1Iwe, ewe Samol mi Lapalap a kapas ngeniei,
2“Nöün aramas, kopwe fos ngeni aramasom o üreniir: Lupwen üa awarato maun won eu fanü, nge aramasen ewe fanü ra fili eman mwän me leir o awisa ngeni wisen chon mas,
3ätewe a apu ewe säwiin asilesil, lupwen a küna pwe chon oputer ra war, pwe aramas repwe silei.
4Iwe, are eman a rongorong puun ewe säwi, nge esap aleasochisi, a püsin tipis ngeni manauan, are chon oputan ra feito o niela.
5Iwe, a rongorong puun säwi, nge esap aleasochisi, iei mine a püsin tipis ngeni manauan. Nge are epwe aleasochisi, epwe amanaua manauan.
6Nge are ewe chon mas a küna pwe chon oputer ra war, nge esap apu ewe säwiin asilesil pwe aramas resap silei usun, ätewe a tipis ngeni manauen eman me eman aramas mi mäla ren. Iwe, ir repwe mäla lon ar tipis, nge ewe chon mas epwe angei chappen an tümwününgau.
7Nge en, nöün aramas, üa awisa ngonuk wisen eman chon mas fän iten chon Israel. Iteiten fansoun, lupwen kopwe rongorong eu kapasen fön seniei, kopwe fönöör ren.
8Ika ngang üpwe üreni eman chon föföringau, ‘Kopwe fokun mäla, en chon föföringau,’ nge kosap fönöü pwe epwe kul seni an föföringau, ätewe epwe mäla lon an tipis, nge en kopwe angei chappen om tümwününgau.
9Iwe, are kopwe fönöü eman chon föföringau pwe epwe kul seni an föföringau, nge esap kul seni, ätewe epwe mäla pokiten an tipis, nge en kopwe amanaua manauom.”
10Iwe, ewe Samol mi Lapalap a kapas ngeniei, “Nöün aramas, kopwe üreni ekewe chon Israel, pwe iei usun mine ra apasa, ‘Ach pupungau me ach tipis ra nonom woch, nge ir popun ach feiengau. Ifa usun ach sipwe tongeni manau?’
11Iwe, kopwe üreniir: Mwo manauei, aloi ngang Kot ewe Samol mi Lapalap, üsap pwapwaiti mälan eman chon föföringau, nge üa mochen pwe ewe chon föföringau epwe kul seni an tipis o manau. Ämi chon Israel, oupwe ükütiu seni ämi föföringau. Pun pwota oua mochen mäla?
12Iwe, en nöün aramas, kopwe üreni aramasom: Are eman chon pwüng a tipis, an kewe föförün pwüng resap tongeni amanaua. Nge are eman chon föföringau a ükütiu le föföringau, an kewe föföringau resap afeiengaua. Iwe, are eman chon pwüng a föri tipis, esap tongeni küna manau ren an kewe föförün pwüng a föri me lom.
13Are üa pwon ngeni eman chon pwüng pwe epwe fokun manau, nge i a chök apilükülükü püsin an pwüng o föri tipis, an kewe föförün pwüng meinisin üpwe manlükala, nge epwe chök mäla pokiten förian kewe tipis.
14Iwe, are üa apasa ngeni eman chon föföringau, ‘Kopwe fokun mäla,’ nge i a ükütiu le tipis o föri mine a pwüng me wenechar,
15are a aliwini ngeni ewe chon liwinimang asisilen an pwon, are a pwal aliwini mine a soläni o tümwünü ekewe allük aramas ra küna manau ren, nge esap föri tipis, ätewe epwe fokun manau, nge esap mäla.
16Üpwe amusala an kewe tipis meinisin a föri. Iwe, pokiten a föri mine a pwüng me wenechar, epwe fokun manau.
17Iwe, aramasom ra chök apasa, ‘Än ewe Samol föför esap pwüng.’ Nge püsin ar föför esap fokun pwüng.
18Are eman aramas mi pwüng a ükütiu seni an föförün pwüng o föri mine a pwüngingau, epwe mäla ren.
19Nge are eman aramas mi pwüngingau a ükütiu le föföringau o föri mine a pwüng me wenechar, epwe püsin amanaua manauan.
20Iwe, oua chök apasa, ‘Än ewe Samol föför esap pwüng.’ Ngang üpwe apwüngükemi chon Israel lon ükükün ämi föför.”
21Lon engol me ruuen ierin ach oola, lon alimuen ränin ewe aengolun maram, eman mwän mi sü seni Jerusalem a feito rei o apasa, “Ewe telinimw a tala.”
22Lon ewe pwinin mwen ewe chon sü a war, üa mefi pwe ewe Samol mi Lapalap a nom rei ren an manaman. Iwe, Kot a atufichiei pwe üa silesefäl kapas mwen ewe mwän a feito rei lon ewe sosoran. Ina usun üa tufichsefäl le kapas.
23Iwe, ewe Samol mi Lapalap a kapas ngeniei,
24“Nöün aramas, chokewe mi imweimw lon ekewe telinimw mi tala lon ewe fanü Israel ra chök eäni ei kapas, ‘Apraham a chök aleman, nge a fanüeni ei fanü. Nge äm aia chomong, iei mine ei fanü fanüach.’
25Iei mine kopwe üreniir mine ngang Kot ewe Samol mi Lapalap üa apasa: Oua ochoch ochämi fituk mi cha, oua fel ngeni ämi kewe uluulun anümwäl o nimanauei aramas. Ifa usun, ämi oupwe fanüeni ei fanü?
26Oua apilükülükü nöümi ketilas, oua pwal föri föför mi anioput. Iteiten eman me eman leimi a lisowu ngeni pwülüen chon arun. Ifa usun, ämi oupwe tongeni fanüeni ei fanü?
27Iwe, kopwe üreniir pwe iei aloi ngang Kot ewe Samol mi Lapalap: Mwo manauei, chokewe mi imweimw lon ekewe telinimw mi tala repwe mäla ren ketilas, chokewe mi nom lemäl üpwe ngeni ekewe manmwacho pwe repwe ocheer, nge ekewe mi op lon imwen maun me föimw repwe mäla ren mätter.
28Üpwe awili ei fanü ngeni wesewesen fanüapö. Iwe, ar pöchökül ra aingaing won epwe wesila, nge ekewe chukun Israel repwe sön, pwe esap wor eman epwe tongeni fetal wor.
29Iwe, lupwen üa awili ewe fanü ngeni wesewesen fanüapö pokiten ar kewe föför mi anioput meinisin ra föri, mürin repwe silei pwe ngang ewe Samol mi Lapalap.
30Nöün aramas, aramasom ra fosfengen lefiler usum, lupwen ra chufengen arun tittin ewe telinimw ika leasamalapen imwer kewe. Iwe, ra kapasfengen lefiler, ‘Ousipwe feila o rongorong ewe kapas seni ewe Samol mi Lapalap.’
31Iwe, nei aramas repwe mwicheto reöm o mot me mwom pwe repwe aüselinga om kapas, nge resap aleasochis ngeni. Pun awer a pwärätä ar echeniei, nge letiper a chök mocheniaiti moni fän pwüngingau.
32Nengeni, ka chök usun eman souköl me rer mi ngiöch le köl kölün amümü, ika usun eman mi silelap le ettiki pisekin ettik, pun ra aüselinga om kapas, nge resap fokun aleasochis ngeni.
33Nge lupwen om kewe kapas repwe fis, pun repwe fokun fis, mürin chon Israel repwe silei pwe eman soufos a nom lefiler.”
