Text copied!
CopyCompare
परमप्रभु यावे आ लोव़ - इजीकीएल

इजीकीएल 33

Help us?
Click on verse(s) to share them!
1परमप्रभु यावेमी आं कली लोव़ पाप्‍तु।
2मार लोव़ पाप्‍तु देंशा हना “ए मुर, इ मुर आन कली ‘गो रागी का कली तरवार चाक्‍ता हना, मेको रागी ङा मुरपुकीम आन रागी ङा मुर का कली आन कली खाल पाइब का योव़शा वोइक्‍नीम,
3मिनु मेकोम आ रागीम तरवार कुरशा आ जोरी सत्रु जाक्‍शो तशा, आ मुर आन कली तुइक्‍पाइक्‍चा कली तुराही ताप्‍ब।
4मिनु सुम मेको तुराही ताप्‍शो नेंशा मटीबा, मेको तरवारम साइक्‍चा पुंइसाक्‍व हना, मेको आ हुश आ दोस आंमा राइब।
5मेकोम तुराही ताप्‍शो नेंशा यो, मटितीके, मेको आ हुश आ दोस आंमा राइब। तन्‍न मेकोम टिशो हना, ब्रोंइ वा।
6तन्‍न मेको खाल पाइबम तरवार कुरशा लडाइ पाइब जाक्‍शो तशा यो, मुर आन कली नेंपाइक्‍चा कली तुराही मताप्‍तु नु तरवार जाक्‍शा सुइ मुर का कली साइक्‍तु हना, मेको मुर आ मरिम्‍शो पशो आ पर्बम बेक्‍ब। तन्‍न गो मेको खाल पाइब कली मेको आ हुश आ क्‍येक्‍क ताक्‍नुङ।
7ए मुर, गो इ कली इस्राएल आ खिं ङा मुर आन कली खाल पाइब सेल्‍तान। मोपतीके गेना इ कली लोव़ पङा, मेना गे मेको आन कली मेको आं लोव़ नेंशा, होस पा बाक्‍कीन’ देंचा माल्‍नेवे। हिब्रू १३:१७
8मिनु गो आं अरेशो मटीब मुर आन कली ‘ए आं अरेशो मटीब मुरपुकी गे थमा पा बेक्‍नीनी’ देंनुङ, मिनु गे मेको आं अरेशो लोव़ मटीब मुर आन कली ‘इन मरिम्‍शो पशो प्रोनीन’ दे महिंपाइक्‍तीवी हना, मेको मरिम्‍शो पाइब मुर आन मरिम्‍शो पशो आ पर्बम बेक्‍नीम। तन्‍न गो मेको आन हुश आ क्‍येक्‍क इ रे पा ताक्‍नुङ।
9तन्‍न गे मेको परमप्रभु यावे आं अरेशो लोव़ मटीब आन कली इन मटितीके प्रोनीन, दे हिंच कोंइताक्‍वी हना, मिनु मेकोपुकीम आं अरेशो लोव़ मटिम्‍तेक्‍म हना, मेको आन मटिशो आ पर्बम बेक्‍नीम। मिनु गे आंम कली प्रोंइ‍नेवे” देंत।
10मेकोम “ए मुर, गे इस्राएल आ खिं ङा मुर आन कली ‘गेपुकीम आंइ हेंथे पशो नु पाप पशोम दिप्‍चा पुंइसीशो बाक्‍नीकी। मिनु मेको आ पर्बम आंइ बोल नुम्‍ना नुम्‍न लशो बाक्‍ब। गो दोपा ब्रोंइनीकी?’ देंनीनी” देनो।
11मोपतीके गे मेको आन कली परमप्रभु, परमप्रभु यावेमी “गो आ ब्रोंइशा बाक्‍शो खोदेंशो पा आं अरेशो लोव़ मटीब मुर बेक्‍मानु मग्‍येरसीनुङ। तन्‍न मेकोपुकीम आं अरेशो लोव़ टिशा ब्रोंइमल। गे इन मरिम्‍शो लां रे लेतीन। ए इस्राएल आ खिं ङा मुरपुकी, गे मारदे बेक्‍चा दाक्‍नीनी? ब्‍यवस्‍था ३२:४०; यसैया ५५:७; योएल २:१२-१३
