1Taunimanima natuna e, e tunua nadina ta bavabia, vairamu ai bavatoa diho; bena ia kopina ai Ierusalem hanuana laulauna ta ba torea:
2ituari-henina ḡaudia bona ikoulaina maguna bona tano senudia bona taruha bona vaḡoma danu laulaudia ba tore.
3Bena auri palaka-palakana ta bavabia, auri maḡuna ai bainela, oi bona hanua padamui ai; bena ba raraia tao, ikou-ahuna bona ituari-henina ba ha-aukaia. Ina na toa ta, Israel besena enai.
4Bena ohemu laurina ai ba eno dere; bena lau ese Israel besena ena dika davana na oi latamu ai baina atoa; dina edehohodia ai ba eno dere na edia dika davadia latamu ai bae mia.
5Badina be dina na gwaurai henimumu, dina sinahu-toi taurahanita-ahui, idia ese edia dika davadia bae abi laḡanidia heḡereḡeredia; nega unudaudauna na Israel besena ena dika davana latamu ai baine mia.
6Unu dina ba haḡuḡurudia, bena nega iharuana ai ma ba eno dere, a ohemu idibana ai, bena Iuda iduhuna ena dika davana na latamu ai baine mia; dina hari-ahui na gwaurai henimumu, dina ta ta be laḡani ta a toadia.
7Bena Ierusalem ikou-ahuna ba raraia tao, mai imamu ḡaḡaena Ia; bena hanua ihadikana ba perovetalaia.
8A itaia, lau ese varo ai baina guimu, bena basio eno hegiro diba, ela bona emu hanua ikou-ahuna dinadia ba haguḡurudia.
9Ina danu, oi ese uit, bali, bini, lentil, millet, bona rae na bavabidia, nau tamona ai ba udadia hebou, bena igabu ba kara. Bena ohemu ai ba eno dere dinadia hidaosi, dina sinahu-toi taurahanita-ahui lalodiai bavani.
10Bavania anianina metauna ba hahetohoa, sekele ruahui dina ta lalonai; dina ta ai nega tamona mo bavaniani.
11Ba inua ranuna danu ba hahetohoa, ranu hini ta ba karoaia, karoa tauratoi, bena karoa tamona ba inua; dina ta ai nega tamona mo ranu ba inu.
12Bavania, bali atagana na heto, idia vairadiai ba gabua, taunimanima taḡedia kakorodia lahina latanai.
13Bena Iehova na e tomu, Israel taudia adia aniani mirodia unu bae ani toma, ediai baina luludia lao besedia bogaragidiai.
14Bena lau nato, Ḡaubada Iehova e, a itaia, lau na sibogu asina hahemiro; merogu negana amo ema bona hari ina nega sibona e mase kava ḡauna ta eiava uda boromadia ese e darea ḡauna ta asina ania, bona vamu bodagana taina na nega ta ai udugu ai se vareai.
15Bena ia ese e hamaorogu, eto, A itaia, na gwau maoromu, amu ataga na taunimanima taḡena kakorona lahina latanai basio gabua, a boromakau taḡena kakorona lahina latanai ba gabua.
16Ma e hamaorogu, eto, Taunimanima natuna e, a itaia, Ierusalem ai mauri anianina na baina abia oho; aniani metauna bae hahetohoa guna bena bae ania mai garidia ida; bona ranu na bae hahetohoa guna, bena bae inua mai kudou-hetahadia ida.
17Unu baina kara toma, bena aniani ai bona ranu ai bae dabu, bae heroha heheni mai kudou-hetahadia ida, bona edia dika davadia daidiai taudia bae varoda.
