1Iehova ena hereva na egu ai ma e kau, eto,
2Taunimanima natuna e, Ierusalem na ena kara dika-rohorohodia ba hedaraunelai henia,
3baoto, Ḡaubada Iehova ese Ierusalem na ini e hamaoroa tomamu: Senemu bona emu vara na Kanaan taudia edia tano ai, tamamu na Amoro tauna, sinamu na Hiti hahinena.
4Emu vara na iniheto: emu vara dinana ai hudomu varona asie utua, ranu ai asie hurimu, ba ḡoevaḡoeva totona, damena amo asie dahumu, dabua amo asie tarumu.
5E itamu tauna ta ese se bogamu hisi, ini kara ta se kara henimu ena hebogahisi dainai; a tano paka ai e negemu; badina be o vara dinana ai e dadaraimu herea.
6Bena na rakamu hanai negana ai na itamu, rara ai o hekure, bena rara ai hekuremu ai na hereva henimu, nato, Ba mauri,
7tano paka avana na heto ba tubu. Bena o bada oho bada oho, taumu e lata, hane-ulato ai ola; ratamu e hekara, huimu e lata; ḡau tamona gagaemu ai o nohova, asi dabuamu.
8Ma na rakamu hanai negana ai na itamu, oi na vada o ulato; bena egu dabua amo na tarumu, taumu na govalaia; oibe, maohenimu na karaia, bona oi ida ta hegwau hamata heheni, bena adavagu ai ola. Ḡaubada Iehova na e herevamu.
9Bena ranu ai na hadigumu, raramu na huria oho, bona dehoro amo na dahumu.
10Dabua mai heraheradia amo na hahedokilaimu, bona boromakau kopina tamakadia na aemu ai na kara. Dabua aukana ḡoeva-daena amo na hariolaimu, bona dabua manoka-manokana amo na hahedokilaimu.
11Herahera ḡaudia amo na haheralaimu; vagivagi na imamu ai na ato, bona ageva na ha-inulaimu.
12Gadei ta na udu-baubaumu ai na atoa, bona haida danu taiamu ai; bona havava ḡauna ta mai hairaina na kwaramu na havavalaia.
13Gold bona silver amo unu na haheralaimu toma; emu dabua na dabua aukadia ḡoeva-daedia bona dabua manoka-manokadia bona dabua mai heraheradia; amu aniani na flaoa namo-hereana bona bada-ranuna bona dehoro. Hairaimu e bada e laova, ela bona oromamu na pavapava hahinena na heto.
14Sivaraimu danu e hehari piu, bese idau-idau bogaragidiai, hairaimu na bada herea dainai; badina be hairaimu na ḡoeva-dae, lau ese na hahairaimu dainai. Ḡaubada Iehova na e herevamu.
15A oi ese hairaimu o abidadama henia, bena ariara hahinena ai ola harimu badana dainai, raka-hanai taudia ida o lebulebu.
16Emu dabua haida o abi, pata helaḡadia o haheralai, bena latadiai ariara karadia o kara; kara unuhetomana na nega gunadia ta ai se vara, bona nega gabedia ta ai basine vara Iou.
17Emu herahera ḡaudia danu, lauegu gold bona silver amo e kara bona lau ese na henimu ḡaudia, na o abidia, tatau laulaudia o karalai, bena o lebulebulai.
18Emu dabua mai heraheradia danu o abidia, unu ḡau o govalaidia, bona egu dehoro bona egu muramura mai bonana na vairadiai o atodia.
19Egu flaoa igabudia danu, na henimu ḡauna, (badina be lau ese flaoa namo-hereana bona dehoro bona bada-ranuna amo na ubumu) na idia vairadiai o atodia, bonadia bae moalelai totona. Ḡaubada Iehova na e herevamu.
20Bena natumu mamaruanedia bona hahinedia, o havaradia egu, na o abidia, boubou ḡaudia ai o halaodia, idia adia. Emu ariara karadia na ḡau pipikidia a?
21Una dainai lau natugu o aladia mase, bona ḡole-oho boubou ḡaudia ai o halaodia, idia edia, a?
22Emu kara dika-rohorohodia bona emu ariara karadia iboudiai lalodiai, maragimu negana, asi dabuamu ḡagaemu ai o nohova negana, rara ai o hekure, so laloa tao.
23Bena emu kara dika iboudiai muridiai, (Ḡaubada Iehova na e tomu, Madi, ihabaimu!),
24oi ese emu kalaga o haginidia bona emu pata helaḡadia o kara, ruma ariaradia iboudiai lalodiai.
