Text copied!
CopyCompare
Buk Baibel long tokples Motu - ESEKIEL

ESEKIEL 47

Help us?
Click on verse(s) to share them!
1Bena ia ese e hakaugu lou, dubu iduarana ai; bena na itaia, ranu na dubu raka-vareaina henuna amo e lasiva, mairiveina kahana ai, (badina be dubu na mairiveina kahana e vaira henia); bona dubu raka-vareaina diho kahana henuna amo danu ranu e lasiva, ihaboulaina patana diho kahana ai.
2Bena ia ese mirigini kahana ikoukouna amo e hakaugu lasi, murimuri kahana ai e hakaugu heḡeḡe ela bona murimuri kahana ikoukouna, mairiveina kahana e vaira heniamu ḡauna; ranu na diho kahana amo e lasiva.
3Mairiveina kahana ma ala; ia na mai ena hahetoho varona imana ai, bena kiubit daha-ta e hahetohodia, bena ranu amo e hakaugu hanai; aemai ganaganadia ai e raro.
4Ma kiubit daha-ta e hahetohodia, bena ranu amo ma e hakaugu hanai; tuimai ai e raro. Ma kiubit daha-ta e hahetohodia, bena ranu amo ma e hakaugu hanai; koekoemai ai e raro.
5Ma kiubit daha-ta e hahetohodia, bena ranu na vada sinavai ta; asi turu-hanai dibagu, badina be ranu vada e dae; vada e dobu, nahu heḡereḡerena, ta basinema turu hanai diba.
6Bena ia ese e nanadaigu, eto, Taunimanima natuna e, ina na vada o itaia a? Bena e hakaugu riri lou, sinavai isena amo.
7Lougu ai, au momo herea na itadia sinavai isena kahana kahana ai.
8Bena ia ese e hamaorogu, eto, Ina ranu na mairiveina kahana e aru e laomu, Araba kourana ai e dihomu; bena gohu ai e aru lasimu negana ai, gohu na e negarimu.
9Bena sinavai na e aru e laomu gabudia iboudiai, mauri ḡaudia na bae vara heḡiḡi oda-oda, bona gwarume danu seridia seridia. Badina be ina ranu na e aru e laomu, gohu baine hanegaria; taunabunai sinavai na e aru e laomu gabudia ai, ḡau iboudiai na bae mauri daehai daehai.
10Haoda taudia na gohu badinai bae gini; En-gedi amo ela bona En-eglaimi edia reke bae tore; gwarumena bae idau-idau, Davara Badana gwarumedia heḡereḡeredia.
11A gohugohuna bona laguta-lagutana na basie negari; bae mia, damena gabudia.
12Sinavai isena kahana kahana ai huahua audia idau-idau iboudiai bae vara. Idia raudia basie marai, bona huahuadia basie hehuhu, a hua ta ta amo huahuadia bae dobi, badina be ihapariparidia ranudia na gabu helaḡana amo e aru e laomu. Huahuadia na aniani ḡaudia bona raudia na hahemauri ḡaudia ai baela.
13Ḡaubada Iehova na ini e gwau tomamu: Tano hetoadia bini: tano na ba haria, Israel iduhudia gwauta-ruaosi ese ahudia bae abi, a Iosef na ahu rua baine abi.
14Ba haria, ahu iboudiai bae heḡereḡere; na gwau hamata senemui baina henidia nato; ina tano na ahumui korikori ai bainela.
15Tano hetoana binai: mirigini kahana ai, Davara Badana amo baine hematama, bena Hetelono amo bainela ela bona Hamat raka-vareaina, bena Sedad
16bona Berota bona Sibiraimi amo (una Sibiraimi na Damasko bona Hamat hetoadia ai) ela bona Hasere-hatikono, Haurana hetoana ai.
17Unu amo hetoa na davara amo bainela ela bona Hasara-enono, Damasko mirigini kahana hetoana ai. Hamat hetoana danu na ia miriginina kahana ai. Mirigini kahana hetoana bunai.
18Laurabada kahana ai, hetoa na Hasara-enono amo baine hematama, Haurana bona Damasko padadia amo bainela; bena Ioridane sinavaina amo bainela, Gilead bona Israel tanodia padadia amo, ela bona laurabada kahana davarana, ela bona Tamara. Laurabada kahana hetoana bunai.

19Diho kahana ai, hetoa na Tamara amo baine hematama, bainela ela bona Meribata-kade ranu gabudia, bena Aigupto Dokana amo bainela, ela bona Davara Badana. Diho kahana hetoana bunai.
20Lahara kahana ai, hetoa na Davara Badana, ela bona Hamat rakavareaina hevaira-hehenina. Lahara kahana hetoana bunai.
21Ina tano na unu ba haria toma, Israel iduhudia heḡereḡeredia.
22Ahumui ba duanaidia, umul emui bona idau taudia, bogaragimui ai e nohomu bona natudia na bogaragimui ai vada e havaradia taudia. Idia na Israel memerodia korikoridia heḡereḡeredia ai baela umui emui ai; umui ida ahumui ba duanaidia Israel iduhudia bogaragidiai.
23Edena iduhu ai idau tauna na e nohomu, unuseni ai ia ahuna ba henia. Ḡaubada Iehova na e herevamu.