1Fare mo’on e pow’iyeg nga wuru’ e garog u ba’ ni ngek ko gin bay e Tempel riy. Re garog nem e bman,
2ma aram me ga’ar SOMOL ngog, “Re garog ney e bay i par nib man ni dab ni bing bingyal’. Dariy ba girdi’ nra yan riy, ni bochan e Gag SOMOL ni Got nu Israel e kug thum’ riy nga lane yoror. Ere nge par nib man.
3Kemus ni fak e pilung ni be gagiyeg e ir e ra yan i par nga ba’ ni langgin re garog ney ni nge kay fare ggan nib tabgul u p’eowcheg. Ra yan u langan e garog ngalan bochi senggil nga naun ma ku aram e gin nra sul riy nga wean.”
4Ma aram me fekeg fare mo’on ko bin lel’och e garog nggu bow nga mit fare Tempel. Ma nap’an e gu changar, mug guy ni fare Tempel e ke sug nga ra’en SOMOL nib maluplup’. Mug palpal nga daken e but’,
5me ga’ar SOMOL ngog, “Fak e girdi’, mu tiyan’um ko tin ga be guy mag be rung’ag. Arame nggu weliy yalen nge gafalngin fare Tempel ngom. Mu tafanamiyen ko pi’in yira pag nga langgin nge sul nga wuru’ fare Tempel, nge pi’in ni dab ni pagrad.
6“Mog ko girdi’ ni tatogopluw nu Israel, ni Gag SOMOL ni Th’abi Tolang, e dabkiyag ni gu k’adan’ug ko pin’en nib sonogor ni kayad be rin’.
7Kar dariyfan niged e Tempel rog ko girdi’ nu bang ni dawor ni maad’ad nagrad ni bod nike yog e motochiyel rok Moses ni bogi girdi’ ni darir folgad rog, ni karbad ngalan fare Tempel ko ngiyal’ ni yibe pi’ ngog e mam nge racha’. Girdi’ rog e kar th’abed e m’ag romad ko urungin e pin’en nib sunsonogor ni kar rin’ed.
8Ya gathi kuyad e yad be tay murung’agen e pi bangbangin e thothup u lan e Tempel rog, kemang girdi’ nu bang e kar ted be tay murung’agen.
9“I Gag SOMOL ni Th’abi Tolang e gu be tamilngeg ni dakriy reb e girdi’ nu bang ni dawor ni maad’adnag ni bod ni yog e motochiyel rok Moses, ara be’ ni dar ma fol rog ni ku ra thum’ ngalan e Tempel rog, ni mus ko girdi’ nu bang ni yad ma par u fithik’ e girdi’ nu Israel.”
10I SOMOL e ga’ar ngog, “Nggu gechignag e pi Levite nib mu’un e tin kabay e girdi’ nu Israel ngay, ni kar niged gag yad be tayfan e liyos.
11Rayag ni ngu’ur pigpiggad ngog u lan fare Tempel ni yad e ga’ ko pi garog mu’ur rin’ed e maruwel ko fare Tempel. Rayag ni yad ra li’ e gamanman ni be pi’ e girdi’ ni maligach ni mo’oruf nge yug maligach, mu’ur rin’ed e maruwel rorad ni yad be pigpig ko girdi’.
12Ma bochan ni ur ted murung’agen e meybil ko liyos ni i rin’ e girdi’ nu Israel ni aray e kanawo’ ni waliy e girdi’ ko denen, I Gag SOMOL ni Th’abi Tolang e gu be micheg ni rib mich ni yira gechig nagrad.
13Dab ku ra pigpiggad ngog ni prist fa ra chuchugurgad nga ban’en rog nib thothup fa ranod nga langgin e Gin Th’abi Thothup. Irera’ e gachig rorad ni fan ko pin’en nib sonogor ni kar ngoliyed.
14Bay gu pagfan ngorad e tin ba’achig e maruwel ni thingar ur rin’ed u lan e Tempel.”