25Hanua ariarana iboudiai dokodia ai emu pata helaḡadia o haginidia; hairaimu vada o lebulebulaia, raka-hanai tataudia ediai sibomu o hehoihoilai, emu ariara karadia o habada.
26Aigupto taudia, dekemu taudia mai edia mata-bodaga, ida danu vada o lebulebu, emu ariara karadia vada o habada, lau ihabadugu.
27Taunabunai a itaia, lau imagu na toia roro oi ihadikamu, oi ahumu, e gwaurai henimu guna ḡauna, na hamaraḡia, oi inaimu Filistia hahinedia, mata-ganigani hahinedia, imadia ai na atomu; idia ese emu lebulebu karadia hemaraidia e hemaraiva.
28Asuria taudia ida danu ariara karadia o kara, badina be emu mata-bodaga na bada herea; oibe, idia ida ariara karadia o kara, a lalomu do se heḡereḡere.
29Emu ariara karadia o habada danu, Kaldea tanona ena hoihoi gabudia ai; a lalomu na dounu se heḡereḡere.
30Ḡaubada Iehova na e tomu: Emu mata-bodaga na bada herea; una dainai ini kara iboudiai o kara, ariara hahinena se hemaraimu ena kara;
31hanua ariaradia iboudiai dokodia ai emu kalaga o haginidia, bona ruma ariaradia iboudiai lalodiai emu pata helaḡadia o kara. Ḡau tamona oi na dia ariara hahinena heḡereḡerena, badina be henitaomu o dadaraiamu.
32Oi na heuda-hanai hahinemu, idau taudia o abidia daemu adavamu gabuna ai.
33Tatau ese ariara hahinedia iboudiai na harihari ḡaudia e henidiamu; a oi ese emu harihari gsudia na e ura henimuva taudia iboudiai o henidiava, henitaodia o henidiava, kaha idau-idau iboudiai amo emu ariara karadia ikaradia bae vasi totona.
34Taunabunai, emu ariara karadia lalodiai oi na idau, dia hahine haida heḡereḡeredia. Ta se noimu ia ida ba eno bou; oi ese henitaona o henia, a haida ese henitaomu se henimu. Una dainai oi na idau.
35Taunabunai, ariara hahinemu e, Iehova ena hereva ba kamonai.
36Ḡaubada Iehova na ini e gwau tomamu: Badina be e ura henimu taudia ida emu ariara karadia o kara lalodiai, oi ihahemaraimu na e hehulala bona gagaemu ai na o hedinarai dainai, bona emu kaivakuku iboudiai daidiai, bona natumu, idia o henidia memerodia, raradia daidiai,
37a itaia, e ura henimu taudia iboudiai, olebulebulaidia taudia, o ura henidia taudia bona o dadaraidia taudia iboudiai, na lau ese baina haboudia; oi ihadikamu totona kaha iboudiai amo baina haboudia, bena gagaemu ai baina haheitalaidia; taumu idoinai ḡaḡaena ai bae itaia.
38Bena lau ese baina hahemaoro henimu, adavadia e dihotanidiamu bona rara e hahebubuamu hahinedia e hahemaoro henidiamu heḡereḡerena.
39E ura henimu taudia imadia ai baina atomu; bena idia ese emu kalaga bae ḡiḡia dobi, bona emu pata helaḡadia bae hamakohidia, emu dabua bae dokidia oho, emu herahera nadidia namo-hereadia na bae abidia, gagaemu ai asi dabuamu bae rakatanimu.
40Tuari oreana ta bae mailaia, oi ihadikamu; nadi amo bae hodomu, bona edia dare amo bae dapamu rohoroho.
41Emu ruma bae doudia; hahemaoro karadia oi latamu ai bae kara, hahine momo vairadiai; emu ariara karadia ai baina hadokomu, bona henitao basio heni lou.
42Unu amo egu badu ḡaraḡara baina haḡuḡurua latamu ai, bona egu vaḡeḡe ese baine rakatanimu; lalogu na baine keru, basina badu lou.
43Badina be eregabemu negana so laloa taomu; to ini ḡau iboudiai amo vada o habadugu. Taunabunai, a itaia, emu kara davadia na tubuamu ai baina kara. Ḡaubada Iehova na e herevamu. Emu kara dika-rohorohodia iboudiai latadiai mata-bodaga karadia ma vada o ato kau, ani?
44A itaia, hereva lada-isidia e gwauraimu taudia iboudiai ese ina hereva lada-isina ai bae herevalaimu, baeto “Sinana hetomana, natuna hahinena danu unuheto”.