12मिनु ए मुर, गे इ मुर आन कली ठीक पाइब मुर हेंथे गाक्‍त हना, आ ङोंइती ठीक पशोमी मेको कली प्रोंइने मचाप्‍ब। ङोंइती आं अरेशो मटीब मुर, ठीक पाइब दुम्‍त हना, आं ङोंइती मटिशो आ पर्बम मबेक्‍ब। मिनु ठीक पाइब मुरुम पाप पाप्‍तु हना, मेको आ ङोंइती ठीक पशो आ पर्बम ब्रोंइचा मताइब। इजीकीएल ३:२०
13गो मेको ठीक पाइब मुर कली ‘गे थमा पा ब्रोंइनेवे’ देंङानु, मेकोम आ ठीक पतीकेम थमा सुइश्‍शा, मरिम्‍शो पाप्‍तु हना, मेको आ ङोंइती ठीक पशो मारेइ ममिम्‍सीब। मेको आ मरिम्‍शो पशो आ पर्बम बेक्‍ब।
14तन्‍न गो मेको आं अरेशो लोव़ मटीब मुर कली ‘गे थमा पा बेक्‍नेवे’ देंती हना, मेकोम आ पाप पतीक प्रोंइशा आं अरेशो नु ठीक पाप्‍तु हना,
15मिनु मेकोम आ जाकटी वोइश्‍शो थोव़क लेत्‍ताक्‍‍व हना, आ रोइश्‍शो थोव़क लेश्‍शा गेप्‍तु हना, ब्रोंइचा कली आं फुल्‍लुम मुशा ब्रेक्‍शो लोव़ पशा, मरिम्‍शो मपाप्‍तु हना, मेको थमा पा ब्रोंइब। मेको मबेक्‍ब। ब्‍यवस्‍था २४:१०-१३; इजीकीएल १८:७; लूका १९:८
16मेको आ पशो तेकोइ पाप ममिम्‍सीब। मेकोमी आं अरेशो लोव़ नु ठीक गेय पाप्‍तु। मेको थमा पा ब्रोंइब।
17मो हना यो इ मुरपुकीम ‘परमप्रभु आ पशो ठीक मबाक्‍ब’ देंनीम। तन्‍न थमा पा, मेको आन पशो कका ठीक मबाक्‍ब।
18सुइ ठीक पाइब मुरुम मेको आ ठीक पतीके प्रोंइशा, मरिम्‍शो पाप्‍तु हना, मेको आ मरिम्‍शो पशो आ पर्बम बेक्‍ब।

19मिनु सुइ आं अरेशो लोव़ मटीब मुरुम आं अरेशो लोव़ मटितीक प्रोंइशा, आं अरेशो नु ठीक पाप्‍तु हना, मेको मो पशो आ पर्बम ब्रोंइब।
20मो हना यो गे ‘परमप्रभु आ पशो ठीक मबाक्‍ब’ देंनीनी। ए इस्राएल आ खिं ङा मुर, गो इन कली इन पशो खोदेंशो पा निसाफ पाइनुङ” देंत।
21गो आंइ ग्‍याइश्‍शा लाइक्‍चा पुंइसीशो १२ बर्स ङा १० महिना ५ नाक्‍त दुम्‍मेनु, यरूसलेम रे प्रोक्‍शा जाक्‍शो मुर का आं बाक्‍तीकेम जाक्‍शा “आंइ सहर ब्रुत” देंत। इजीकीएल १:२; इजीकीएल २४:२६; २राजा २५:२-४
22मेको मुर जाक्‍चा क्‍येङा ङोंइती नाक्‍दो परमप्रभु यावे आ गुइम आं कली थिशो बाक्‍त। मिनु सुनी मेको मुर जाक्‍चा क्‍येङा ङोंइती आं कली ब्‍वाक्‍ब सेल्‍ने थुम्‍शो बाक्‍त। मोपा गो ब्‍वाक्‍ब दुम्‍ती।
