Text copied!
CopyCompare
Kâte Bible - Binaŋ Qâhâc II

Binaŋ Qâhâc II 36

Help us?
Click on verse(s) to share them!
1Eme mâreŋ irec ŋic ŋokac jaŋe Josiare ŋokâ Joahaʒi e rorâ Jerusalem haeo mamac‐ticnere tuc qarâ juocte ŋicwofuŋ âkendâŋnembiŋ.
2Joahaʒi e jara 23 bazurâ fuŋkerâ ŋicwofuŋ ehuc Jerusalem haeo mosa jahec â moc juwec.
3Eme Aigita ŋicwofuŋzi Joahaʒi Jerusalem haeonec bârâriehuc mâreŋ ira ŋic ŋokac jumbiŋ jaŋe sahac taha‐jeŋic siliwa moneŋ ŋemâc‐ticne 200 â gol moneŋ ŋemâc‐ticne wâŋ râecnehuc juniŋte mujarewec.
4Ehuc Aigita ŋicwofuŋ Neko e Joahaʒire ɋa Eliakim Juda â Jerusalem hae irec ŋicwofuŋ juocte âkendâŋnewec, ehuc ʒâŋe‐ticne herisierâ Jojakim muwec. Ehuc hahac‐ticne Joahaʒi rorâ Aigita mâreŋko barawec.
5Jojakim e jara 25 bazurâ fuŋkerâ ŋicwofuŋ ehuc Jerusalem haeo jara 11 juwec. E Wofuŋ Anutu‐ticnere ʒâŋe faio wiac mamakâcne ewec.
6Ehame Babe ŋicwofuŋ Nebukaneza e kâpâcwâruzi me kikene qarâ Babe mâreŋko baraocte râsi fisicnewec.
7Erâ Nebukaneza e Wofuŋ ufuŋ‐ticnere kuʒi râqâc wiac tucne i wâc rorâ Babe mâreŋko bara ŋicwofuŋ ficticnao râewec.
8Eme Jojakimzi wiac sasawa ewec bawec â wiac mamakâcne ewec, erâ okacne fisicnewec irec binaŋ i Israe â Juda Ŋicwofuŋ jaŋere Papia Qizecko qâreŋke‐fârekicne. Ŋokâ‐ticne Jojakiŋzi ine tuticne qarâ ŋicwofuŋ juwec.
9Jojakiŋ e jara‐ticne 18 bazurâ fuŋkerâ ŋicwofuŋ ehuc mosa jahec â moc â ʒoaŋ gie bapa 10 Jerusalem haeo juwec. E Wofuŋte ʒâŋe faio wiac mamakâcne ehuc juwec.
10Ehame jara ijaha ʒoaŋ dameŋ fuŋkezo ehame ŋicwofuŋ Nebukanezazi kiŋaŋ sorec‐jopame rarâ Jojakiŋ Babe mâreŋko barahuc Wofuŋ ufuŋ‐ticnere kuʒi râqâc wiac mâmâc barambiŋ. Ehuc ɋaticne Zedekia e Juda â Jerusalem haere ŋicwofuŋ juocte âkendâŋnewec.
11Zedekia e jara‐ticne 21 bazurâ fuŋkerâ ŋicwofuŋ ehuc Jerusalem haeo jara 11 juwec.
12E Wofuŋ Anutu‐ticnere ʒâŋe faio wiac mamakâcne ehuc juwec. Erâ Wofuŋte dâŋ porofete Jeremiare micko râekicne i âzâcneme manarâ wâc mi rumewec.
13Erâ ŋicwofuŋ Nebukaneza e Zedekiazi Anuture maio mupaŋkehuc erao qohotaocte ʒoɋac ecnewecte râŋgeŋkecnewec. Ehuc Israere Wofuŋ Anuturao mi risiehuc sâke fâuc erâ maŋsanaŋ ewec.
14Ehame taha bapa micne â ŋic ŋokac jaŋe wâc iŋuc jaha ŋic gurune gurune jaŋere eebapa repicne i bâjâpehuc Wofuŋtao moc mi siŋke‐jâmbâŋkembiŋ. Iŋuc ehuc Wofuŋzi Jerusalem haeo ufuŋ‐ticne mutiriwec i wâc bâbiembiŋ.
15Iŋuc epie apa ŋosafâc‐jeŋic jaŋere Wofuŋ Anutu e ŋic ŋokacfâc‐ticne â ŋeŋe juju hae‐ticnere busâqoc manahuc kiŋaŋŋicfâc‐ticne jaŋere micko uŋsawaŋ dâŋ râeme jazahuc jumbiŋ.
16Eme jaŋe sifu dâŋticne mu surec ehuc kiŋaŋŋicfâc‐ticne sopec‐jopambiŋ. Erâ porofetefâc‐ticne mukac mupe ejarehuc jukupie Wofuŋ kimbeŋ‐ticnere ʒocbâruŋzi ŋic ŋokacfâc‐ticne jaŋerao tatara tâmiric bâruŋkehuc fowec.
17Eme irec Wofuŋzi Judaŋic jaŋere râsi Kaldea ŋicwofuŋ ecneme eki fisirâ ŋicmotecfâc‐jeŋic furuficko ʒikazi qâhâmoc‐jopawec, ehuc ŋic ŋokac socɋâri, me ŋicraŋɋa me ŋicqizec jâmbâŋ jaŋe wâc busâqoc mi mana‐jarewec. Wofuŋ e ŋicwofuŋte meo râec‐jopa‐fârewec hâcne.
18Eme ŋicwofuŋ e Anuture ufuŋko kuʒi râqâc wiac kâcɋene me piticne â Wofuŋ ufuŋ‐ticnere ʒeŋaŋ, erâ ŋicwofuŋ â mefârofâc‐ticne jaŋere ʒeŋaŋ wiac i rofârerâ Babe mâreŋko barawec.