45Sinamu ese adavana bona natuna e dadaraidia, bona oi na ia natuna hahinena; tadikakamu ese adavadia bona natudia e dadaraidia, bona oi na idia tadikakadia. Sinamu na Hiti hahinena; tamamu na Amoro tauna.
46Kakamu na Samaria; ia na natuna hahinedia ida e nohova, oi miriginimu kahana ai; bona tadimu na Sodoma; ia na natuna hahinedia ida e nohova, oi dihomu kahana ai.
47Ḡau tamona, oi lalomu na se heḡereḡere idia edia dala ai ba raka, eiava idia edia kara dika-rohorohodia heḡereḡeredia ai ba kara; asi vanahana oiemu kara mirodia ese idia edia kara mirodia e hereadia, emu dala iboudiai lalodiai.
48Ḡaubada Iehova na e tomu: Lau na maurimu heḡereḡerena, tadimu Sodoma bona natuna hahinena edia kara na oi bona natumu hahinedia edia kara ida asie heḡereḡere.
49A itaia, tadimu Sodoma ena kerere binai: ia mai natuna ida e hekokorokuva, e aniani boga-kunuva, e noho namonamova mai tagadia ida; a ogoḡami taudia bona e dabuva taudia na asie durudia.
50Idia na e hekokorokuva, kara dika-rohorohodia na lau vairagu ai e karava; taunabunai edia kara na itaia negana ai na na abidia oho.
51Samaria ena kara dika na taina bada, a oiemu na bada herea; oiemu kara dika-rohorohodia ese idia edia vada e hereadia; oiemu kara dika-rohorohodia iboudiai daidiai tadikakamu ita-itadia na kara maoromaoro hahinedia ita-itadia na heheto.
52Oi danu ihahemaraimu na ba huaia, badina be tadikakamu ihahemaorohenidia metauna vada o haragaia; badina be emu kara dika ai emu kara dika-rohorohodia ese idia edia e hereadia dainai, idia na taidia mamaoro, a oi na dika vaitani. Taunabunai, oi danu ba hemarai, ihahemaraimu ba huaia, badina be tadikakamu oromadia na kara maoromaoro hahinedia oromadia heḡereḡeredia ai vada o halaodia.
53Edia noho-namo baina henidia lou, Sodoma mai natuna hahinedia ida edia noho-namo bona Samaria mai natuna hahinedia ida edia noho-namo, bona oiemu noho-namo baina henimu lou idia bogaragidiai;
54bena ihahemaraimu ba huaia bona emu kara iboudiai daidiai ba hemarai, bena idia taudia ihalodia hahinemu ai baola.
55A tadimu Sodoma bona natuna hahinedia ese edia noho dalana Kunana bae lou henia; bona kakamu Samaria bona natuna hahinedia ese edia noho dalana gunana bae lou henia; bona oi bona natumu hahinedia ese emui noho dalana gunana ba lou henia.
56Emu hekokoroku dinana ai oi tadimu Sodoma na udu gwaurai-gwawai herevana oi udumu ai, ani,
57emu kara dika do se hedinarai negana ai? Harihari oi na ia heḡereḡerena, duni-dae ḡauna ai vada ola Edom natuna hahinedia ediai, bona ia dekena hahinedia iboudiai ediai, bona Filistia taudia natudia hahinedia ediai, e ḡeḡemu daemu bona e dadaraimumu hahinedia iboudiai ediai.
58Emu lebulebu bona emu kara dika-rohorohodia davadia metauna o huaiamu. Iehova na e herevamu.
59Oibe, Ḡaubada Iehova na ini e gwau tomamu: Oiemu kara heḡereḡerena ai baina kara henimu. Oi ese hereva helaḡana vada o dadaraia, gwauhamata itata-utuna;
60ḡau tamona, egu gwauhamata, eregabemu negana ai oi ida ta hegwau hamata heheni ḡauna, baina laloa toa, bona oi ida mia-hanaihanai gwauhamatana ta baita haginia tutuka-tutuka.
61Bena emu kara ba lalodia tao, bona emu hane-guna bona emu hane-muritai baina abidia, natumu ai baina halaodia, negana ai vada ba hemarai, a dia eda gwauhamata dainai.
62Eda gwauhamata baina haginia tutuka-tutuka, bena ba diba lau na Iehova;
63ba laloa tao, bena ba baia, bona udumu basio kehoa lou, emu hemarai dainai, lau ese emu kara iboudiai baina lalodia nege negana ai. Ḡaubada Iehova na e herevamu.