23मिनु परमप्रभु यावेमी आं कली लोव़ पाप्‍तु।
24मार लोव़ पाप्‍तु देंशा हना “ए मुर, इस्राएल रागीम बाक्‍शो मेको ब्रेश्‍शो खिंम बाक्‍ब मुरपुकीम ‘अब्राहाम दा मुर का ला बाक्‍त। मो हना यो मेको रागी मेको के दुम्‍त। तन्‍न गो शुश बाक्‍नय। मेको रागी थमा पा इं कली गेशो बाक्‍ब’ देंनीम। यसैया ५१:२
25मोपतीके गे मेको आन कली ‘परमप्रभु, परमप्रभु यावेमी इन कली गेपुकी हुश सुन्‍दा श्‍ये ब्‍वाइनीनी। गे इन मूर्ति पूजा पाइनीनी। गेपुकीम हुश ख्राक्‍श पोक्‍‍नीनी। मिनु मार, एको रागी इन के दुम्‍बा ङा? १सामुएल १४:३२-३४
26गे इन तरवार कली थमा सुइक्‍नीनी। गेपुकीम मूर्ति पूजा पाइनीनी। गे नेल्‍लेम इन नेक्‍था ङा मुर आन मीश कली ग्रांग्रा दिशो सेल्‍नीनी। मिनु मार, एको रागी इन के दुम्‍बा ङा?’ देनो” देंत। इजीकीएल ११:१४-२१
27मिनु गे मेको आन कली “परमप्रभु, परमप्रभु यावेमी ‘गो आं ब्रोंइशा बाक्‍शो खोदेंशो पा ब्रेश्‍शो खिंम बाक्‍बपुकी तरवारम साइक्‍चा पुंइसीनीम। मिनु गो दिंमम बाक्‍ब आन कली ब्‍वाकी ङा जन्‍तु आन कली ब्‍वचा गेनुङमी। बोल्‍यो दरवार नु पुक्‍खीम बाक्‍बपुकी मुर बेक्‍तीक रोइम बेक्‍नीम।
28गो मेको रागी कली मुर मबाक्‍शो नु श्‍येत्‍थ सेल्‍नुङ। मिनु मेको आ ठेयब लेत्‍तीक जाम्‍ब। मिनु इस्राएल ङा डांडाम सुइ एर ओंथ पने मचाप्‍चा ङा पा मुर मबाक्‍तीके दुम्‍ब।
29गो मेको आन मूर्ति पूजा पशो आन पर्बम मेको रागी कली मुर मबाक्‍शो नु श्‍येत्‍थ सेल्‍नुङ। मेना मेकोपुकीम गोन परमप्रभु यावे नङ, दे तुइक्‍नीम’ देंशो बाक्‍ब” देंत।
30मेकोम “ए मुर, इ पर्बम बुक्‍शो मुरपुकी काथा बुक्‍शा, गारो नु खिं ङा लाप्‍चोम राप्‍शा ‘जाक्‍कीन परमप्रभु यावे आ लोव़ मार बाक्‍मे नेंय’ देंमुइनीम।
31मेकोपुकीम आं मुर खोदेंशो पा इ बाक्‍तीक जाक्‍शा इ ङोंइती नित्‍नीम। मिनु इ लोव़ नोफा दाइश्‍शा नेंनीम। तन्‍न मेकोम इ लोव़ मटीनीम। मेकोम रिम्‍शो लोव़ पखु पा, आन थुंम चहिं दोपा क्‍येट चेम्‍चा, दे मिम्‍नीम। यसैया ५३:१
32मेकोपुकीम इ कली तशा रिम्‍शो ताप्‍तीक ताप्‍शा, रिम्‍शो सेंदामी रिम्‍शो कुम्‍सो पाइब मुर का बाक्‍ब, दे मिम्‍नीम। इ देंशो नेंनीम, तन्‍न मपाइनीम।
33मेको नेल्‍ल थमा दुम्‍ब। मेको थमा पा थमा दुम्‍ब। मेना मेकोपुकीम आन दातेम परमप्रभु यावे आ लोव़ पाइब का जाक्‍शो बाक्‍माक्‍त, दे तुइक्‍नीम” देंत। इजीकीएल २:५