15I SOMOL ni Th’abi Tolang e ga’ar, “Fapi prist ko ganong rok Levi ni yad owchen Zadok, e ur pared ni yad ba yul’yul’ ko pigpig ngog u lan e Tempel ko ngiyal’ ni ba’aram ni tin kabay e girdi’ nu Israel e kar pi’ed keru’rad ngog. Ere chiney e yad e picha’ ni ngu’ur pigpiggad ngog miyad be yib nga p’eowcheg ngu’ur pi’ed e mam nge racha’ ko fapi maligach ngog.
16Kemus ni go’ yad e yad ra yib nga langgin e Tempel rog, ngar pigpiggad u altar rog, miyad tay murung’agen e liyor u Tempel.
17Nap’an ni yad ra thumur u langan e garog ngalan e yoror ko fare Tempel, ma ngroned nga dakenrad e mad nib wech. Thangri dab ro’ned nga dakenrad ban’en nni ngongliy ko bunu’en e saf u nap’an ni yad be maruwel u lan e thal ni langgin e yoror ara langgin e Tempel.
18Ngar faned e turban ni mad ni wech nge yuley i tan e mad nib wech, machane dab ra faned e leed, ya nge dabi filrad e athuw.
19U m’on ni ngranod ko thal ni wuru’ e yoror ko gin bay e girdi’ riy, ma thingar llufed fapi mad ni yad ma yin’ ko maruwel u Tempel ngar ted u lan fapi senggil nib tabgul. Miyad yin’ yug boch e mad ni fan e nge dabi af e girdi’ machan fapi mad rorad nib tabgul.
20“Prist e thangri dab ra puyed lolugrad u daken e lo’ ma dabra paged nge n’uw piyen lolugrad. Ngi i par piyen lolugrad ni bfel’ n’umngin.
21Prist e thingar dab ra unumed e wayin u m’on ni ngranod ngalan e thal ni langgin e yoror.
22Dariy reb e prist ni nge le’engiy be’ nike chuw ko pumo’on rok; dabisiy ni nge le’engiy be’ ni bpin nu Israel ni be’ ni denang e pumo’on fa be’ nike yim’ figirngin nib prist.
23“Prist e nge fil ko girdi’ e thil u thilin ban’en nib thothup nge ban’en ni de thothup, nge n’en nib machalbog nge n’en nde machalbog.
24Nap’an nra wagagey e thin u bpa’ i oloboch, ma fapi prist e yad e ngar turguyed rogon ni bod ko motochiyel rog. Miyad e ngu’ur ayweged e pi madnom ko Tempel ni bod ko pi yalen nge gafal rog ma thingar ur ted fare Sabbath nib thothup.
25“Downgin be’ nike yim’ e ra math be’ ngay me ta’ay. Ere prist e thangri dabi yan nga charen be’ nike yim’, kemus ni fa’anra reb e gal labthir rok fa reb i pifak, fa reb i walagen ni pumo’on ara reb e bpin ni walagen ni dawri mabgol.
26Tomuren nike be’ech bayay, ma nge son ni medlip e rran,
27ma aram e nge yan ko thal ni langgin e yoror ko Tempel nge pi’ e maligach nma be’ech nagey ya nge yag ni nge pigpig u lan e a Tempel bayay. I Gag fare SOMOL ni Th’abi Tolang e gu be non.
28“Fapi prist e kayag ngorad e liw ni prist ni aram e f’oth rorad ko tin kug pi’ nga Israel ni ngan thapeg i yan nga reb e mfen nge reb. Yad e dabi par bang e binaw u lan yu Israel u pa’rad; Gag e gubin ngorad.
29Maligach ni grain, maligach ko denen, nge maligach ni mathang malfith e nge mang ggan ko prist, ma ku rayag ngorad gubin ban’en u lan yu Israel ni kan fal ngabang ni fanag.
30Fapi prist e yad e nge yag ngorad e bin thabi fel’ u wom’ngin gubin e woldug ni tin som’on nge gubin e tin ni kan pi’ ngog. Gubin ngiyal’ nra lith be’ e flowa, ma bin som’on e lof e ngan pi’ ko prist ni bod ba maligach, ma fal’eg wa’ath rog e bay i gif u daken e pi tabnaw rorad.
31Prist e thangri dabi kay bmit e arche’ ara ba gamanman ni yim’ fa ba gamanman ni li’ reb e gamanman.”
