1Laḡani ihatauratoina huana ihatauratoina dinana iha-imana lalonai, lau ese egu ruma ai na helaiva; bena Iuda tau-badadia na lau vairagu ai e helaiva ai na Ḡaubada Iehova ese imana na lau latagu ai e atoa kau.
2Bena na roha isi, ḡau ta na itaia, ita-itana taunimanima na heto; ia koekoena hetomana ḡauna henunai na lahi, bona koekoena daenai na diari-diari hetomana, auri laboralabora hurwu-hururuna na heto.
3Ima hetomana ḡauna ta e toia lasi, doboraḡigu ai e abigu; bena Lauma ese e abigu isi, tanobada bona guba padadiai, bena Dirava imata-hanailaina ai Ierusalem e laohaigu, ela bona laloma maguna ikoukouna raka-vareaina, mirigini kahana e vaira henia ḡauna; unuseni ai vaḡeḡe kaivakukuna, vaḡeḡe e havaraiamu ḡauna, ena gini gabuna e miava.
4Na itaia danu, Israel Diravana hairaina na unuseni ai, taora ai mata-hanai ai na itaia heḡereḡerena.
5Bena ia ese e hamaorogu, eto, Taunimanima natuna e, a gaga isi, mirigini kahana ba roha henia. Bena na gaga isi, mirigini kahana na roha henia, na itaia, ihaboulaina patana ikoukouna mirigini kahana ai, raka-vareaina ai, hari vaḡeḡe kaivakukuna na mia.
6Bena ia ese ma e hamaorogu, eto, Taunimanima natuna e, idia na ede e kara tomamu o itaiamu a? Kara dika-rohoroho bada-hereadia, Israel besena ese egu gabu helaḡana amo bae lulugu oho helaoreana ai e karamu ḡaudia, o itadiamu a? A kara dikarohorohodia haida, ini kara e hereadiamu ḡaudia, na do ba itadia.
7Bena ma e laohaigu, maḡu ikoukouna badibadinai, bena na gaga isi, mauru ta magu ai na itaia.
8Bena ia ese e hamaorogu, eto, Taunimanima natuna e, maḡu ba hamaurua. Magu na hamaurua, bena iduara ta na itaia.
9Bena ia ese e hamaorogu, eto, A raka vareai, kara dika-rohoroho badahereadia unuseni ai e karamu na ba itadia.
10Bena na raka vareai, na roharoha; unuseni ai e raumu ḡaudia idau-idau bona boroma dika-rohoroho-lia bona Israel taudia edia kaivakuku iboudiai laulaudia na haba ai vada e tore.
11Unu laulau vairadiai Israel tau-badadia hitu-ahui e gini, bona Iaasania Safana na bogaragidiai e gini. Idia ta ta mai edia gida keberedia imadia ai, bona muramura mai bonana, e gabua ḡauna, kwalahuna e daeva, ori na heto.
12Bena ia ese e hamaorogu, eto, Taunimanima natuna e, Israel tau-badadia na dibura ai ede e kara tomamu, ta ta ena laulau daiutuna ena laulau daiutuna lalodiai, vada o itaia a? Badina be idia na e tomu “Iehova ese se itadamu; Iehova ese tano vada e rakatania”.
13Ia ese ma e hamaorogu, eto, Kara dika-rohorohodia haida, ini kara e hereadiamu ḡaudia, idia ese e karamu na do ba itadia.
14Bena ia ese Iehova ena dubu mirigini kahana ikoukouna raka-vareaina e laohaigu; unuseni ai hahine haida na itadia, e helaiva, Tamusu taina e taiva.
15Bena ia ese e hamaorogu, eto, Taunimanima natuna e, ina na vada o itaia a? Kara dika-rohorohodia haida, ini kara e hereadiamu ḡaudia, na do ba itadia.
16Bena ia ese Iehova ena dubu ena laloma maḡuna lalonai e laohaigu. Iehova ena dubu helaḡana vairanai, dehe toi-lasi rumana bona ihaboulaina patana padadiai, taunimanima ruahui-ima sisivana e gini; Iehova ena dubu helaḡana e muri henia bona mairiveina kahana e vaira henia, dina e toma henia dihova mairiveina italaina ai.
17Bena ia ese e hamaorogu, eto Taunimanima natuna e, ina na vada o itaia a? Iuda besena taudia ese hari kara dika-rohorohodia iniseni ai e karamu na ḡau pipikina a, una dainai idia ese tano na daḡedaḡe amo e hahonuamu, bona e habadugu hereamu? A itaia, idia ese ududia mukurodia e kara.
18Taunabunai, lau ese badu ḡaraḡara karadia baina kara; basina haḡeredia bona basina bogadia hisi; ena be taiagu ai bae tai mai gao badadia ida, to basina kamonai henidia.
