Binaŋ Qâhâc II 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Jeroboam e ŋicwofuŋ jume jara 18 eha Abiazi fuŋkerâ Judaŋic qaŋeŋ‐jopahuc ŋicwofuŋ ewec.

²Ehuc Jerusalem haeo jara jahec â moc juwec. E neŋgoc‐ticne i Gibea hae rune Uriele ere otâ ʒâŋene Mikaja. Eme Abia â Jeroboam jaherao ʒikazi ʒuhuckeme ʒuhuc fowarewec.

³Eme Abia e momori ŋic bâwosâec‐jopakicne ʒikafac jâmbâŋ 400 tauseŋ rocjopame ʒikao rambiŋ. Ehame Jeroboam e iŋuc jaha ehec qaqac enicte ŋic bâwosâec‐jopakicne momori wânʒâŋ 800 tauseŋ rocjopame birickembiŋ.

⁴Eme Abia e Eferaim tiki mâreŋko tiki moc ʒâŋene Zemaraim ira domahuc muwec, “O Jeroboam â Israe ŋic sasawa ŋoŋe mananiŋ.

⁵Israere Wofuŋ Anutu e Israe ŋic qaŋeŋ‐jopahuc juju i Dawidi â ɋâricfâc‐ticne jaŋehec ʒâʒâfic sanaŋ moc ehuc tahac‐jopawec i mi manaeŋgopieŋ me?

⁶Salomore kiŋaŋŋic Nebatere ŋokâ Jeroboam hâcne eki ine fekicne‐ticne Dawidire ŋokâ Salomo maŋrâŋgeŋ bâfuacnewec.

⁷Eme Rehoboam e motec ɋârire râsi sâcne mi sanaŋke‐jareha ŋic repic qapicne jaŋe Jeroboamtao tumaŋnerâ juhuc Salomore ŋokâ Rehoboam e râsi ecnembiŋ.

⁸“Nâŋe ŋic guru sâko juŋgopeneŋ, erâ Jeroboamzi bulimakao motecnere hawari golzi ɋâŋ bacjofawec bajuŋgopeneŋ, irec sâcne sanaŋkerâ Wofuŋte uucmaŋ i Dawidi ŋokâfâcne jaŋere meonec jowac ronaŋmu, ŋoŋe iŋuc moc mupie.

⁹Ŋoŋe Aroŋte ɋâricfâc, Wofuŋte taha bapafâc hâcne â Lewiŋic jâpec‐jopambiŋ. Ehuc mâreŋ gâcne irec ŋic gurune gurune jaŋere sâc jaha ehuc ŋoŋe ŋaŋacne taha bapafâc âkendâŋ‐jopambiŋ. Ehame ŋic moc e bulimakao ŋicnezi motecne moc â lama ŋicne 7 bacjopa fisime ŋoŋe e nemu jabanere taha bapa erâ juocte mutirieŋgopieŋ hâcne.

¹⁰Nâŋere Wofuŋ ine Anutu, nâŋe e mi râpeckembeŋ. Nâŋerao Aroŋte ɋâricfâc taha bapa jaŋe Wofuŋ kiŋaŋ qacnehuc juŋgopieŋ â Lewiŋic jaŋe wâc gie‐jeŋicko juŋgopieŋ.

¹¹Jaŋe qowi bâzi â hosâc âsu i furic owâc sâc Wofuŋ rikecneeŋgopieŋ. Ehuc poroŋ furu mukicne i tebo gol ɋaɋacnezi bakicne ira râeeŋgopieŋ â lambe jaŋe ŋafe sâc tamaeniŋte lambe dodoma i soŋaŋkeeŋgopieŋ. Nâŋe Wofuŋ Anutu‐nâŋecte mumutâc i soŋaŋkeeŋgopeneŋ, ŋoŋe ine e râpeckembiŋ.

¹²Manaŋgopieŋ, Anutu e nâŋehec juhuc bânie‐nâreekac â taha bapafâc‐ticne jaŋe qeŋ qapie ŋoŋehec qaqac enaŋte qeŋjeŋichec juŋgopieŋ. O Israere ɋâricfâc, ŋoŋe apa ŋosafâc‐nâŋec jaŋere Wofuŋ Anutuhec qaqac mi enʒepieŋ; ŋoŋe sâcne mi sanaŋkeniŋmu hâcne.”

¹³Eme Jeroboam e somâ guru moc râpefuŋ‐jeŋicko fisi‐jareniŋte sorec‐jopawec. Eme momori guru moc Judaŋic maic‐joparâ domahapie somâc‐jopambiŋ jaŋe ine râpefuŋ‐jeŋicko fisimbiŋ.

¹⁴Ehame Judaŋic jaŋe râpefuŋ‐jeŋicko ʒâŋe firâ honepie ʒikazi orâŋ‐jopa‐fârewec. Eme jaŋe Wofuŋ wirâ wâwâsic ecnehuc taha bapa jaŋe qeŋ qambiŋ.

¹⁵Eme Judaŋic jaŋe aŋara hehapie Anutuzi Jeroboam â Israe ŋic sasawa Abia â Judaŋic jaŋere ʒâŋe faio bawahac‐jopawec.

¹⁶Bawahac‐jopame Israe ŋic jaŋe wisepie Anutuzi Judaŋic jaŋere meo râec‐jopawec.

¹⁷Ehame Abia â ŋicfâcne jaŋe mâretec jopambiŋ. Irec Israe ŋic bâwosâec‐jopakicne 500 tauseŋzi hâmombiŋ.

¹⁸Dameŋ ira Israe ŋic iŋuc hâcne bawahac‐jopakicne, â Judaŋic jaŋe ine apa ŋosafâc‐jeŋic jaŋere Wofuŋ Anuturao roweckembiŋte sanaŋkembiŋ.

¹⁹Eme Abia e Jeroboam qa jâpec ecnehuc eraonec hae ʒiŋuc rowec: Bete â hae bozefâcne â Jesana â hae bozefâcne, erâ Eforoŋ â hae bozefâcne.

²⁰Abiare dameŋko Jeroboamte tâpiri mocwâc mi fuawec. Eme juku Wofuŋzi qame hâmowec.

²¹Abia e ine tâpirihec jaha juwec. Ehuc ŋonâŋfâc‐ticne 14 rocjopawec, â ŋokâfâcne 20 â otâfâcne 16, iŋuc jumbiŋ.

²²Eme Abiazi wiac gâcne ebac ewec â hata âtewec erâ dâŋ muwec i sasawa porofete Idore binaŋko qâreŋke‐fârekicne.