19Ehame Anuture ufuŋ i ʒoczi turuŋkepie ʒawec. Erâ Jerusalem haesac heropiehuc ŋicwofuŋfic ŋerawec i iŋuc jaha turuŋkepie ʒawec. Jaŋe iŋuc ehuc kuʒi râqâc wiac furi sâko i imacke‐fârembiŋ.
20Erâ ʒikare nâfocne jaŋe ine kâpâcwâru bacjoparâ Babe mâreŋko amec‐jopa rame ira e jahacne â ŋokâfâc‐ticne jaŋere kiŋaŋ qaqa jufekuhapie Perisia ŋic jaŋe sanaŋkembiŋ.
21Wiac i Jeremiazi Wofuŋte dâŋ mufuawec irec sâcko Juda mâreŋzi niniŋ siarereŋ fuarâ fokuhame jara 70 tarawec.
22Jeremiazi Wofuŋte dâŋ mufuawec i fârinehec eocte Perisia ŋicwofuŋ Kiruzi fuŋkerâ ŋicwofuŋ juwec jara ira Wofuŋzi Perisia ŋicwofuŋ Kiru maŋ baafec ecneme dâŋ râeme uucmaŋ‐ticne sâcke‐fârerâ rawec, erâ papiao wâc ʒiŋuc qâreŋkewec:
23“Perisia ŋicwofuŋ Kiru e dâŋ kecʒiŋuc mukac: ‘Sambâŋte Wofuŋ Anutu e mâreŋne mâreŋne irec uucmaŋ i ʒeŋgoma no tahacnu‐fârewec, ehuc Juda mâreŋko Jerusalem hae ŋekac ira fic moc bacnepemurâ munarewec. Irec ŋicfâc‐ticne jaŋeraonec moczi moc ŋondeŋ‐ŋeŋicko jukacko Wofuŋ Anutu‐ticnezi ehec juhame sâcne risiezejec.’”