to kibi basinema hiriria, bena taunimanima na basiema diba, bena dare na bema mai, idia ta bema alaia; una tau na ena dika ai baine mase, a ia rarana davana na gima tauna enai baina gwauraia.
7Taunabunai, taunimanima natuna e, lau ese Israel besena igimana tauna ai vada na halaomu; lau udugu herevana ta ba kamonai negadia iboudiai na lau ladagu ai do ba sisibalai henidia.
8Kara dika tauna bama hamaoroa, bama toma “Kara dika taumu e, oi na vada ba mase,” bena oi ese basioma hereva henia, basioma sisiba henia, ena dala amo baine raka siri totona; bena una kara dika tauna na ena dika ai baine mase, a ia rarana davana na oiemu ai baina gwauraia.
9A kara dika tauna boma sisiba henia, ena dala amo baine raka siri totona, bena ia na ena dala amo basinema raka oho, ia na ena dika ai baine mase, a oi na emu mauri do ba rauaia.
10Taunimanima natuna e, oi ese Israel besena taudia ba hamaorodia, baoto, Umui vada oto “Emai kerere bona emai kara dika na latamai ai, bena unu daidiai taumai e varoda-varodamu; ede baia mauri toma?”
11Ba hamaorodia, baoto, Ḡaubada Iehova na e herevamu, e tomu: Lau na maurimu heḡereḡerena, lau ese dika tauna ena mase asina moalelaiamu, a dika tauna na ena dala amo baine raka siri bena baine mauri, una na na moalelaiamu. A lou, emui dala dikadia amo a lou! Israel besena e, anina be dahaka ba mase?
12Taunimanima natuna e, oi ese emu bese taudia ba hamaorodia, baoto, Kara maoromaoro tauna ena kara maoromaoro ese basine hamauria, baine kerere negana ai; bona kara dika tauna ena kara dika ese basine haketoa, ena kara dika amo baine raka siri negana ai. Kara maoromaoro tauna na ena kara maoromaoro dainai basine mauri, baine kara dika negana ai.
13Ena be kara maoromaoro tauna na hamaoroamu ia na do baine mauri, to ena kara maoromaoro bema abidadama henia bena bema kara havara, bena ena kara maoromaorodia ta basine helalo tao, a ia na ena kara havara ai baine mase.
14Ina danu, ena be kara dika tauna na hamaoroamu, na tomu “Oi na do ba mase”, to ena kara dika amo bema raka oho, taravatu henunai bema noho bona kara maoromaorodia bema kara;
15bema kara dika tauna ese gwauhamata davana ma bema haloua bona vada e dadi ḡaudia bema heni lou, bona mauri haheganidia ai bema raka bona basinema kara havara, bena ia na do baine mauri; ia na basine mase.
16Ena kara dikadia ta basine helalo tao, ia ihadikana; ia na taravatu henunai vada e kara maoromaoro, ia na do baine mauri.
17Ḡau tamona, emu bese taudia na e tomu “Ḡaubada ena dala na dia maoro”; a ḡau be idia sibodia edia dala na dia maoro.
18Kara maoromaoro tauna na ena kara maoromaoro amo baine raka oho, bena baine kara havara, ia na una kara dainai baine mase.
19Bona kara dika tauna na ena kara dika amo baine raka oho bona taravatu henunai baine kara maoromaoro, ia na una kara dainai baine mauri.
20Ḡau tamona umui na o tomu “Ḡaubada ena dala na dia maoro”. Israel besena taumui e, lau ese baina hahemaoro henimui, ta ta ena kara ena kara heḡereḡeredia ai.
21Emai noho-hedoa laḡanina ihagwauta-ruana huana ihagwautana dinana iha-imana lalonai, Ierusalem amo e heau mauri tauna ta na dekegu ema, eto, Hanua na vada e darere.
22Heau mauri tauna na do se gini dae ai, adorahi ai Iehova imana na latagu ai e kau; bena daba ai, hari tau na dekegu ai e kau negana ai, Iehova ese udugu vada e kehoa guna; taunabunai, udugu vada e hekeho, egu mu negana vada e ore.
23Bena Iehova ena hereva na egu ai e kau, eto,
24Taunimanima natuna e, gabu ḡaḡaedia e noholaimu taudia Israel tanona lalonai na e hereva louloumu, e tomu, Abraham na tau tamona, to ia ese tano e ḡaunaia; a ai na hutuma, matona, tano na bae henimai, vada baia ḡaunaia.
25Taunabunai ba hamaorodia, baoto, Ḡaubada Iehova na ini e gwau tomamu: Hidio na mai rarana ida o aniamu, bona emui kaivakuku o gaga dae henidiamu, bona rara o hahebubuamu, matona, tano ba ḡaunaia a?
26Dare amo o ala-alamu, kara dika-rohorohodia o karamu, bona umui iboumui ai na ta ta dekena tauna dekena tauna adavadia ida o heuda hanaimu; matona, tano ba ḡaunaia a?
27Ini ba hamaorodia toma, baoto, Ḡaubada. Iehova na ini e gwau tomamu: Lau na maurimu heḡereḡerena, gabu ḡagaedia ai e nohomu taudia na dare ai do bae mase; bona tano paka ai e nohomu tauna na uda boromadia baina henidia, idia ese bae ania; bona gabu aukadia ai bona kohua lalodiai e nohomu taudia na dai-hanai gorerena ese baine hamasedia.
28Tano na baina havahua, tano ḡaḡaena ai bainela; ena siahu, e heaḡilaiamu ḡauna, na baine ore; Israel ororodia bae ḡaḡae vaitani dainai ta ese basine rakadia hanai.
29Bena edia kara dika-rohorohodia iboudiai daidiai lau ese tano na baina havahua, tano ḡaḡaena ai baina halaoa, negana ai idiu na bae diba, lau na Iehova.
30A, taunimanima natuna e, oiemu bese taudia ese ruma habadia badibadidiai bona ruma iduaradia ai oi e hereva heboulaimumu, e hereva hehenimu, ta ta ese tadikakana tadikakana e hamaorodiamu, e tomu, Aoma, Iehova ena amo e maimu herevana be dahaka vada ba kamonai.
31Idia na e vasimu, taunimanima na e hegogomu na heheto, bena oi vairamu ai e helaimu, lauegu orea na heto; bena oiemu hereva na e kamonaimu, to karana basie karaia; badina be ududia bibinadia amo lalokau herevadia momo e gwauraimu, to lalodia ai idia sibodia edia taḡa ihabadana daladia e haeromu.
32A itaia, idia ediai oi na lalokau anedia e abimu tauna na heto, gadona na namo-herea, bona gitara e hataia ḡoevaḡoevamu; badina be emu hereva bae kamonai, to karana basie karaia.
33Ina na bainema negana ai, (bona ia na momokani bainema), bena idia na bae diba peroveta tauna ta na bogaragidiai vada ema.
